༢༠༡༤ ཟླ་ ༧ ཚེས་ ༥ རེས་གཟའ་སྤེན་པ།
༄༅། །ཕྱི་ལོ་ ༢༠༡༤ ཟླ་ ༧ ཚེས་ ༤ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལ་དྭགས་ཁུལ་དུ་དཔལ་དུས་ཀྱི་འཁོར་ལོའི་དབང་ཆེན་ཐེངས་ ༣༣ པའི་ཆོས་འབྲེལ་ཉིན་གཉིས་པའི་སྔ་དྲོ་ཆུ་ཚོད་ ༧ ཐོག་ཞི་བའི་ཚལ་གྱི་གསུང་ཆོས་རྭ་བར་ཆིབས་སྒྱུར་བསྐྱངས་ཏེ་དཀྱིལ་འཁོར་གྱི་ས་ཆོག་སོགས་ཀྱི་ཚོགས་མགོན་དུ་དབུ་བཞུགས་མཛད་འདུག་པ་དང་། ཉིན་རྒྱབ་རྣམ་རྒྱལ་གྲྭ་ཚང་ཕན་བདེ་ལེགས་བཤད་གླིང་གི་དགེ་འདུན་པ་རྣམས་ནས་དུས་དབང་གི་སྔོན་འགྲོའི་ས་ཆོག་དང་གར་འཆམ་གནང་འདུག
དེ་ཡང་ཕྱི་ཚེས་ ༣ ནས་ ༥ བར་༸གོང་ས་༸སྐྱབས་མགོ་ཆེན་པོ་མཆོག་དབུ་བཞུགས་ཐོག་རྣམ་རྒྱལ་གྲྭ་ཚང་གི་ཆོག་གྲྭ་ནས་ས་ཆོག་དང་རྡུལ་མཚོན་གྱི་དཀྱིལ་འཁོར་འབྲི་ བཞེངས་དང་། ཕྱི་ཚེས་ ༦ ཉིན་གྱི་སྔ་དྲོ་ཆུ་ཚོད་ ༨ ནས་ ༨།༤༥ བར་སྐུའི་འཁྲུངས་སྐར་དུས་ཆེན་སྲུང་བརྩིའི་མཛད་སྒོ། ཕྱི་ཚེས་ ༦ ནས་ ༨ བར་ཉིན་གསུམ་རིང་སྔ་དྲོའི་ཆུ་ཚོད་ ༨།༤༥ ནས་ཆུ་ཚོད་ ༡༡།༡༥ བར་༸གོང་ས་༸སྐྱབས་མགོན་ཆེན་པོ་མཆོག་གིས་སློབ་དཔོན་ཀླུ་སྒྲུབ་ཀྱིས་མཛད་པའི་བཤེས་སྤྲིངས་དང་། དབུ་མ་རིན་ཆེན་ཕྲེང་བའི་བཤད་ལུང་སྩལ་རྒྱུ། ཕྱི་ཚེས་ ༩ ཉིན་སྔ་དྲོ་ཆུ་ཚོད་ ༡༢།༣༠ ནས་ཉིན་རྒྱབ་ ༡།༣༠ བར་དུས་འཁོར་མཆོད་གར། ཕྱི་ཚེས་ ༡༠ ནས་ ༡༢ བར་དུས་འཁོར་དབང་ཆེན་གྱི་སྟ་གོན་དང་། དབང་དངོས་དཀྱིལ་འཁོར་དུ་ཞུགས་པ་ནས་བྱིས་པ་ལྟར་འཇུག་པའི་དབང་། གོང་མའི་ཀུན་རྫོབ་འཇིག་རྟེན་པའི་དབང་། གོང་ཆེན་རྡོ་རྗེ་སློབ་དཔོན་བདག་པོ་ཆེན་པོའི་དབང་བཅས་གོ་རིམ་བཞིན་བཀའ་དྲིན་སྩལ་རྒྱུ་ཡིན་འདུག་པ་བཅས།།
