༢༠༡༤ ཟླ་ ༨ ཚེས་ ༡ རེས་གཟའ་པ་སངས།
༄༅། །ཕྱི་ལོ་ ༢༠༡༤ ལོ་འཁོར་འདི་བཞིན་བོད་མིའི་སྒྲིག་འཛུགས་བཀའ་ཤག་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དྲིན་རྗེས་དྲན་ལོར་སྲུང་བརྩི་ཞུ་རྒྱུའི་གཏན་འབེབས་ཞུས་ཡོད་པ་ལྟར། ཕྱི་ལོ་ ༢༠༡༤ ཟླ་ ༧ ཚེས་ ༣༡ དང་བོད་ཟླ་ ༦ ཚེས་ ༤ ཉིན་ཏེ་ཆོས་འཁོར་དུས་ཆེན་དང་སྟབས་བསྟུན་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་གཞིས་ཆགས་སུ་རྟེན་གཞི་བྱས་པའི་དཔལ་ལྡན་འབྲས་སྤུངས་སྒོ་མང་གྲྭ་ཚང་དུ་གྲྭ་ཚང་གི་མཁན་ཟུར་རིན་པོ་ཆེ་མཆོག་དབུ་བཞུགས་ཐོག་ནང་ཆོས་དང་ཚན་རིག་དབར་བགྲོ་གླེང་ཞིག་སྐོང་ཚོགས་གནང་འདུག
དེ་ཡང་བགྲོ་གླེང་སྐོང་ཚོགས་གནང་དགོས་པའི་དམིགས་ཡུལ་གཙོ་བོ་ནི། ༸གོང་ས་༸སྐྱབས་མགོན་ཆེན་པོ་མཆོག་གིས་འཛམ་གླིང་འདིའི་ནང་ཆོས་ལུགས་མཐུན་སྒྲིལ་དང་། ལྷག་པར་འཛམ་གླིང་གི་སྣོད་བཅུད་ཀུན་ལ་ཕན་བདེ་སྒྲུབ་སླད་ནང་ཆོས་དང་ཚན་རིག་དབར་འབྲེལ་ལམ་གསར་གཏོད་མཛད་པ་སོགས་ཀྱི་རླབས་ཆེན་གྱི་མཛད་རྗེས་ཁག་ལ་བཀའ་དྲིན་རྗེས་དྲན་མཚོན་ཆེད་ཡིན་འདུག ཐེངས་འདིའི་བགྲོ་གླེང་ཐོག་མཁན་བླ༌སྤྲུལ་དགེ་བཤེས་རྣམ་པས་གཙོས་ཕར་ཕྱིན་འཛིན་གྲྭ་ཡན་གྱི་སློབ་གཉེར་གནང་མཁན་དགེ་འདུན་པ་རྣམས་དང་། དེ་བཞིན་ཚན་རིག་སློབ་གཉེར་གནང་མཁན་དགེ་འདུན་པ་སོགས་ཀྱི་དབར་བགྲོ་གླེང་གནང་འདུག
སྤྱིར་བཏང་ཆོས་འཁོར་དུས་ཆེན་ཞེས་པ་ནི། བདག་ཅག་གི་སྟོན་པ་ཤཱཀྱ་ཐུབ་པས་བཀའ་དང་པོ་བདེན་བཞིའི་ཆོས་ཀྱི་འཁོར་ལོ་སྐོར་གནང་མཛད་པའི་དུས་ཆེན་ཁྱད་འཕགས་ཅན་ཞིན་ཡིན། དེ་ཡང་བདག་ཅག་གི་སྟོན་པ་མཉམ་མེད་ཐུབ་པའི་དབང་པོ་རྡོ་རྗེ་གདན་དུ་མངོན་པར་སངས་རྒྱས་ནའང་། ཆོས་ཀྱི་འཁོར་ལོ་བསྐོར་བའི་དུས་ལ་མ་བབས་པས་རེ་ཞིག་མི་སྨྲ་ནགས་སུ་བཞུགས་པའི་ཚེ། ལྷའི་དབང་པོ་བརྒྱ་བྱིན་དང་ཚངས་པས་གསེར་གྱི་འཁོར་ལོ་རྩིབས་སྟོང་འབར་བ་དང་། ཆོས་དུང་དཀར་པོ་གཡས་སུ་འཁྱིལ་བ་ཕུལ་ཏེ། ཆོས་འཁོར་བསྐོར་བར་བསྐུལ་བའི་གསོལ་བ་བཏབ་པ་ན། བོད་ཟླ་དྲུག་པའི་ཚེས་བཞི་ཉིན་དུས་ལ་བབས་པར་གཟིགས་ནས། ཡུལ་ཝཱ་རཱ་ཎ་སིའི་དྲང་སྲོང་ལྷུང་བ་རི་དྭགས་ཀྱི་ནགས་སུ་ཕེབས་ཏེ། འཁོར་ལྔ་སྡེ་བཟང་པོར་བཀའ་དང་པོ་བདེན་བཞིའི་ཆོས་ཀྱི་འཁོར་ལོ་ཐོག་མར་སྐོར་གནང་མཛད་པ་སོགས་ཀྱི་དུས་ཆེན་ཁྱད་པར་ཅན་ཞིག་ཡིན་འདུག
