༢༠༡༤ ཟླ་ ༨ ཚེས་ ༢༧ རེས་གཟའ་ལྷག་པ།
༄༅། །ཕྱི་ལོ་ ༢༠༡༤ ཟླ་ ༨ ཚེས་ ༢༦ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྔ་དྲོ་ཆུ་ཚོད་ ༩ ཐོག་ཇར་མན་གྲོང་ཁྱེར་ཧམ་བྷག་གི་ཀོང་རེ་སི་ཚོགས་ཁང་ནང་མང་ཚོགས་སྟོང་ཚོ་བརྒལ་བར་སྤྱན་རས་གཟིགས་འཇིག་རྟེན་དབང་ཕྱུག་གི་བཀའ་དབང་སྩལ་གྲུབ་བསྟུན། ༸གོང་ས་མཆོག་གི་ཇར་མན་གསུང་བསྒྱུར་དང་བཀའ་ཆོས་གོ་སྒྲིག་ཚོགས་ཆུང་གི་ཚོགས་གཙོ་གཅིག་ལྕོགས་ཡིན་པ་སྐུ་ཞབས་ཁི་རི་སི་ཊོབ་སི་པི་ཛི་ Christof Spitz ལགས་ཀྱིས་༸གོང་ས་མཆོག་ལ་བཀའ་དྲིན་ཆེ་ཞུས་པ་མ་ཟད། བཀའ་ཆོས་གོ་སྒྲིག་ལ་མཐུན་འགྱུར་ཕྱག་རོགས་གནང་མཁན་དང་བླངས་བརྒྱ་ཕྲག་ཡོད་པ་རྣམས་ལའང་ལེགས་གསོའི་བསྔགས་བརྗོད་དང་སྦྲགས་ཐུགས་རྗེ་ཆེ་ཞུས་འདུག གཞན་ཡང་སྐབས་དེར་ཚོགས་གཙོ་མཆོག་གིས་བཀའ་ཆོས་སྐབས་ཕྱག་འཁྱེར་བཙོང་བའི་ཡོང་བབ་དངུལ་རྣམས་ཧམ་བྷག་ས་གནས་སུ་ཆོས་ལུགས་ལ་མ་རྟེན་པའི་བཟང་སྤྱོང་གོང་མཐོར་གཏོང་རྒྱུ། དཔེར་ན། ནང་ཆོས་ནས་གསུང་པའི་ཚན་རིག་གི་རྣམ་གཞག་རྣམས་ཇར་མན་ཡུལ་སྐད་ནང་ཕབ་བསྒྱུར་ཞུ་རྒྱུའི་ལས་གཞིའི་རིགས་ལ་གཏོང་རྒྱུ་ཡིན་སྐོར་སྙན་སྒྲོན་ཞུས་པ་དང་སྦྲགས། འཆར་ལོའི་ཕྱི་ཟླ་ ༢ ནང་༸གོང་ས་མཆོག་གིས་སུད་སིའི་ Switzerland གྲོང་ཁྱེར་བྷ་སེལ་ Basel ནང་དུ་བཀའ་ཆོས་སྩལ་སྐབས་སླར་ཡང་མཇལ་རྒྱུའི་རེ་བ་ཡོད་སྐོར་གསུངས། དེ་རྗེས་༸གོང་ས་མཆོག་གིས་མཇུག་བསྡོམས་བཀའ་སློབ་སྩལ་དོན། ང་ཚོ་ཚང་མས་ཉིན་རེ་བཞིན་རང་རྒྱུད་ཡར་རྒྱས་གཏོང་ཐབས་བྱེད་དགོས། རེ་བ་ཧ་ཅང་ཆེན་པོ་བྱ་རྒྱུ་དང་སེམས་ཤུགས་ཧ་ཅང་ཆགས་པ་དེ་འདྲ་བྱ་རྒྱུ་མེད། མུ་མཐུད་ནས་འབད་བརྩོན་བྱས་ན་ཡར་རྒྱས་འགྲོ་ངེས་རེད། ཅེས་བཀའ་སློབ་སྩལ།
ཉིན་གུང་ལྗགས་སྨིན་གྲུབ་བསྟུན་ཇར་མན་ཡུལ་གྱི་གསར་འགོད་པ་གྲགས་ཅན་ཁག་གཅིག་ལ་མཇལ་ཁ་དང་བཀའ་སློབ་སྩལ། སྐབས་དེར་༸གོང་ས་མཆོག་གིས་དེང་དུས་འཕྲུལ་རིག་ཡར་རྒྱས་ཧ་ཅང་འགྲོ་བཞིན་པ་དེ་དག་འགྲོ་བ་མིའི་བདེ་དོན་ལ་ཉེ་བར་མཁོ་བ་ཆགས་ཡོད། འོན་ཀྱང་འཕྲུལ་ཆས་དེ་དག་མིའི་དགོས་དོན་སྒྲུབ་ཆེད་དུ་བཀོལ་སྤྱོད་བྱེད་དགོས་པ་ལས་མི་རྣམས་འཕྲུལ་ཆས་ཀྱི་བྲན་གཡོག་ཏུ་ཕྱིན་པ་ཡིན་ན་མ་འགྲིག་པ་རེད། དེང་སྐབས་མི་རྣམས་འཚེ་བས་ར་བཟི་བ་ལྟ་བུ་ཆགས་ཏེ་རྙོག་གྲ་ཚང་མ་དྲག་པོའི་ལམ་ནས་སེལ་ཐུབ་ཀྱི་རེད་བསམས་པའི་རེ་བ་འཆང་བཞིན་ཡོད། འོན་ཀྱང་ངོས་ཀྱིས་དམག་མི་ཚོར་སེམས་ཀྱི་གཏིང་ནས་དཀའ་ངལ་ཚང་མ་དམག་འཁྲུག་ཐོག་ནས་སེལ་ཐུབ་ཀྱི་རེད། བསམ་པའི་ཡིད་ཆེས་ཇི་ཙམ་ཡོད། ཅེས་དྲི་བ་འདོན་རྒྱུ་ཡིན།
འཚེ་བའི་ལས་ལ་བརྟེན་ནས་དཀའ་ངལ་སེལ་ཟེར་བ་ཧ་ཅང་དཀའ་ལས་ཁག་པོ་རེད། དེ་ནི་ང་ཚོས་འདས་པའི་བྱུང་རབས་ལོ་རྒྱུས་ནས་ཤེས་རྟོགས་ཐུབ། དེར་བརྟེན་ལོ་རྒྱུས་ཐོག་ནོར་འཕྲུལ་ཕྱིན་པ་དེ་དག་བསྐྱར་ལོག་བྱེད་མི་རུང་། གོ་ལ་གཅིག་རྒྱུར་གྱི་ལམ་ལུགས་ནང་འཚོ་བཞིན་པའི་མིའི་བསམ་བློའི་འདུ་ཤེས་ནང་ང་ཚོ་ཚང་མ་འགྲོ་བ་མི་རིགས་གཅིག་རྒྱུར་གྱི་འདུ་ཤེས་འཛིན་དགོས་པ་ལས་ངའི་ཚོགས་པ་ཟེར་བ་དང་། ངའི་རྒྱལ་ཁབ་ཅེས་ཚོགས་པ་བྱེ་བྲག་པ་དང་རྒྱལ་ཁབ་བྱེ་བྲག་པའི་བདེ་དོན་ཁོ་ནར་བསམ་བློ་མ་གཏོགས་བཏང་མ་ཐུབ་ན་ཕན་ཐོགས་མེད། དེ་ལྟར་མིན་པར་ང་ཚོ་ཚང་མ་གཅིག་རྒྱུར་ཐོག་ནས་འགྲོ་བ་མི་རིགས་སྤྱི་ཡོངས་ཀྱི་བདེ་དོན་ལ་བསམ་བློ་གཏོང་ཐུབ་པ་བྱེད་དགོས། ཞེས་སོགས་ཀྱི་བཀའ་སློབ་སྩལ།
དེ་རྗེས་དྲི་བ་དྲིས་ལན་སྐབས་༸གོང་ས་མཆོག་གིས་བོད་ཀྱི་གནད་དོན་ཐོག་བཀའ་ལན་སྩལ་དོན། བོད་ཀྱི་གནད་དོན་ལ་མཚོན་ན། རྒྱ་ནག་གཞུང་གིས་བོད་ཀྱི་རིག་གཞུང་ཕྱུག་པོ་ཡོད་པ་དེ་དག་ལ་ཆེད་མངགས་ཁྱད་གསོད་བྱས་ནས་མི་ཉམས་རྒྱུན་འཛིན་དང་ཉམས་པ་གསོར་ཆུད་བྱེད་འཇུག་གི་མེད། རྒྱ་རིགས་ཚོས་རང་གི་སྐད་ཡིག་རིག་གཞུང་སོགས་ལ་ཧ་ཅང་བརྩི་པོ་ཡོད་པ་ལྟར། བོད་རིགས་ཚོ་ལའང་དེ་ལྟར་ཡོད། རྒྱ་ནག་གཞུང་གིས་བོད་མིའི་ཐུན་མིན་རིག་གཞུང་ལ་གུས་བརྩི་དང་བདག་སྲུང་ཚད་དང་ལྡན་པ་ཞིག་བྱེད་མ་ཐུབ་པར་བརྟེན་དཀའ་ངལ་འཕྲད་བཞིན་ཡོད། ཅེས་བཀའ་ལན་སྩལ། དེ་རྗེས་གསར་འགོད་པ་གཅིག་གིས་ཕྱི་རྒྱལ་གཞུང་འཛིན་པ་ཚོས་བོད་དོན་ལ་རྒྱབ་སྐྱོར་ཇི་ལྟར་བྱེད་ཐུབ་བམ། ཞེས་པའི་དྲི་བར་བཀའ་ལན་སྩལ་དོན། འདི་བྱེད་འདི་མིན་གྱི་ཚིག་ཐག་ཆོད་པོ་ཞིག་བརྗོད་རྒྱུ་ཁག་པོ་རེད། འོན་ཀྱང་དེང་སྐབས་བོད་དོན་ལ་རྒྱབ་སྐྱོར་ཧ་ཅང་ཚད་མཐོ་པོ་ཡོད།
ཉེ་ལམ་ཇར་མན་སྲིད་འཛིན་ལྕམ་སྐུ་ཨེན་ཇི་ལ་མར་ཀེལ་ Angela Merkel མཆོག་གིས་རྒྱ་ནག་ཆིང་ཧའོ་གཙུག་ལག་སློབ་གྲྭའི་ Tsinghua University ནང་གསུང་བཤད་གནང་སྐབས། འགྲོ་བ་མིའི་ཐོབ་ཐང་ལ་བརྩི་བཀུར་བྱེད་དགོས་པ་གསུངས་པ་དེར་ངོས་ཀྱིས་བསྔགས་བརྗོད་ཞུ་རྒྱུ་ཡིན། རྒྱ་ནག་མི་དམངས་ཐེར་འབུམ་གཅིག་ལྷག་ཡོད་པ་རྣམས་ལ་དངོས་ཡོད་གནས་ཚུལ་གང་ཡིན་ཤེས་རྒྱུའི་ཐོབ་ཐང་ཆ་ཚང་ཡོད་པ་མ་ཟད། གལ་ཏེ་རྒྱ་ནག་མི་དམངས་ཚོས་དངོས་ཡོད་གནས་ཚུལ་ཤེས་པ་ཡིན་ན། བཟང་ངན་གྱི་དབྱེ་བ་འབྱེད་རྒྱུའི་རྣམ་དཔྱོད་ཀྱི་ནུས་པ་ཆ་ཚང་རྒྱ་ནག་མི་དམངས་ཚོར་ཡོད། རྒྱ་ནག་གཞུང་གིས་དམ་བསྒྲགས་ཤུགས་ཆེ་བྱས་ནས་མི་དམངས་རྣམས་རྨོངས་མུན་ནང་འཇུག་བཞིན་པ་འདི་ནི་མང་ཚོགས་བསླུ་བྲིད་བྱས་པ་ཞིག་ཆགས་ཡོད། དེ་ནི་བཟང་སྤྱོད་ལས་འགལ་བ་ཞིག་ཡིན་པ་མ་ཟད། ཕན་ཐོགས་གང་ཡང་མེད། ཅེས་བཀའ་ལན་སྩལ་ཡོད།།
