༢༠༡༤ ཟླ་ ༦ ཚེས་ ༢ རེས་གཟའ་ཟླ་བ།
༄༅། །ཕྱི་ལོ་ ༢༠༡༤ ཟླ་ ༦ ཚེས་ ༢ ཉིན་རྡ་ས་བཞུགས་སྒར་བོད་ཀྱི་སྨན་རྩིས་ཁང་གི་མཐོ་སློབ་ཚོགས་ཁང་དུ་དབུས་སྨན་རྩིས་མཐོ་སློབ་ཁང་དབུ་བརྙེས་ནས་མི་ལོ་ ༥༣ འཁོར་བའི་རིག་གཞུང་སྲུང་བརྩིའི་དུས་དྲན་མཛད་སྒོ་ཚོགས་སོང། དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༠།༢༠ ཐོག་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་འཕྲོད་བསྟེན་བཀའ་བློན་ཚེ་རིང་དབང་ཕྱུག་མཆོག་གིས་དབུས་དམིགས་བསལ་སྐུ་མགྲོན་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་དང་སྐུའི་བླ་སྨན་ཞབས་ཞུ་བ་རྣམ་པ། བོད་མི་མང་སྤྱི་འཐུས་ཀྱི་སྐུ་ཚབ་སྤྱི་འཐུས་ཟླ་བ་ཚེ་རིང་ལགས། འཕྲོད་བསྟེན་དྲུང་ཆེ་ཤོ་ཟུར་བསོད་ནམས་ཆོས་འཕེལ་ལགས། གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ། སྨན་རྩིས་ཁང་གི་འགན་འཛིན་གྱིས་གཙོས་ལས་བྱེད་དང་སློབ་མ་བཅས་མི་གྲངས་ ༡༢༠ བརྒལ་བ་སྨན་རྩིས་ཁང་གི་ཚོགས་ཁང་ནང་ལྷན་འཛོམས་ཐོག་གཡུ་ཐོག་གསོལ་འདེབས་གསུང་འདོན་དང་འབྲེལ་གསོལ་ཇ་འབྲས་སིལ་ཕུལ་ཡོད།
དེ་ནས་དམིགས་བསལ་སྐུ་མགྲོན་མཆོག་དང་སྐུ་མགྲོན་གཙོ་བོ་མཆོག་རྣམས་གཉིས་ཀྱིས་སྣང་གསལ་ཞལ་ཕྱེ་གནང་གྲུབ་མཚམས་སློབ་སྤྱི་སྨན་རམས་པ་བསྟན་པ་ཆོས་འཕེལ་ལགས་ཀྱིས་དུས་དྲན་ཉིན་མོའི་བྱུང་རབ་ངོ་སྤྲོད་གནང་། དེ་རྗེས་རིག་གནས་དགེ་རྒན་བློ་བཟང་བཀྲ་ཤིས་ལགས་ཀྱིས་སྨན་རྩིས་ལས་བྱེད་ཞབས་ལོ་ ༣༠ དང་ ༢༠ འཁོར་བའི་མཚན་གཞུང་སྒྲོགས་སྦྱང་དང་སྦྲགས་སྤྱི་འཐུས་ཚོགས་གཙོ་མཆོག་གིས་བྱ་དགའ་གནང་ཡོད། དེ་བཞིན་སྐུ་མགྲོན་རྣམ་པ་གཉིས་ལ་སྨན་རྩིས་ཁང་གི་མཐོ་སློབ་མཐར་ཕྱིན་པའི་སྐབས་གྱོན་རྒྱུའི་ཆས་གོས་གསར་བཟོ་བྱས་ཡོད་པ་སྤྱན་བསྟར་དང་འབྲེལ་རྒྱུད་སྨད་གྲྭ་ཚང་གི་དགེ་འདུན་པས་ཤིས་བརྗོད་གསུང་འདོན་གནང
་།
དེ་ནས་སློབ་སྤྱི་སྨན་རམས་པ་བསྟན་པ་ཆོས་འཕེལ་ལགས་ཀྱིས་སྨན་རྩིས་སྐབས་སོ་སོའི་གྲུབ་འབྲས་སྒྲོགས་སྦྱང་དང་ལྷན་སྐུ་མགྲོན་གཙོ་བོ་མཆོག་གིས་ལག་འཁྱེར་དང་ཐོབ་ཕྲ་གནང་གྲུབ་བསྟུན་སྨན་དགེ་ཡེ་ཤེས་དགེ་ལེགས་ལགས་ཀྱིས་བོད་དབྱིན་གཉིས་ནང་རྩོམ་སྒྲིག་དང་པར་སྐྲུན་བྱས་ཡོད་པའི་གངས་རིའི་ལང་ཚོའི་རྩོམ་སྒྲིག་ཚོགས་ཆུང་གི་ཚོགས་མི་རྣམས་དང་། རྩོམ་ཡིག་ལེགས་གྲས་དྲུག་གི་མིང་གཞུང་སྒྲོགས་སྦྱང་དང་ཆབས་ཅིག་སྨན་རྩིས་འགན་འཛིན་ཚེ་རིང་བཀྲ་ཤིས་ལགས་ཀྱིས་བྱ་དགའ་གནང་། དེ་ནས་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་དང་འཕྲོད་བསྟེན་བཀའ་བློན་ཚེ་རིང་དབང་ཕྱུག་མཆོག་གིས་རིམ་བཞིན་དུས་དྲན་དང་འབྲེལ་བའི་གསུང་བཤད་གནང་གྲུབ་མཚམས་སློབ་སྤྱི་གཞོན་པ་སྨན་རམས་པ་པ་སངས་དབང་འདུས་ལགས་ཀྱིས་ཐུགས་རྗེ་ཆེ་ཞུས་ཏེ་མཁྱེན་པའི་རང་གཟུགས་ཀྱི་ཤིས་བརྗོད་དག་འདོན་གནང་སྟེ་མཛད་སྒོ་གྲོལ་ཡོད་པ་བཅས། །
