༢༠༡༤ ཟླ་ ༦ ཚེས་ ༣ རེས་གཟའ་མིག་དམར།
༄༅། །ཕྱི་ལོ་ ༢༠༡༤ ཟླ་ ༥ ཚེས་ ༥ ནས་ཚེས་ ༢༡ བར་ལ་དྭགས་ཀྱི་རྒྱལ་ས་སླེ་རུ་ཡོད་པའི་བསོད་ནམས་གླིང་བོད་མིའི་གཞིས་ཆགས་དང་། བྱང་ཐང་ཁུལ་གསུམ་མདོ་དང་ས་སྨད། བོད་ཁྱིམ་སློབ་གྲྭ བོད་ཀྱི་སྨན་རྩིས་ཁང་གི་ཡན་ལག་སྨན་ཁང་བཅས་སུ་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ལས་བྱེད་གསུམ་དང་། འཕྲོད་བསྟེན་ལས་ཁུངས་ཁྱབ་ཁོངས་སྨན་ཁང་གི་ལས་བྱེད་གསུམ། སྤྱི་ཚོགས་འཕྲོད་བསྟེན་གྱི་ཉམས་ཞིབ་པ་གཉིས་བཅས་ཀྱིས་མི་མང་འདུ་ཚོགས་དང་མི་རེ་ངོ་རེར་མཆིན་པའི་གཉན་ཚད་ཀྱིས་གཙོས་སྤྱི་ཚོགས་འཕྲོད་བསྟེན་གྱི་ཐོག་བགྲོ་གླེང་གནང་འདུག
ལས་གཞི་འདིའི་དམིགས་ཡུལ་ནི་བོད་མིའི་གཞིས་ཆགས་ཁག་ནང་གནས་སྡོད་བོད་མི་སྤྱི་དང་། ལྷག་པར་བུད་མེད་དང་བྱིས་པ་རྣམས་ལ་འཕྲོད་བསྟེན་གྱི་དཀའ་ངལ་འཕྲད་བཞིན་ཡོད་པར་བརྟེན། སྤྱི་ཚོགས་འཕྲོད་བསྟེན་དང་འབྲེལ་བའི་གནད་དོན་ཐོག་གོ་རྟོགས་དང་གདོང་ལེན་བྱེད་ཕྱོགས་དང་། ལྷག་པར་བོད་པའི་སྤྱི་ཚོགས་ཁྲོད་མཆིན་པའི་གཉན་ཚད་ཀྱི་ནད་གཞི་འདི་ཉུང་དུ་གཏོང་རྒྱུར་དམིགས་པ་ཞིག་ཡིན་འདུག
ལ་དྭགས་བསོད་ནམས་གླིང་བོད་མིའི་གཞིས་ཆགས་ཁྱབ་ཁོངས་སུ་བོད་མི་ཁྱོན་མི་གྲངས་ ༣༢༦ གནས་སྡོད་བྱེད་བཞིན་ཡོད་པའི་ཁྲོད་ནས་བོད་མི་ ༢༩༥ ནས་མཆིན་པའི་གཉན་ཚད་དང་འབྲེལ་བའི་བགྲོ་གླེང་ཐོག་མཉམ་ཞུགས་བྱས་འདུག སྐབས་དེར་ཁོང་རྣམ་པས་མི་མང་རྣམས་ལ་མཆིན་པའི་གཉན་ཚད་ཀྱི་ནང་གཞི་དང་འབྲེལ་བའི་འཕྲོད་བསྟེན་སློབ་གསོའི་ལས་རིམ་གོ་སྒྲིག་ཞུས་པ་དང་སྦྲགས། བོད་དབྱིན་གཉིས་ཀྱི་ཐོག་ཡོད་པའི་མཆིན་པའི་གཉན་ཚད་ཀྱི་ནད་གཞིའི་སྐོར་གྱི་ཡིག་ཆ་འགྲེམས་སྤེལ་གནང་འདུག
ལས་གཞི་འདི་བཞིན་རོ་ཅེ་སི་ཊར་སྨན་གྱི་སློབ་གྲྭ་དང་ཧ་ཝ་ཡི་གཙུག་ལག་སློབ་ཁང་གཉིས་མཉམ་ལས་ཐོག་ནས་ལག་བསྟར་གནང་བ་ཞིག་ཡིན་འདུག
