༢༠༡༤ ཟླ་ ༦ ཚེས་ ༧ རེས་གཟའ་སྤེན་པ།
༄༅། །ཨི་ཊ་ལིར་རྟེན་གཞི་བྱས་པའི་འགྲོ་བ་མིའི་ཐོབ་ཐང་དང་བཟོད་བསྲན་ལྷན་ཚོགས་ནས་མཉམ་སྦྲེལ་རྒྱལ་ཚོགས་ཀྱི་ཡོངས་ཁྱབ་འགྲོ་བ་མིའི་ཐོབ་ཐང་གི་གསལ་བསྒྲགས་ནང་བྱིས་པའི་ཐོབ་ཐང་གི་དོན་ཚན་རྣམས་བོད་ཡིག་ཏུ་ཕབ་བསྒྱུར་ཞུས་ཏེ་སློབ་ཚན་ནང་འཇོག་ཐབས་གནང་བཞིན་ཡོད་འདུག དེ་ཡང་ཕྱི་ལོ་ ༢༠༡༤ ཟླ་ ༦ ཚེས་ ༧ ཉིན་གྱི་ཕྱེད་ཡོལ་ཆུ་ཚོད་ ༡།༣༠ ཐོག་ལྷན་ཚོགས་དེའི་སྐུ་ཚབ་ཁག་གཅིག་རྡ་སར་ཆེད་ཕེབས་ཀྱིས་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་མཇལ་འཕྲད་གྲུབ་མཚམས་བཀའ་ཤག་གི་མདུན་ཐང་དུ་ལྷན་ཚོགས་ཀྱི་འགན་འཛིན་ལྕམ་སྐུ་ (Fiorella) ལགས་ཀྱིས་ལས་འགུལ་དེའི་སྐོར་གསར་འགོད་པ་ཚོར་འགྲེལ་བརྗོད་གནང་དོན།
ང་ཚོའི་ལས་འགུལ་གཙོ་བོ་དེ་གཞོན་སྐྱེས་ཚོའི་ཆེད་དུ་དམིགས་པ་ཞིག་ཆགས་ཡོད། འགྲོ་བ་མིའི་ཐོབ་ཐང་གི་ཡོངས་ཁྱབ་གསལ་བསྒྲགས་ཀྱི་བྱིས་པའི་ཐོབ་ཐང་དོན་ཚན་ ༣༠ ཡོད་པ་རྣམ་སྤྱི་ཚོགས་ནང་སློབ་སྦྱོང་གང་ཐུབ་སྤྲོད་ཐབས་ཀྱི་འབད་བརྩོན་བྱ་རྒྱུ་ཡིན། ལས་འགུལ་དེ་ཚགས་ཚུད་ཡོང་སླད་བོད་ཡིག་ནང་ཆ་ཚང་བསྒྱུར་ཏེ་དེབ་ཆུང་ཞིག་འདྲ་པར་དང་བཅས་པར་སྐྲུན་ཞུས་ཡོད། སྤྱིར་ང་ཚོའི་ཚོགས་པས་ལོ་ལྟར་འགྲོ་བ་མིའི་ཐོབ་ཐང་དང་ཁོར་ཡུག་སྲུང་སྐྱོབ། དེ་བཞིན་འཚེ་མེད་ཞི་བ་དང་བཟོད་བསྲན་གོང་མཐོར་གཏོང་བའི་ལས་གཞི་སོགས་སྤྱི་ཚོགས་ལ་སྨིན་པའི་ལས་དོན་ཕུལ་བྱུང་སྒྲུབ་མཁན་འདེམས་སྒྲུག་གིས་གཟེངས་རྟགས་གནང་སྲོལ་ཡོད་པ་ལྟར། ཕྱི་ལོ་ ༢༠༡༠ ལོར་ཚོགས་པས་སྐུའི་གཅེན་མོ་ཨ་མ་རྗེ་བཙུན་པདྨ་མཆོག་ལ་གཟེངས་རྟགས་ཕུལ་དེ་ཡོད། སྐབས་དེར་བཀའ་ཟུར་རྗེ་བཙུན་པདྨ་མཆོག་གིས་བྱིས་པའི་ཐོབ་ཐང་གི་དོན་ཚན་ ༣༠ ཡོད་པ་རྣམས་འཛམ་གླིང་གི་སྐད་རིགས་ ༡༨ འདུག་ཀྱང་བོད་ཡིག་ནང་མི་འདུག་པས། བོད་ཡིག་ནང་ཕབ་བསྒྱུར་གནང་ཐུབ་ན་དགེ་མཚན་ཡོང་རྒྱུ་ཡིན་སྐོར་བསམ་འཆར་བཏོན་གནང་བ་ལྟར། ང་ཚོའི་ཚོགས་པའི་ངོས་ནས་འགན་ཁུར་བླངས་ཏེ་བོད་ཡིག་ནང་ཕབ་བསྒྱུར་ཞུས་ཏེ་ལས་འགུལ་སྤེལ་བཞིན་ཡོད། ད་ལྟའི་ཆར་སྐད་ཡིག་ ༡༩ ནང་ཕབ་སྒྱུར་ཞུས་ཡོད། ཅེས་གསུངས། དེ་བཞིན་བོད་ཕྲུག་ཁྱིམ་སྡེའི་འགན་འཛིན་ཚེ་དབང་ཡེ་ཤེས་ལགས་སོགས་འབྲེལ་ཡོད་མི་སྣ་ཁག་དང་ཐུག་འཕྲད་ཀྱིས་བོད་བསྒྱུར་གནང་བའི་བྱིས་པའི་ཐོབ་ཐང་གི་དོན་ཚན་ཁག་སློབ་གྲྭའི་སློབ་ཚན་དུ་འཇོག་ཐབས་ཐོག་གོ་བསྡུར་ལྷུག་པོ་གནང་འདུག་པ་བཅས། །
