༢༠༡༤ ཟླ་ ༦ ཚེས་ ༣༠ རེས་གཟའ་ཟླ་བ།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མངའ་རིས་ཚང་རིན་པོ་ཆེ་མཆོག་བརྒྱུད་ལ་དྭག་ཀླུ་འཁྱིལ་དགེ་ལྡན་དར་རྒྱས་གླིང་དགོན་པའི་འདུས་དམངས་ཡོངས་ཀྱིས་ཇི་ལྟར་སྔོན་ནས་གསོལ་འདེབས་ཞུས་དོན་ལྟར་བཀའ་བཞེས་ཟབ་མོ་ཐོབ་སྟེ་ཕྱི་ལོ་ ༢༠༡༤ ཟླ་ ༦ ཚེས་ ༢༩ ཉིན་གྱི་ཕྱེད་ཡོལ་ཆུ་ཚོད་ ༢།༣༠ པའི་ཐོག་མགོན་པོ་གང་མཆོག་ཉིད་ཀླུ་འཁྱིལ་དགོན་པར་༸ཞབས་སོར་བདེ་བར་འཁོད་སྐབས། དགོན་པའི་མཁན་བླ་དང་འདུས་དམངས་ནས་དུང་རྒྱ་སྤོས་སྣེས་སྔོན་བསུས་ཐོག་ལམ་ཟུར་གཡས་གཡོན་དུ་དད་ལྡན་མང་ཚོགས་དང་སློབ་ཕྲུག་སོགས་ཀྱིས་ལག་ཏུ་དཀར་གཙང་མཇལ་དར་ཐོགས་ཏེ་ཕེབས་བསུ་གཟབ་རྒྱས་ཞུས་འདུག
དེ་ནས་༸གོང་ས་༸སྐྱབས་མགོན་ཆེན་པོ་མཆོག་གིས་ཀླུ་འཁྱིལ་དགོན་པར་གསར་དུ་བཞེངས་པའི་ཕོ་བྲང་ལ་རབ་གནས་དང་དབུ་འབྱེད་གྲུབ་བསྟུན་ཕོ་བྲང་གསར་པའི་བཞུགས་ཁྲིར་༸ཞབས་སོར་འཁོད་མཚམས་མངའ་རིས་ཚང་དགོན་ཁག་བདུན་གྱི་དགེ་འདུན་འདུས་དམངས་ནས་མཎྜལ་རྟེན་གསུམ་འདེགས་འབུལ་ཞུས་འདུག ཕྱི་ཚེས་ ༣༠ ཉིན་༸གོང་ས་མཆོག་དབུ་བཞུགས་ཐོག་ཆོས་ལུགས་རིས་མེད་ཀྱི་མཁས་དབང་འདུ་འཛོམས་ཀྱིས་ཕར་ཕྱིན་མཁས་པའི་བགྲོ་གླེང་གནང་རྒྱུ་ཡིན་འདུག
ཕྱི་ཟླ་ ༧ ཚེས་ ༡ ཉིན་༸གོང་ས་མཆོག་གིས་སེར་སྐྱ་མང་ཚོགས་ལ་ཤེས་རབ་སྙིང་པོའི་ཆོས་འབྲེལ་དང་མངའ་རིས་ཚང་དགོན་ཁག་བདུན་གྱི་དགེ་འདུན་འདུས་དམངས་དང་སེར་སྐྱ་ཐུན་མོང་ནས་མགོན་པོ་གང་ཉིད་མཆོག་ལ་བརྟན་བཞུགས་སྟབས་བདེ་ཞིག་འདེགས་འབུལ་ཞུ་རྒྱུ་ཡིན་འདུག ཕྱི་ཚེས་ ༣ ནས་བཟུང་༸གོང་ས་༸སྐྱབས་མགོན་ཆེན་པོ་མཆོག་གིས་དད་ལྡན་སྐྱ་སེར་མི་དམངས་ཁྲི་ ཚོ་བརྒལ་བར་དཔལ་དུས་ཀྱི་འཁོར་ལོའི་དབང་ཆེན་དབུ་འཛུགས་མཛད་རྒྱུ་ཡིན་འདུག
