༢༠༡༤ ཟླ་ ༨ ཚེས་ ༡༢ རེས་གཟའ་མིག་དམར།
༄༅། །ཕྱི་ལོ་ ༢༠༡༤ ཟླ་ ༧ ཚེས་ ༣༡ ཉིན་གྱི་མཚན་མོ་ཐེ་ཝན་ལྷོ་ཕྱོགས་ཀའོ་ཞུང་གྲོང་ཁྱེར་གྱི་ས་འོག་རྡོ་བཞུན་རླངས་རྫས་འབར་གས་དང་། དེ་བཞིན་
གནམ་གྲུ་བརྡབ་སྐྱོན་གྱི་ཡིད་སྐྱོའི་གནས་ཚུལ་ཐོན་ཡོད་པར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སེམས་གསོའི་གསུང་འཕྲིན་སྩལ་བའི་ནང་འཁོད་དོན། ཉེ་ཆར་ཐེ་ཝན་ཀའོ་ཞུང་གྲོང་ཁྱེར་ནང་རྡོ་བཞུན་རླངས་རྫས་འབར་གས་དང་། དེ་བཞིན་གནམ་གྲུ་བརྡབ་སྐྱོན་བྱུང་སྟེ། མི་རྒྱུ་གཉིས་ལ་གྱོང་གུན་ཚབས་ཆེ་ཕོག་པའི་ཡིད་སྐྱོའི་གནས་ཚུལ་གོ་མ་ཐག་ངོས་རང་ལ་དམིགས་བསལ་བློ་ཕམ་བྱུང་།
ངོས་རང་དེ་སྔ་ཐེ་ཝན་གྱི་གྲོང་ཁྱེར་ཀའོ་ཞུང་ནང་བསྐྱོད་མྱོང་ཡོད། དེ་ཁུལ་གྱི་མི་དམངས་རྣམ་པའི་ཆོས་སེམས་དང་དད་གུས་དྲན་བཞིན་ཡོད། དཀའ་ངལ་ཆེ་བའི་དུས་སྐབས་འདིར་ངོས་ཀྱིས་ཁྱེད་རང་ཚོ་བརྗེད་ཐབས་མེད་པ་མ་ཟད། ཤུལ་ལུས་ནང་མི་སྤུན་མཆེད་རྣམས་ལ་གདུང་སེམས་མཉམ་སྐྱེའི་སྨོན་ལམ་རྒྱག་རྒྱུ་ཡིན།
ཕྱོགས་མཚུངས་ཉེ་ཆར་རྒྱ་ནག་ཡུ་ནན་ཞིང་ཆེན་ས་ཁུལ་ནང་ས་ཡོམ་བརྒྱབ་པའི་གནས་ཚུལ་གོ་ཐོས་བྱུང་། ལྷག་པར་དེང་སྐབས་འཛམ་གླིང་གི་ས་ཕྱོགས་ཁག་གཅིག་ནང་འཁྲུག་རྩོད་དང་རང་བྱུང་གོད་ཆག་སོགས་ལ་བརྟེན་མི་མང་དག་ཅིག་རྐྱེན་འདས་སུ་གྱུར་བ་དང་། མང་པོ་ཞིག་ལ་རྨས་སྐྱོན་ཕོག་པའི་གནས་སྟངས་ལ་བསམ་བློ་གཏོང་སྐབས་ངོས་རང་ཧ་ཅང་བློ་ཕམ་ཡོང་བཞིན་འདུག
དེར་བརྟེན་ངོས་ཀྱི་ཤུལ་ལུས་ནང་མི་རྣམས་ལ་སེམས་གསོ་དང་འབྲེལ་འདས་གྲོངས་སུ་གྱུར་བ་རྣམས་དལ་རྟེན་བཟང་པོ་ཞིག་འཐོབ་ཆེད་བསྔོ་སྨོན་རྒྱག་རྒྱུ་ཡིན། དེ་བཞིན་འཛམ་གླིང་ཞི་བདེ་དང་འགྲོ་བ་རིགས་དྲུག་སེམས་ཅན་ཐམས་ཅད་སྡུག་བསྔལ་ལས་གྲོལ་རྒྱུའི་སྨོན་འདུན་ཤུགས་དྲགས་དང་བཅས། ཤཱཀྱའི་དགེ་སྦྱོང་ཆོས་སྨྲ་བ་བསྟན་འཛིན་རྒྱ་མཚོས། ཕྱི་ལོ་ ༢༠༡༤ ཟླ་ ༨ ཚེས་ ༦ ཉིན། །
གསུང་འཕྲིན་ངོ་མ་རྒྱ་ཡིག་ཐོག་སྩལ་ཡོད་པ་ནས་ཕབ་སྒྱུར་བྱས་པས། ཚིག་དོན་ལ་ཧེ་བག་ཡོད་ཚེ་རྒྱ་ཡིག་ལ་རྩ་འཛིན་ཡོང་བ་ཞུ།།
