༢༠༡༤ ཟླ་ ༧ ཚེས་ ༡༦ རེས་གཟའ་ལྷག་པ།
༄༅། །འདི་གར་ན་སིག་བོད་མི་སུད་ཚོང་མཐུན་ཚོགས་ཀྱིས་བཏང་གནས་ནང་འཁོད་དོན། ཕྱི་ལོ་ ༢༠༡༤ ཟླ་ ༧ ཚེས་ ༦ ཉིན་རྒྱ་གར་མཱ་ཧཱ་ར་ཤི་ཊིའི་མངའ་སྡེའི་ན་སིག་གྲོང་ཁྱེར་ནང་ཡོད་པའི་ན་སིག་བོད་མིའི་བདེ་དོན་མཐུན་ཚོགས་ཀྱིས་༸གོང་ས་མཆོག་གི་སྐུའི་འཁྲུངས་སྐར་དུས་ཆེན་གཟབ་རྒྱས་ངང་སྲུང་བརྩི་ཞུས་འདུག
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༧ ཐོག་མི་མང་རྣམས་ས་གནས་སྤྱི་མཐུན་ཚོགས་པའི་ལས་ཁུངས་ཀྱི་མདུན་ཐང་དུ་ཚང་འཛོམས་ཀྱིས་རིམ་བཞིན་༸གོང་ས་མཆོག་གི་སྐུ་པར་མཐོང་གྲོལ་རིན་པོ་ཆེར་མཇལ་དར་སྒྲོན་འབུལ་དང་། དེ་ནས་མི་མང་རྣམས་ཀྱིས་རྒྱལ་བའི་ཞབས་བརྟན། སྒྲོལ་མ། བདེན་ཚིག་སྨོན་ལམ། དཀར་ཕྱོགས་སྐྱོང་བའི་ལྷ་སྲུང་རྣམས་ལ་འཕྲིན་བསྐུལ་གྱིས་མཚོན་བསང་གསོལ་གཟབ་རྒྱས་ཞུས་ཡོད། དེ་ནས་ཆུ་ཚོད་ ༡༠ ཐོག་ས་གནས་སྐུ་མགྲོན་སྐུ་ཞབས་ཝི་ཀེ་སང་ག་རམ་ཀམ་ལེ་ལགས་དང་། ལྕམ་སྐུ་ཨུ་ཤ་ཏ་ཡེ་ལགས། ལྕམ་སྐུ་ཤི་ལ་ཏ་ཡི་ལགས། སྐུ་ཞབས་སུ་རེ་ཤི་ཅན་དྷ་ར་ཨ་ནན་རའོ་ལགས། ཝ་ས་ལ་ཇ་ཌོ་ལགས་བཅས་གདན་ཞུས་གནང་། དེ་ནས་ཚོགས་གཞོན་ཀརྨ་ཆོས་འཕེལ་ལགས་ཀྱིས་སྐུ་མགྲོན་རྣམས་ལ་འཚམས་འདྲིའི་གསུང་བཤད་གནང་གྲུབ་མཚམས། མཛད་སྒོར་ཕེབས་པའི་སྐུ་མགྲོན་དང་ན་སིག་ནང་པ་རྣམས་ལ་མངར་ཟས་ཕུལ། དེ་རྗེས་ཚོགས་གཙོ་རྣམ་རྒྱལ་ལགས་ཀྱིས་སྐུའི་འཁྲུངས་སྐར་དུས་ཆེན་གྱི་ངོ་སྤྲོད་གསུང་བཤད་གནང་། དེ་ནས་བོད་ཀྱི་གཞས་སྣ་ཁག་གཅིག་འཁྲབ་སྟོན་གྲུབ་རྗེས་ཚོགས་གཞོན་ཀརྨ་ཆོས་འཕེལ་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་སྟེ་མཛད་སྒོ་གྲོལ། ཐེངས་འདིའི་འཁྲུངས་སྐར་སྲུང་བརྩིའི་སྐོར་ཕྱི་ཚེས་ ༧ ཉིན་ན་སིག་གི་གྲོང་གསེབ་དང་གྲོང་ཁྱེར་ཁག་གི་བརྙན་འཕྲིན་ཐོག་བསྟན་ཡོད་པ་མ་ཟད། དབྱིན་ཡིག་དང་། ཧིན་དི། མ་ར་ཐི་སྐད་ཡིག་ཐོག་ཡོད་པའི་ཚགས་ཤོག་ཁག་གི་ནང་འདོན་སྤེལ་གནང་ཡོད།།
