༢༠༡༤ ཟླ་ ༧ ཚེས་ ༢༡ རེས་གཟའ་ཟླ་བ།
༄༅། །ཕྱི་ལོ་ ༢༠༡༤ ཟླ་ ༧ ཚེས་ ༢༡ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཟངས་དཀར་དང་ལ་དྭགས་སུ་དཔལ་དུས་ཀྱི་འཁོར་ལོའི་དབང་ཆེན། ལྡི་ལིར་གནད་ཡོད་མི་སྣ་དང་དད་ལྡན་པ་ཁག་གཅིག་ལ་མཇལ་ཁ་སོགས་ཀྱི་མཛད་འཕྲིན་ཁག་ཡོངས་སུ་ལེགས་པར་གྲུབ་སྟེ་རྡ་སར་༸ཞབས་སོར་བདེ་བར་འཁོད་ཡོད། དེ་ཡང་༸གོང་ས་མཆོག་གིས་དཔལ་དུས་ཀྱི་འཁོར་ལོའི་དབང་ཆེན་མ་སྩལ་སྔོན་ཕྱི་ཟླ་ ༦ ཚེས་ ༢༣།༢༤ ཉིན་ཟངས་དཀར་དཔའ་འདུམ་གྱི་ས་གནས་མང་ཚོགས་ལ་ལམ་རིམ་བསྡུས་དོན་གྱི་ཆོས་འབྲེལ་དང་། ཕྱི་ཚེས་ ༢༥ ཉིན་སྤྱན་རས་གཟིགས་འཇིག་རྟེན་དབང་ཕྱུག་གི་བཀའ་དབང་། ཕྱེད་ཡོལ་ཟངས་དཀར་ཁུལ་དཔའ་འདུམ་གནས་ཀྱི་ (Model Public School)ཞེས་པའི་སློབ་གྲྭའི་ནང་ཟངས་དཀར་ཁུལ་གྱི་ས་གནས་མང་ཚོགས་ལ་ཆོས་ལུགས་མཐུན་སྒྲིལ་སྐོར་གྱི་བཀའ་སློབ་སྩལ།
དེ་ནས་ཕྱི་ཚེས་ ༢༩ ཉིན་མགོན་པོ་གང་ཉིད་མཆོག་གིས་ལ་དྭགས་སླེ་ཇོ་ཁང་དང་བ་ཀུ་ལ་དྲན་རྟེན་གླིང་ག དཔེ་ཐུབ་དགོན་པ་བཅས་སུ་གནས་གཟིགས་དང་། བ་ཀུ་ལའི་དྲན་རྟེན་སྐུ་བརྙན་དང་རྡོ་རྗེ་འཇིགས་བྱེད་ཀྱི་སྐུ་བརྙན་གསར་བཞེངས་ལ་རབ་གནས། དེ་བཞིན་མི་མང་ལ་ལམ་སྟོན་བཀའ་སློབ་སྩལ། ཕྱེད་ཡོལ་ཆུ་ཚོད་ ༢།༣༠ ཐོག་ཀླུ་འཁྱིལ་དགོན་པར་གསར་དུ་བཞེངས་པའི་ཕོ་བྲང་ལ་རབ་གནས་དང་དབུ་འབྱེད་མཛད། ཕྱི་ཚེས་ ༣༠ ཉིན་ཆོས་ལུགས་རིས་མེད་ཀྱི་མཁས་དབང་འདུ་འཛོམས་ཀྱིས་ཕར་ཕྱིན་མཁས་པའི་བགྲོ་གླེང་དུ་དབུ་བཞུགས་མཛད། ཕྱི་ཟླ་ ༧ ཚེས་ ༡ ཉིན་༸གོང་ས་མཆོག་གིས་སེར་སྐྱ་མང་ཚོགས་ལ་ཤེས་རབ་སྙིང་པོའི་ཆོས་འབྲེལ་དང་མངའ་རིས་ཚང་དགོན་ཁག་བདུན་གྱི་དགེ་འདུན་འདུས་དམངས་དང་སེར་སྐྱ་ཐུན་མོང་ནས་མགོན་པོ་གང་ཉིད་མཆོག་ལ་བརྟན་བཞུགས་སྟབས་བདེ་ཞིག་འདེགས་འབུལ་ཞུས། ཕྱི་ཚེས་ ༣ ནས་བཟུང་༸གོང་ས་༸སྐྱབས་མགོན་ཆེན་པོ་མཆོག་གིས་དད་ལྡན་སྐྱ་སེར་མི་དམངས་འབུམ་ཕྲག་བརྒལ་བར་དཔལ་དུས་ཀྱི་འཁོར་ལོའི་དབང་ཆེན་དབུ་འཛུགས་དང་། དེ་ཉིན་ལ་དྭགས་བསོད་ནམས་གླིང་གཞིས་སྒར་གྱི་ཚོགས་ཁང་གསར་པ་དབུ་འབྱེད་དང་། དེ་རྗེས་ལ་དྭགས་བོད་ཕྲུག་ཁྱིམ་སྡེའི་སློབ་གྲྭའི་རྩེད་ཐང་དུ་ཆིབས་སྒྱུར་བསྐྱངས་ཏེ་ལ་དྭགས་བོད་ཁྱིམ་སློབ་ཟུར་ཡོངས་ནས་སྐུའི་གཅུང་མོ་བཀའ་ཟུར་རྗེ་བཙུན་པདྨ་མཆོག་དང་ལ་དྭགས་བོད་ཁྱིམ་གྱི་དབུ་འཛིན་རྒན་བློ་བཟང་བསྟན་འཛིན་རྣམ་གཉིས་ལ་བཀའ་དྲིན་རྗེས་དྲན་དང་ཆེ་བསྟོད་ཆེད་གོ་སྒྲིག་གནང་བའི་གཟེངས་རྟགས་གསོལ་རས་སྩལ་ཏེ་དེར་འདུས་ཁྱོན་མི་གྲངས་ ༢༠༠༠ བརྒལ་བར་དམིགས་བསལ་བཀའ་སློབ་སྩལ།
ཕྱི་ཚེས་ ༡༣ ཉིན་གྱི་སྔ་དྲོ་ཆུ་ཚོད་ ༧ ཐོག་༸གོང་ས་མཆོག་གིས་ལ་དྭགས་ཞི་བའི་ཚལ་གསུང་ཆོས་རྭ་བར་དུས་འཁོར་དབང་ཆེན་ཐེངས་ ༣༣ པར་ཆེད་བཅར་ཞུས་པའི་དད་ལྡན་ཆོས་ཞུ་བ་མི་མང་ཆིག་འབུམ་བཞི་ཁྲི་བརྒལ་བར་མ་ཎི་ཡིག་དྲུག་གི་བཀའ་ལུང་དང་། སྒྲོལ་དཀར་ཡིད་བཞིན་འཁོར་ལོའི་ཚེ་དབང་སྩལ། ཕྱི་ཚེས་ ༡༥ ཉིན་མགོན་པོ་གང་ཉིད་མཆོག་གིས་ལ་དྭགས་བསོད་ནམས་གླིང་ས་གནས་ལས་ཁུངས་ཀྱི་ཉེ་འདབས་སུ་ཉེ་ཆར་གསར་དུ་བཞེངས་པའི་དཔལ་ལྡན་རུ་ཐོག་ལྷུན་གྲུབ་ཆོས་སྡིངས་གྲྭ་ཚང་རབ་གནས་དབུ་འབྱེད་དང་བཀའ་སློབ། དེ་ཉིན་གྱི་སྔ་དྲོ་ཆུ་ཚོད་ ༡༠།༣༠ ཐོག་ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ཀྱི་གྲོས་ཚོགས་སུ་བཀའ་སློབ་སྩལ། ཕྱི་ཚེས་ ༡༦ ཉིན་གྱི་སྔ་དྲོ་༸གོང་ས་མཆོག་གིས་ལ་དྭགས་ལྕོག་ལམ་སར་རྟེན་གཞི་བྱས་པའི་ལ་དྭགས་དབུས་གཞུང་ནང་པའི་རིག་གནས་མཐོ་སློབ་ཁང་དུ་ཉེ་ཆར་གསར་བཞེངས་གནང་བའི་འཁོར་ལྔ་སྡེ་བཟང་པོའི་སྐུ་བརྙན་ལ་རབ་གནས་དབུ་འབྱེད་མཛད་གྲུབ་མཚམས་མཐོ་སློབ་ཀྱི་ཚོགས་ཁང་ནང་དགེ་ལས་སློབ་ཕྲུག་སྟོང་ཕྲག་བརྒལ་བར་ལམ་སྟོན་བཀའ་སློབ་སྩལ། ཕྱི་ཚེས་ ༡༧ ཉིན་རྒྱ་གར་གྱི་རྒྱལ་ས་ལྡི་ལིར་༸ཞབས་སོར་འཁོད་དེ་ཉིན་གྲངས་གསུམ་རིང་ལྡི་ལི་ཁུལ་དུ་གནད་ཡོད་མི་སྣ་དང་དད་ལྡན་པ་ཁག་གཅིག་ལ་མཇལ་ཁ་སོགས་ཀྱི་མཛད་འཕྲིན་ཁག་གྲུབ་མཚམས།
ཕྱི་ཚེས་ ༢༡ ཉིན་ལྡི་ལི་ནས་མཁའ་ལམ་བརྒྱུད་ཕྱེད་ཡོལ་ཆུ་ཚོད་ ༡།༣༠ ཐོག་ག་གྷལ་གནམ་ཐང་དུ་༸ཞབས་སོར་འཁོད་སྐབས། བོད་མིའི་སྒྲིག་འཛུགས་ཀྱི་སྲིད་ཚབ་ཆོས་རིག་བཀའ་བློན་པདྨ་ཆོས་འབྱོར་མཆོག་དང་། བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག གཞུང་འབྲེལ་མིན་པའི་ཚོགས་པའི་སྐུ་ཚབ་བཅས་ཀྱིས་ཕེབས་བསུ་གཟབ་རྒྱས་ཞུས་ཡོད། དེ་ནས་ཆིབས་འགྲོ་བརྒྱུད་བཞུགས་སྒར་ཕོ་བྲང་དུ་༸ཞབས་སོར་འཁོད་སྐབས། ཁྲིམས་ཞིབ་པ་ཆེ་བ་ངག་དབང་འཕེལ་རྒྱལ་མཆོག་གིས་དབུས་ཁྲིམས་ཞིབ་པ་གཞན་གཉིས་དང་། དེ་བཞིན་གཞུང་ལམ་གཡས་གཡོན་དུ་དད་ལྡན་མི་མང་བརྒྱ་ཕྲག་མང་པོས་དྲི་བསང་བདུག་སྤོས་དང་དཀར་གཙང་མཇལ་དར་ཐོགས་ཏེ་ཕེབས་བསུ་གཟབ་རྒྱས་ཞུས་ཡོད་པ་བཅས།།
