༢༠༡༤ ཟླ་ ༦ ཚེས་ ༣༠ རེས་གཟའ་ཟླ་བ།
༄༅། །ཕྱི་ལོ་ ༢༠༡༤ ཟླ་ ༦ ཚེས་ ༢༥ ཉིན་གྱི་ཕྱེད་ཡོལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཟངས་དཀར་ཁུལ་དཔའ་འདུམ་གནས་ཀྱི་ (Model Public School)ཞེས་པའི་སློབ་གྲྭའི་ནང་ཟངས་དཀར་ཁུལ་གྱི་ས་གནས་མང་ཚོགས་ལ་ཆོས་ལུགས་མཐུན་སྒྲིལ་བྱེད་རྒྱུ་གལ་ཆེ་ཡིན་སྐོར་བཀའ་སློབ་སྩལ་འདུག
དེ་ཡང་ཐོག་མར་མཐོ་རིམ་གྱི་སློབ་ཕྲུག་གཅིག་གིས་ཟངས་དཀར་ས་གནས་ཁ་ཆེའི་མི་དམངས་ཀྱི་ཚབ་ཞུས་ཏེ་ཕེབས་བསུའི་འཚམས་འདྲི་ཞུས་པ་དང་ཆབས་ཅིག་༸གོང་ས་༸སྐྱབས་མགོན་ཆེན་པོ་མཆོག་ས་གནས་དེ་གར་ཆིབས་སྒྱུར་བསྐྱངས་པ་བརྒྱུད་ཁུལ་དེའི་ཆོས་ལུགས་ཐོག་གི་རྙོག་གླེང་རྣམས་ཞི་འཇམ་བརྟན་ལྷིང་བསྐྲུན་ཐུབ་པའི་རེ་འདུན་ཞུས་པ་མ་ཟད། ཁུལ་དེའི་མང་ཚོགས་ཀྱི་རེ་འདུན་ལྟར་ཞི་འགྲིག་ཡོང་ཐབས་ཀྱི་གྲོས་མཐུན་དོན་ཚན་ཁག་གཅིག་ཀྱང་སྙན་སྒྲོན་ཞུས་འདུག
དེ་ནས་མགོན་པོ་གང་ཉིད་མཆོག་གིས་ཆོས་ལུགས་མཐུན་སྒྲིལ་བྱེད་རྒྱུ་གལ་ཆེ་ཡིན་སྐོ་ལམ་སྟོན་བཀའ་སློབ་ཕེབས་དོན། དེང་སྐབས་ཆོས་ལུགས་མི་འདྲ་བ་ཉམས་སུ་ལེན་མཁན་གྱི་སྡེ་མི་འདྲ་བ་ཡོད། དེར་བརྟེན་འདི་གར་ཆ་བཞག་ན། སངས་རྒྱས་པའི་ཆོས་པ་ཚོའི་ངོས་ནས་ཁ་ཆེའི་ཆོས་གྲོགས་ཚོ་ཚོར་བ་སྐྱེན་པོ་གང་འདྲ་ཡོད་མེད་ཤེས་པ་བྱེད་དགོས། དེ་བཞིན་ཁ་ཆེའི་ངོས་ནས་ཀྱང་སངས་རྒྱས་པའི་ཆོས་གྲོགས་ཚོ་ཚོར་བ་སྐྱེན་པོ་གང་འདྲ་ཡོད་མེད་ཤེས་པ་བྱེད་རྒྱུ་གལ་ཆེན་པོ་རེད། སྤྱིར་བཏང་དཀའ་ངལ་ཕྲན་བུ་ཡོང་སྲིད་པ་རེད། དཀའ་ངལ་ཡོང་སྐབས་ཕྱོགས་རིས་མ་བྱས་པར་འགོ་ཁྲིད་མཁན་ཚོ་ཐུག་སྟེ། གྲོས་མོལ་གྱི་ལམ་ནས་དཀའ་ངལ་སེལ་ཐབས་བྱེད་རྒྱུ་ཧ་ཅང་གལ་ཆེན་པོ་ཆགས་ཡོད།
ལྷག་པར་རང་ཉིད་ཀྱི་སྤུན་མཆེད་བརྗོད་མི་དགོས་པར་རང་ཉིད་ཀྱི་དགྲ་བོ་ཡིན་རུང་མི་གཅིག་གྱུར་ཆགས་ཡོད། དཔེར་ན། རྒྱ་གུང་ཁྲན་ལ་ཆ་མཚོན་ན། ཆབ་སྲིད་ཐོག་ནས་ང་ཚོ་བོད་པར་དཀའ་ངལ་སྤྲོད་མཁན་ཞིག་ཆགས་ཡོད། འོན་ཀྱང་ང་ཚོའི་བསམ་བློའི་ནང་མི་གཅིག་གྱུར་ཡིན་བསམས་ནས་སྡོད་ཀྱི་ཡོད། དེར་བརྟེན་རྒྱ་ཆེ་ས་ནས་འཛམ་གླིང་འདིའི་སྟེང་གནས་པའི་མི་དུང་ཕྱུར་བདུན་ཅུ་ལྷག་ཡོད་པ་རྣམས་འགྲོ་བ་མི་གཅིག་མཚུངས་ཆགས་ཡོད། ལྷག་པར་འདས་པའི་ལོ་ངོ་བརྒྱ་ཕྲག་ལྷག་རིང་རྒྱ་གར་འཕགས་པའི་ཡུལ་འདི་འཛམ་གླིང་གི་ཆོས་ལུགས་གཙོ་ཆེ་བ་ཚང་མ་མཉམ་གནས་བྱས་ཏེ་བསྡད་ཡོད་པའི་ལུང་པ་ཞིག་ཆགས་ཡོད། དེར་བརྟེན་རྒྱ་གར་རང་བཙན་ཆགས་སྐབས་རྩ་ཁྲིམས་ནང་ཆོས་ལུགས་རིས་མེད་ཀྱི་ལྟ་གྲུབ་གསལ་པོ་བཀོད་ཡོད། འདི་ལྟ་བུའི་ཁྲིམས་ལུགས་འོག་ལུང་པ་འདིར་མི་དུང་ཕྱུར་བཅུ་ལྷག་གནས་ཡོད། དངོས་གནས་ཞི་བདེ་དང་མཐུན་སྒྲིལ། མང་གཙོ་ཧ་ཅང་ཡག་པོ་འདུག
དེའི་ནང་ཚན་ནས་ཟངས་དཀར་ཐེ་བའི་ལ་དྭགས་ས་ཁུལ་དེ་དག་ལོ་བརྒྱ་ཕྲག་རིང་གཙོ་བོ་སངས་རྒྱས་པའི་ཆོས་བྱེད་མཁན་ནང་པའི་ལུང་པ་ཞིག་ཆགས་ཡོད། དེའི་ནང་ནས་ཁྱེད་རང་ཚོ་ཁ་ཆེའི་ཆོས་བྱེད་མཁན་གང་ཙམ་ཞིག་ཡོད་འདུག གང་ལྟར་སྤྱི་ཡོངས་ཆ་ནས་ཁྱེད་རང་ཚོ་ཧ་ཅང་མཐུན་སྒྲིལ་ཡག་པོ་རེད། དེ་ཁྱེད་རང་ཚོས་རྩ་ཆེན་ཞིག་ལ་ངོས་འཛིན་བྱེད་དགོས། དེ་སྔ་ངོས་ཀྱིས་བརྗོད་མྱོང་ཡོད་ལ་མ་འོངས་པར་ཡང་འགོ་ཁྲིད་མཁན་ཚོར་མུ་མཐུད་བརྗོད་རྒྱུ་ཡིན། ཁྱེད་རང་ཚོ་བློ་བདེ་པོ་བྱོས་ཏེ་བཞུགས་ཨང། དེ་བཞིན་ངོས་རང་འདི་གར་ཁ་ཆེའི་གྲངས་ཉུང་མི་རིགས་ཚོས་མགྲོན་འབོད་གནང་བར་ཧ་ཅང་དགའ་བོ་བྱུང་། དམིགས་བསལ་འདི་ཁུལ་ཆོས་ལུགས་ཀྱི་དཀའ་རྙོག་གིས་མཚོན་མི་དམངས་ཀྱི་བསམས་པའི་རེ་འདུན་རྣམས་ཆེད་དུ་གཉེར་ནས་ངོས་ལ་བརྗོད་པར་ཧ་ཅང་དགའ་པོ་བྱུང། ཞེས་སོགས་ཀྱི་བཀའ་སློབ་སྩལ། །
