༢༠༡༤ ཟླ་ ༥ ཚེས་ ༡༢ རེས་གཟའ་ཟླ་བ།
༄༅། །ཕྱི་ལོ་ ༢༠༡༤ ཟླ་ ༥ ཚེས་ ༩ ཉིན་གྱི་ཕྱེད་ཡོལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ནོར་ཝེའི་རྒྱལ་ས་ཨོ་སི་ལོ་དང་། དེའི་ཉེ་འཁོར་དུ་ཡོད་པའི་སི་ཝི་ཌེན་(Sweden)། ཌེན་མརཀ་(Denmark) བཅས་ནས་ཡིན་པའི་བོད་རིགས་དང་། ས་གནས་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམ་པར་མཇལ་ཁ་དང་བཀའ་སློབ་བཀའ་དྲིན་སྩལ་འདུག
དེ་ཡང་གོང་ཚེས་ཉིན་གྱི་ཕྱེད་ཡོལ་ཆུ་ཚོད་ ༢།༣༠ ཐོག་༸གོང་ས་མཆོག་གི་བཞུགས་གནས་མགྲོན་ཁང་(Grand Hotel) དུ་བཀའ་སློབ་སྩལ་དོན། ངོས་རང་དེ་རིང་འདིར་ཡོང་སྟེ་ཁྱེད་རང་ཚོ་ཁྱུག་ཙམ་ཐུག་རྒྱུ་བྱུང་བར་ཧ་ཅང་དགའ་པོ་བྱུང་། ང་ཚོར་རྐྱེན་ངན་གྲོགས་ཤར་གྱི་གནས་ཚུལ་གཅིག་ནི་བར་སྐབས་ང་ཚོ་དཀའ་ངལ་འཕྲད་རྗེས། བོད་ཆོལ་ཁ་གསུམ་མདོ་སྟོད་སྨད་དབུས་གཙང་སྟོད་མངའ་རིས་དང་བཅས་པ་ང་ཚོ་ཚང་མས་བོད་རིགས་གཅིག་གྱུར་གྱི་འདུ་ཤེས་ཧ་ཅང་ཤུགས་ཆེན་པོ་ཡོད། ང་ཚོར་ཆ་བཞག་ནའང་དེ་སྔ་མི་ས་མ་རིར་བོད་མི་བསླེབས་པ་ནས་བཟུང་ང་ཚོ་བོད་གངས་ཅན་པ་ཞེས་པའི་བོད་ཆོལ་ཁ་གསུམ་གྱི་བོད་མི་ཚང་མ་གཅིག་གྱུར་བྱས་ནས་བསྡད་པ་རེད། དེ་ནས་ང་ཚོས་སྤྱི་འཐུས་བཙུགས་སྐབས་རྒྱ་གར་ས་གནས་ས་ཐོག་ལ་མིའི་གྲངས་ཀ་མང་ཉུང་ལ་མ་ལྟོས་པར་ཆོལ་ཁ་གསུམ་ལབསམ་བློ་བཏང་སྟེ་སྤྱི་འཐུས་བགོ་བཤའ་ཏག་ཏག་བརྒྱབ་ཡོད། གཙོ་ཆེ་ཤོས་གཞིས་ལུས་རྒྱ་ཆེའི་མི་མང་རྣམས་རྡོག་རྩ་གཅིག་ཏུ་སྒྲིལ་ནས་གནས་ཡོད། དེ་བཞིན་ང་ཚོ་བཙན་བྱོལ་ལ་ཡོད་མཁན་ཚོའང་དེ་ལུགས་ཀྱི་ང་ཚོ་བོད་པ་ཆིག་སྒྲིལ་གྱི་ཐོག་ནས་བསྡད་ཡོད། འདི་ནི་ང་ཚོར་རྐྱེན་ངན་གྲོགས་སུ་གྱུར་བ་ཞིག་རེད་འདུག དེང་སྐབས་ཁམས་དང་ཨ་མདོ་ཁུལ་དུ་ཆ་བཞག་ན་མི་རིགས་ཀྱི་ལྟ་བ་ཧ་ཅང་ཤུགས་ཆེན་པོ་འདུག གལ་ཏེ་ང་ཚོ་སྣང་བ་སྐྱིད་པོ་བྱས་ནས་བསྡད་ཡོད་ན་འདི་ལྟར་ཡོང་གི་མ་རེད་བསམས་ཀྱི་འདུག
ང་ཚོར་སྐྱེན་ངན་ཤུགས་ཆེ་བྱུང་བའི་འོག་ཚང་མ་རྨོངས་གཉིད་ལས་སད་ནས་ང་ཚོ་བོད་རིགས་གཅིག་གྱུར་ཆགས་ཡོད། སྐད་ཀྱི་གདངས་མི་འདྲ་བ་ཡོད་ནའང་སྐད་ཡིག་བོད་ཡིག་གཅིག་གྱུར་ཆགས་ཡོད། བོད་ཡིག་ཐོག་ཡོད་པའི་བཀའ་འགྱུར་དང་བསྟན་འགྱུར་དེ་ཆོལ་ཁ་གསུམ་ཡོངས་རྫོགས་ལ་གཅིག་གྱུར་ཆགས་ཡོད། བོད་པ་ཙམ་མ་ཟད་ཧི་མ་ལ་ཡའི་རི་རྒྱུད་ལའང་གཅིག་གྱུར་བྱས་ནས་བསྡད་ཡོད། དུས་ཆོད་འདིའི་རིང་ང་ཚོ་བོད་ཆོལ་ཁ་གསུམ་ཡོངས་རྫོགས་སྐྱིད་སྡུག་གང་བྱུང་ཡང་སྐྱིད་གཅིག་སྡུག་གཅིག་བྱས་ནས་བསྡད་ཡོད། ད་ལྟའི་དུས་ཚོད་འདིར་བསམ་བློ་གཏོང་སྐབས་ཕྱོགས་གཅིག་ནས་སེམས་སྐྱོ་དགོས་པ་ཞིག་དང་། ཕྱོགས་གཞན་ཞིག་ནས་བསམ་བློ་བཏང་ན་ང་ཚོའི་མི་རིགས་འདི་བྱས་རྗེས་ཡོད་བསམས་པ་དྲན་གྱི་འདུག ཁྱེད་རང་ཚོ་ཚང་མ་བློ་བདེ་པོ་བྱོས། ད་ཆ་གལ་ཆེ་ཤོས་མ་འོངས་པ་རེད། མ་འོངས་པར་བརྒྱ་ཆ་བརྒྱ་ཐམ་པ་འདི་འདྲ་ཡོང་གི་རེད་ཅེས་བཤད་ཚོད་ཐུབ་ཀྱི་མ་རེད། འོན་ཀྱང་བར་སྐབས་རྒྱ་ནག་ནང་འགྲོ་སྟངས་དེ་འདས་པའི་ལོ་དྲུག་ཅུ་ལྷག་གི་རིང་འགྱུར་བ་ཧ་ཅང་འགྲོ་བཞིན་ཡོད། འགྱུར་བ་འགྲོ་རྒྱུ་དེ་དག་ནི་དང་པོའི་འགྲོ་སྟངས་བསམ་བློ་དེ་ཁུངས་འཁྱོལ་གྱི་མེད་པར་བརྟེན། དངོས་ཡོད་གནས་ཚུལ་ལ་གཞིགས་ཏེ་འགྱུར་བ་འགྲོ་དགོས་པ་ཞིག་ཆགས་པ་རེད།
ད་ལྟའི་རྒྱ་ནག་གི་སྲིད་འཛིན་ཞི་ཅིན་ཕིང་བསླེབས་ནས་རྒྱ་ནག་གི་སྲིད་བྱུས་འཛིན་སྟངས་མང་པོ་ཞིག་ལ་གནས་ཚུལ་ཕྲན་བུ་གསར་པ་བསླེབས་ཡོད། ངོས་ཀྱིས་ཡོངས་གྲགས་བྱས་ཏེ་བཤད་ཀྱི་ཡོད། ལྐོག་བཟའ་རུལ་སུངས་ཐོག་ཧ་ལས་པའི་སྙིང་སྟོབས་ཆེན་པོའི་ཐོག་ནས་ནུས་པ་ཐོན་པའི་གདོང་ལེན་བྱེད་བཞིན་འདུག དེས་རྐྱེན་པས་དཀའ་ངལ་ཧ་ཅང་མང་པོ་ཡོད། གང་ལྟར་དེ་ཚོའི་གྲས་འགྱུར་བ་ཞིག་རེད་འདུག ད་ལན་ཉེ་ཆར་ཁོང་ཡུ་རོབ་ཁུལ་དུ་གཟིགས་སྐོར་ལ་ཕེབས་ནས་པེ་རི་སིར་ཡོད་པའི་སྐབས་རྒྱ་ནག་གི་རིག་གཞུང་ལ་ནང་པའི་ཆོས་ཀྱི་ཤུགས་རྐྱེན་ཧ་ཅང་ཡོད་པ་དང་། རྒྱ་ནག་གི་རིག་གཞུང་ཉམས་པ་སོར་ཆུད་མི་ཉམས་གོང་འཕེལ་ཡོང་རྒྱུར་ནང་པའི་འགན་ཆེན་པོ་འཁྱེར་དགོས་རེད་ཅེས་པའི་གཏམ་བཤད་བྱས་ཡོད། ཆོས་མེད་པའི་གུང་ཁྲན་ཏང་གི་གཙོ་འཛིན་གྱིས་ནང་ཆོས་གལ་ཆེན་པོ་རེད་ཅེས་བརྗོད་པ་ནི་ཏང་གསར་པ་རེད། དངོས་ཡོད་གནས་ཚུལ་ཐོག་བསམ་བློ་བཏང་གི་ཡོད། དེ་ནས་གལ་ཆེ་བ་གཅིག་ནི། ཤེས་ཡོན་འདི་ཧ་ཅང་གལ་ཆེན་པོ་རེད། ང་ཚོའི་བདེན་དོན་རྩོད་རྒྱུ་དེ་ཤེས་ཡོན་གྱི་ཐོག་ནས་རྩོད་རྒྱུ་རེད་མ་གཏོགས་སྟོབས་དང་ནུས་པའི་ཐོག་ནས་རྩོད་རྒྱུ་ཞིག་མ་རེད། ང་ཚོའི་བདེན་པ་དོན་ཐོག་ལ་འཁྱོལ་བ་ཞིག་ཡོང་རྒྱུར་ཤེས་ཡོན་གྱི་ཐོག་ནས་ཡོང་དགོས་ཀྱི་ཡོད་སྟབས། ཕྱོགས་གཅིག་ནས་དེང་དུས་ཀྱི་ཤེས་ཡོན་དེ་ཧ་ཅང་གལ་ཆེན་པོ་རེད། འོན་ཀྱང་དེང་དུས་ཀྱི་ཤེས་ཡོན་ཁོ་ནའི་བོད་པའི་བདེན་དོན་རྩོད་རྒྱུར་ཕལ་ཆེར་འདང་གི་མ་རེད། དེང་དུས་ཀྱི་ཤེས་ཡོན་ཡོད་ན་ཤོག་པ་ཡ་གཅིག་ལྟ་བུ་རེད། བོད་རང་གི་སངས་རྒྱས་པའི་ལྟ་གྲུབ་དང་འབྲེལ་བའི་ཤེས་ཡོན་དེ་ཧ་ཅང་གལ་ཆེན་པོ་རེད། ཅེས་དང་།
དེ་བཞིན་༸གོང་ས་མཆོག་གིས་ནང་ཆོས་ཀྱི་གཞུང་ནས་གསུངས་པའི་སློབ་སྦྱོང་དེ་ཡང་ཆོས་བྱེད་སྟངས་ཁོ་ནའི་ཐོག་ནས་འགྲེལ་བརྗོད་བྱེད་ཀྱི་མེད་པའི་སྐོར་གསལ་བཤད་དང་འབྲེལ་བཀའ་འགྱུར་དང་བསྟན་འགྱུར་པོ་ཏི་སུམ་བརྒྱ་ལྷག་ཡོད་པ་དེ་དག་ཡོངས་རྫོགས་ནང་པའི་ཚན་རིག་དང་ནང་པའི་ལྟ་གྲུབ། དེ་བཞིན་ནང་པའི་ཆོས་བཅས་དབྱེ་བ་གསུམ་དུ་འབྱེད་ཡོད་སྐོར་ངོ་སྤྲོད་མཛད་ནས་སེམས་ཁམས་རིག་པ་དང་ནང་པའི་ལྟ་གྲུབ་ཐོག་དེང་སྐབས་བོད་མི་ཚོས་དོ་སྣང་དང་སློབ་སྦྱོང་བྱེད་རྒྱུ་ཧ་ཅང་གལ་ཆེ་ཡིན་སྐོར་བཀའ་སློབ་སྩལ་དོན། སེམས་ཁམས་རིག་པ་དང་ཚན་རིག་སྐོར་གྱི་ཡིག་ཆ་དེ་དག་ཕྱོགས་སྒྲིགས་བྱས་ནས་བོད་ཡིག་ཐོག་ཟིན་བྲིས་བརྒྱབ་ཚར་བ་རེད། དེ་ནས་དབྱིན་ཡིག་དང་། རྒྱ་ཡིག ཧིན་ཡིག་ཐོག་སྒྱུར་རྒྱུ་འགོ་བཙུགས་ཚར་བ་རེད། དེ་བཞིན་ཉི་ཧོང་དང་། སོག་པོ། ཨུ་རུ་སུའི་སྐད་ཀྱི་ཐོག་སྒྱུར་རྒྱུར་ང་ཚོའི་ངོ་ཤེས་མང་པོ་ཞིག་གིས་འཁུར་བླངས་ཏེ་ལས་དོན་འགྲོ་བཞིན་ཡོད། ཆོས་དད་ཡོད་རུང་མེད་རུང་། དེ་བཞིན་ཆོས་ལུགས་གཞན་ཞིག་ཡིན་ནའང་རེད། སེམས་ཁམས་རིག་པ་དང་ལྟ་གྲུབ་ཀྱི་སྐོར་དེ་ཕན་ཐོགས་ཡོད་པ་ཞིག་རེད་འདུག འདིར་ང་ཚོ་བོད་པ་ཚོས་དོ་སྣང་བྱེད་རྒྱུ་ཧ་ཅང་གལ་ཆེན་པོ་ཡིན། རིམ་པས་བོད་ཡིག་ནང་ཕྱོགས་སྒྲིག་བྱས་པ་དེ་ཐོན་ན་དེ་ཁྱེད་རང་ཚོས་ལྟ་ཐུབ་ན་ཡག་པོ་ཡོད། ཅེས་སོགས་ཀྱི་བཀའ་སློབ་སྩལ།
དེ་རྗེས་དེར་བཅར་བའི་ནོར་ཝེ་བོད་དོན་རྒྱབ་སྐྱོར་ཚོགས་པའི་འཐུས་མི་རྣམས་ལ་བཀའ་སློབ་ཕེབས་དོན། ང་ཚོས་འཛམ་གླིང་ཁྱོན་ཡོངས་ལ་ཡོད་པའི་བོད་དོན་རྒྱབ་སྐྱོར་བ་རྣམས་ལ་ཐུགས་རྗེ་ཆེ་ཞུས་དང་ཆབས་ཅིག་ཡི་རང་བསྔགས་བརྗོད་ཞུ་རྒྱུ་ཡིན། དུས་ཚོད་འདི་ནི་ང་ཚོར་ཉག་ཕྲ་བའི་དཀའ་ངལ་གྱི་དུས་ཤིག་ཡིན། གནས་སྟངས་ཁག་གཅིག་དངོས་གནས་ཚབས་ཆེན་དུ་འགྱུར་བཞིན་འདུག འཚམ་རེ་ངོས་རང་གི་མཐོང་ཚུལ་ལ་གནའ་རབས་ཀྱི་ལོ་རྒྱུས་དང་རིག་གཞུང་ཤུལ་བཞག་གི་རིན་ཐང་ཡོད་པའི་བོད་རྒྱལ་ཁབ་འདི་ད་ཆ་རྩ་མེད་དུ་འགྱུར་བཞིན་ཡོད་པར་སོང་དེ་ལྟར་འགྲེལ་བརྗོད་བྱེད་ཀྱི་ཡོད། སྤྱིར་བཏང་རྒྱ་ནག་གི་འགོ་ཁྲིད་གསར་པའི་དུས་རབས་འདིའི་སྐབས་རྒྱ་ནག་ནང་གི་ནང་པའི་རྗེས་འབྲང་པ་དང་ཤེས་ཡོན་ཅན་གྱི་མི་སྣ་མང་པོས་བོད་ཀྱི་གནད་དོན་ལ་སེམས་འཁུར་ཆེན་པོ་བྱེད་ཀྱི་ཡོད་པ་མ་ཟད། མང་པོ་ཞིག་གིས་བོད་ཀྱི་བདེན་པའི་གནས་སྟངས་ལ་གདུང་སེམས་མཉམ་སྐྱེའི་རྣམ་པ་ཤུགས་ཆེ་བཏོན་བཞིན་ཡོད། དེ་ནི་བཟང་ཕྱོགས་ཀྱི་འགྱུར་བ་ཞིག་ཡིན། དེར་བརྟེན་ཁྱེད་རྣམ་པས་རྒྱབ་སྐྱོར་དེ་ཧ་ཅང་གནད་འགག་ཆགས་ཀྱི་འདུག གལ་ཏེ་གནས་སྟངས་དེ་དག་རྡོ་བཞིན་འགྱུར་མེད་བེམ་པོ་ལྟ་བུ་ཡིན་ན་དཀའ་ལས་ཁག་པོ་རེད། འོན་ཀྱང་ད་ལྟའི་ཆར་གནས་སྟངས་ལ་འགྱུར་བ་འགྲོ་བཞིན་ཡོད། ཅེས་དང་། ཕྱོགས་མཚུངས་མགོན་པོ་གང་ཉིད་མཆོག་གིས་དཔལ་ན་ལེནྡྲའི་ཆོས་བརྒྱུད་དྲི་མ་མེད་པ་ནས་དར་བའི་ནང་པའི་ཆོས་དང་། ལྷག་པར་ནང་པའི་ཆོས་དང་འབྲེལ་བའི་སེམས་ཁམས་རིག་པའི་ཐོག་ཚན་རིག་པ་རྣམས་ཀྱིས་དེང་སྐབས་དོ་སྣང་ཆེན་པོ་བྱེད་བཞིན་ཡོད་སྐོར་དང་། བོད་དོན་རྒྱབ་སྐྱོར་བ་རྣམས་ཀྱིས་བོད་ཀྱི་གནད་དོན་ཐོག་ལྟས་སྐབས་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བཞིན་པའི་གནད་དོན་ཁོ་ནར་མིན་པར། གནད་དོན་གཏིང་ཟབ་དེ་དག་ལ་ཐུགས་ཞིབ་གནང་བ་དང་ཆབས་ཅིག བོད་དོན་ལ་རྒྱབ་སྐྱོར་གནང་བའི་སྐབས་རྒྱ་ནག་གཞུང་ལ་སྐྱོན་བརྗོད་ལམ་ནས་མིན་པར་རྒྱ་ནག་རང་ཉིད་ཀྱི་ཁེ་ཕན་ལ་ཐུགས་ཡོད་པའི་གནད་འགག་འགྲེལ་བརྗོད་བྱས་པའི་ཐོག་ནས་རྒྱབ་སྐྱོར་གནང་དགོས་ཞེས་སོགས་ཀྱི་བཀའ་སློབ་སྩལ་ཡོད།
