༢༠༡༤ ཟླ་ ༧ ཚེས་ ༡༧ རེས་གཟའ་ཕུར་བུ།

སྐུ་ཞབས་ཇོ་པིཊ་སི་མཆོག

༄༅། །ཕྱི་ལོ་ ༢༠༡༤ ཟླ་ ༧ ཚེས་ ༡༥ ཉིན་ཨ་རིའི་མངའ་སྡེ་པེན་སེལ་ལེ་ཝེ་ནི་ཡའི་ Pennsylvania གྲོས་ཚོགས་འོག་མའི་འཐུས་མི་རྒན་གྲས་ཡིན་པ་སྐུ་ཞབས་ཇོའོ་པིཊ་སི་ Joe Pitts མཆོག་གིས་ཨ་རིའི་གྲོས་ཚོགས་ནང་བོད་དོན་དང་འབྲེལ་བའི་གནས་ཚུལ་གླེང་སློང་གནང་བ་དང་སྦྲགས། རྒྱ་ནག་གཞུང་གིས་ཨ་རི་བ་ཚོར་དམ་བསྒྲགས་གང་ཡང་མེད་པར་བོད་ཀྱི་ས་ཁུལ་ཁག་ཏུ་འགྲོ་སྐྱོད་བྱ་རྒྱུའི་རང་དབང་སྤྲོད་དགོས་པའི་རེ་འདུན་ཤུགས་ཆེ་བཏོན་འདུག དེ་ཡང་སྐུ་ཞབས་ཀོའི་པིཊ་སི་མཆོག་ནི་ཐེངས་འདིར་ཨ་རིའི་གྲོས་ཚོགས་འོག་མའི་ནང་གྲོས་ཚོགས་འཐུས་མི་ཁག་གཅིག་གིས་ཨར་རྒྱ་གཉིས་དབར་གོ་སྐབས་འདྲ་མཉམ་བརྗེ་ལེན་བྱེད་དགོས་པའི་གྲོས་འཆར་ Reciprocal Access to Tibet Act of 2014 འདོན་མཁན་གྲས་ཤིག་ཡིན་འདུག དེ་ཡང་ཁོང་གིས་སྐབས་དེར་གསུང་དོན། རྒྱ་དམར་གྱིས་ལོ་ངོ་བཅུ་ཕྲག་ལྔ་ལྷག་རིང་བོད་དེ་གདུག་རྩུབ་འོག་དབང་སྒྱུར་བྱས་པ་མ་ཟད། བོད་མི་རྣམས་ལ་མཐོང་ཆུང་ཁྱད་གསོད་བྱེད་བཞིན་ཡོད།

ད་ལྟའི་རྒྱ་གཞུང་གི་དཔོན་རིགས་ཚོས་བོད་ནང་དམ་བསྒྲགས་གང་ཡང་མེད་པའི་ཐོག་ནས་འགྲོ་བསྐྱོད་ཆོག་གི་ཡོད་སྐོར་རྗོད་བཞིན་ཡོད། འོན་ཀྱང་དངོས་ཡོད་གནས་སྟངས་ནི་དེ་ལས་ལྡོག་སྟེ་རྒྱ་ནག་གཞུང་གིས་བོད་ནང་དུ་རང་སྣང་གང་དྲན་ཐོག་བོད་ཀྱི་ས་ཁུལ་ཁག་ནང་དམ་བསྒྲགས་བྱེད་བཞིན་ཡོད་པར་བརྟེན། ཡུལ་སྐོར་སྤྲོ་འཆམ་པ་ཚོ་བོད་ཀྱི་ས་ཁུལ་ཁག་ཏུ་བསྐྱོད་རྒྱུར་དཀའ་ངལ་ཧ་ཅང་འཕྲད་བཞིན་ཡོད། ལྷག་པར་གསར་འགོད་པ་དང་གཞུང་འབྲེལ་མི་སྣ་ཚོར་བོད་ནང་བསྐྱོད་དེ་བོད་ཀྱི་དངོས་ཡོད་གནས་སྟངས་རྟོག་ཞིབ་བྱ་ཐབས་བྲལ་བའི་གནས་སྟངས་ཤིག་ཆགས་ཡོད། ཅེས་གསུངས།
གཞི་རྩའི་ཨར་རྒྱ་གཉིས་གོ་སྐབས་འདྲ་མཉམ་བརྗེ་ལེན་བྱེད་དགོས་པའི་གྲོས་འཆར་ The Reciprocal Access to Tibet Act of 2014 འདི་ཐོག་མར་གྲོས་ཚོགས་འོག་མའི་འཐུས་མི་སྐུ་ཞབས་ཇིམ་མེཀ་གོ་ཝན་ Jim McGovern མཆོག་གིས་བཏོན་གནང་བར་སྐུ་ཞབས་ཇོའི་པིཊ་སི་མཆོག་གིས་རྒྱབ་སྐྱོར་གནང་ཡོད། དེ་ཡང་གྲོས་འཆར་ལྟར་ན། བོད་ཀྱི་ས་ཁུལ་ཁག་ཏུ་ཨ་རིའི་མང་ཚོགས་དང་གཞུང་འབྲེལ་ལས་བྱེད་མི་སྣ། གསར་འགོད་པ་སོགས་དམ་བསྒྲགས་གང་ཡང་མེད་པར་འགྲོ་བསྐྱོད་བྱེད་བཅུག་དགོས་པའི་རེ་འདུན་བཏོན་པ་མ་ཟད། རྒྱ་མིའི་ལས་བྱེད་སུ་རུང་གིས་ཨ་རི་བ་བོད་ནང་འགྲོ་བསྐྱོད་ལ་དམ་བསྒྲགས་བྱས་ཚེ་གང་ཟག་དེ་ཉིད་ཨ་རིར་བསྐྱོད་སྐབས་ཁོའི་འགྲོ་བསྐྱོད་ལ་ཨ་རིའི་གཞུང་གིས་དམ་བསྒྲགས་བྱེད་དགོས་པའི་རེ་འདུན་བཏོན་འདུག

དེ་ཡང་སྐུ་ཞབས་ཀོའི་པིཊ་སི་མཆོག་གིས་མུ་མཐུད་གསུང་དོན། རྒྱ་ནག་གི་ལས་བྱེད་བྱེ་བྲག་པ་སུ་རུང་ཞིག་ལ་ཨ་རིས་མཐོང་མཆན་སྤྲོད་སྐབས་ཨ་རིའི་ས་ཁུལ་གང་དུ་བསྐྱོད་ཀྱང་རང་དབང་ཆ་ཚང་ཡོད་པ་ལས་མངའ་སྡེ་དང་གྲོང་ཁྱེར་བྱེ་བྲག་པ་ཞིག་ལ་འགྲོ་ཆོག་མིན་གྱི་དམ་བསྒྲགས་དེ་འདྲ་རྩ་བ་ནས་བྱེད་ཀྱི་མེད། གོ་སྐབས་དེ་རྒྱ་རིགས་ཡུལ་སྐོར་སྤྲོ་འཆམ་པ་དང་གསར་འགོད་པ་ཚང་མར་འདྲ་མཉམ་ཐོག་ནས་སྤྲོད་བཞིན་ཡོད། དེར་བརྟེན་ད་ཆ་རྒྱ་ནག་གཞུང་ནས་ཀྱང་ཨ་རི་བ་ཙམ་མིན་པར་འཛམ་གླིང་ས་ཕྱོགས་གང་ས་ནས་བོད་དུ་ཡུལ་སྐོར་སྤྲོ་འཆམ་དང་། གནས་མཇལ་སོགས་ལ་འགྲོ་བསྐྱོད་ཀྱི་རང་དབང་སྤྲོད་དགོས་པའི་དུས་ལ་བབ་ཡོད། འདི་ནི་ཨར་རྒྱ་ཕན་ཚུན་ཕྱོགས་གཉིས་ཀར་དྲང་བདེན་ཐོག་ཐོབ་ཐང་བརྗེ་ལེན་བྱེད་པ་ཞིག་ཡིན་པ་མ་ཟད། བོད་ནང་དུ་བོད་མི་ཚོའི་འགྲོ་བ་མིའི་ཐོབ་ཐང་སྲུང་སྐྱོབ་བྱ་རྒྱུ་ཧ་ཅང་གལ་ཆེ་ཆགས་ཡོད། ཅེས་གསུངས།།