༢༠༡༤ ཟླ་ ༧ ཚེས་ ༢༡ རེས་གཟའ་ཟླ་བ།
༄༅། །ཕྱི་ལོ་ ༢༠༡༤ ཟླ་ ༧ ཚེས་ ༡༨ ཉིན་བོད་མིའི་སྒྲིག་འཛུགས་ཀྱི་རྒྱ་གར་ནང་རྟེན་གཞི་བྱས་པའི་བཙན་བྱོལ་བོད་མིའི་གཞིས་ཆགས་ཁག་ནང་དབུ་མའི་ལམ་གྱི་སྲིད་བྱུས་སྐོར་གོ་རྟོགས་ལས་འགུལ་རྒྱ་སྐྱེད་གཏོང་རྒྱུའི་ལས་གཞི་དབུ་འཛུགས་གནང་ཡོད། དེ་ཡང་སྲིད་སྐྱོང་བློ་བཟང་སེང་གེ་མཆོག་གིས་གཙོས་ཕྱག་འབྲེལ་བཀའ་བློན་རྣམ་པ་དང་། ལྷན་ཁང་ཁག་གི་དྲུང་ཆེ་རྣམ་པ་བཅས་ཀྱིས་གོང་ཚེས་ཉིན་ནས་དབུ་འཛུགས་ཀྱི་ཕྱི་ལོ་ ༢༠༡༤ ཟླ་ ༨ ཟླ་མཇུག་བར་བཙན་བྱོལ་བོད་མིའི་གཞིས་ཆགས་ཁག་ནང་བོད་མིའི་སྒྲིག་འཛུགས་ཀྱི་བོད་རྒྱའི་དཀའ་ངལ་སེལ་ཆེད་བོད་རྒྱ་མི་རིགས་ཕྱོགས་གཉིས་ལ་གཉིས་སྨན་དབུ་མའི་ལམ་གྱི་སྲིད་བྱུས་རྒྱུན་འཁྱོངས་གནང་བཞིན་པ་དང་རྒྱ་སྐྱེད་གཏོང་རྒྱུའི་སྐོར་གོ་རྟོགས་སྤེལ་འགོ་བཙུགས་ཡོད། གཞན་ཡང་ཐེངས་འདིར་གོ་རྟོགས་ལས་འགུལ་སྐབས་འདིར་བཀའ་བློན་དང་དྲུང་ཆེ་རྣམ་པས་མང་ཚོགས་རྣམས་ལ་༸གོང་ས་༸སྐྱབས་མགོན་ཆེན་པོ་མཆོག་གིས་འཛམ་གླིང་ཞི་བདེ་དང་ཆོས་ལུགས་མཐུན་སྒྲིལ་གོང་སྤེལ། བོད་བརྒྱུད་ནང་བསྟན་འཛིན་སྐྱོང་སྤེལ་གསུམ་གྱི་རླབས་ཆེན་མཛད་བཟང་ལ་གཟེངས་སུ་ཐོན་པའི་གྲུབ་འབྲས་ཐོན་ཡོད་པ་རྣམས་ངོ་སྤྲོད་གནང་རྒྱུ་ཡིན་འདུག འདི་ནི་གཙོ་བོ་འདི་ལོའི་གསུམ་བཅུའི་དུས་དྲན་ཉིན་སྲིད་སྐྱོང་བློ་བཟང་སེང་གེ་མཆོག་གིས་ལོ་འདི་སྤྱི་ནོར་༸གོང་ས་༸སྐྱབས་མགོན་སྐུ་ཕྲེང་ ༡༤ ཆེན་པོ་མཆོག་ལ་བཀའ་དྲིན་རྗེས་དྲན་གྱི་ལོར་སྲུང་བརྩི་ཞུ་རྒྱུའི་བཀའ་ཤག་གི་བཞེངས་ཕྱོགས་གསལ་བསྒྲགས་གནང་ཟིན་པ་དེའི་ཆ་ཤས་ཤིག་ཡིན་འདུག དེ་ཡང་སྲིད་སྐྱོང་མཆོག་གིས་གསུང་དོན།
དབུ་མའི་ལམ་གྱི་སྲིད་བྱུས་འདི་ནི་མང་གཙོའི་ལམ་ནས་ཐག་གཅོད་བྱུང་བའི་སྲིད་བྱུས་ཤིག་ཡིན་པ་མ་ཟད། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཀྱི་དགོངས་དོན་དང་མཐུན་ཞིང་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་གི་གནས་བབ་ཐོབ་ཆེད་དངོས་ཡོད་གནས་ཚུལ་དང་མཐུན་པའི་ཐབས་ལམ་ཞིག་ཆགས་ཡོད། དེར་བརྟེན་སྲིད་བྱུས་འདིར་སྲིད་གཞུང་འདྲ་མིན་ཁག་དང་གྲོས་ཚོགས། རྒྱལ་སྤྱིའི་སྤྱི་ཚོགས་ནས་རྒྱབ་སྐྱོར་ཤུགས་ཆེ་འཐོབ་བཞིན་ཡོད་པ་མ་ཟད། ལྷག་པར་རྒྱ་རིགས་མང་ཚོགས་ཁྲོད་སྲིད་བྱུས་འདིར་ཉིན་རེ་བཞིན་རྒྱབ་སྐྱོར་ཇེ་ཤུགས་ཆེ་རུ་འགྲོ་བཞིན་ཡོད། ཅེས་གསུངས།
