༢༠༡༤ ཟླ་ ༨ ཚེས་ ༢ རེས་གཟའ་སྤེན་པ།
༄༅། །འདི་གར་གློ་སྒྲིག་ས་གནས་འཐུས་ཚོགས་ལས་ཁུངས་ནས་ཕྱི་ལོ་ ༢༠༡༤ ཟླ་ ༨ ཚེས་ ༢ ཉིན་བཏང་གནས་ནང་འཁོད་དོན། གློ་སྒྲིག་ས་གནས་འཐུས་ཚོགས་སྐབས་བརྒྱད་པའི་ཚོགས་ཐེངས་དང་པོའི་ཐོག་གཞུང་འབྲེལ་གྲོས་ཆོད་བཞག་པའི་ནང་། བོད་ནང་ཆོས་དང་། མི་རིགས་ རིག་གཞུང་སླད་ཕྱི་ལོ་ ༢༠༠༩ ནས་འདི་ལོ་བར་བོད་ནང་གི་རྒྱལ་གཅེས་པ་ཕོ་མོ་གྲངས་བརྒྱ་དང་སུམ་ཅུ་བརྒལ་བས་རང་ལུས་མེར་སྲེག་བཏང་ཡོད་པ་མ་ཟད། དེ་འབྲེལ་བཙན་བྱོལ་ནང་དུའང་རང་ལུས་མེར་སྲེག་བཏང་བ་རྣམས་ཀྱི་ཆེད་ས་གནས་འཐུས་ཚོགས་ནས་གོ་སྒྲིག་འོག་གློ་སྒྲིག་ཁོངས་གཞིས་ཆགས་ཁག་གསུམ་ནང་ཉིན་གཅིག་ལ་མི་མང་ནས་མཆོད་མེ་སྟོང་ཚར་དང་སྨོན་ལམ་གསོག་རྒྱུ་གྲོས་ཆོད་བཞག་པ་ལྟར།
ཕྱི་ལོ་ ༢༠༡༤ ཟླ་ ༧ ཚེས་ ༣༡ བོད་ཟླ་ ༦ ཚེས་ ༤ ཉིན་བདག་ཅག་གི་སྟོན་པ་ཐུབ་པའི་དབང་པོས་བདེན་བཞིའི་ཆོས་འཁོར་ཐོག་མར་བསྐོར་བའི་དུས་ཆེན་ཁྱད་པར་ཅན་ཉིན་སྔ་དྲོ་ཆུ་ཚོད་ ༨་༠༠ ནས་ ༡༠་༠༠ བར་དཔལ་འབྱོར་གླིང་དུ་ཚོགས་ཁང་བཀྲ་ཤིས་ཕྱོགས་ལས་རྣམ་རྒྱལ་ནང་ཤངས་དགའ་ལྡན་ཆོས་འཁོར་དགོན་པའི་དགེ་འདུན་རྣམ་པ་དབུ་བཞུགས་ཐོག་ས་གནས་འགོ་འཛིན་གྱིས་གཙོས་ལས་ཀྱི་སྣེ་མོར་གཏོགས་པ་དང་། མི་མང་རྣམས་ལྷན་འཛོམས་ཀྱིས་བཟང་སྤྱོད་སྨོན་ལམ་དང་མ་ཎི་གསོག་སྒྲུབ་དང་ལྷན་སྟོང་མཆོད་ཕུལ་བ་དང་ཚོགས་ཡོངས་ལ་གསོལ་ཇ་བཏང་། ཆུ་ཚོད་ ༡༠་༣༠ ནས་ ༡༡་༣༠ བར་བཀྲ་ཤིས་སྒང་དུ་གུ་རུ་ལྷ་ཁང་ནང་དགེ་འདུན་བཞི་གྲ་དང་མང་ཚོགས་ཀྱིས་མཆོད་འབུལ་སྨོན་ལམ་གསོག་སྒྲུབ་གནང་། ཉིན་རྒྱབ་ཆུ་ཚོད་ ༢་༠༠ ནས་ ༤་༡༥ བར་བྱམས་པ་གླིང་དུ་བཀའ་འགྱུར་ལྷ་ཁང་ནང་སྟག་ལུང་དགོན་པའི་མཁན་པོ་དབུ་བཞུགས་ཐོག་དགེ་འདུན་རྣམ་པ་དང་ས་གནས་འགོ་འཛིན་གྱིས་གཙོས་ལས་ཀྱི་སྣེ་མོར་གཏོགས་པ་དང་། མི་མང་ལྷན་འཛོམས་ཀྱིས་བཟང་སྤྱོད་སྨོན་ལམ་དང་མ་ཎི་གསོག་སྒྲུབ་དང་འབྲེལ་སྟོང་མཆོད་ཕུལ་བ་དང་ཚོགས་ཡོངས་ལ་གསོལ་ཇ་བཏང་། དེ་ཉིན་ས་འཐུས་རྣམ་པ་ས་གནས་སོ་སོར་ཆེད་བཅར་གྱིས་གོ་སྒྲིག་ཞུས་ཐོག་ས་འཐུས་ཚོགས་ཚེ་རིང་སྲི་བརྟན་ནས་མཆོད་འབུལ་སྨོན་ལམ་ས་གནས་འཐུས་ཚོགས་ཀྱི་གོ་སྒྲིག་ཞུ་དགོས་པའི་དགོས་པ་རྒྱུ་མཚན་གསལ་བཤད་ཞུས་ཏེ་བསྔོ་སྨོན་རྒྱ་ཆེ་གནང་དགོས་པའི་འབོད་སྐུལ་ཞུས་པ་བཅས།།
