༢༠༡༤ ཟླ་ ༥ ཚེས་ ༩ རེས་གཟའ་པ་སངས།
༄༅། །ཕྱི་ལོ་ ༢༠༡༤ ཟླ་ ༥ ཚེས་ ༨ རེས་གཟའ་ཕུར་བུའི་ཉིན་བོད་མིའི་སྒྲིག་འཛུགས་བཀའ་ཤག་གིས་དོལ་རྒྱལ་རྗེས་འབྲང་པ་ཚོས་༸གོང་ས་མཆོག་ལ་ངོ་རྒོལ་བྱས་པ་དེར་སྐྱོན་བརྗོད་ཤུགས་ཆེ་གནང་བའི་གསལ་བསྒྲགས་སྤེལ་བའི་ནང་འཁོད་དོན།
བོད་རིགས་མིན་པའི་དོལ་རྒྱལ་རྗེས་འབྲང་པ་མཁྲེགས་བཟུང་ཅན་ཁག་གཅིག་གིས་༸གོང་ས་༸སྐྱབས་མགོན་ཆེན་པོ་མཆོག་ལ་ངོ་རྒོལ་སྐད་འབོད་བྱས་པ་དེར་བོད་མིའི་སྒྲིག་འཛུགས་ཀྱིས་སྐྱོན་བརྗོད་ཤུགས་ཆེ་བྱེད་རྒྱུ་དང་། དོལ་རྒྱལ་རྗེས་འབྲང་པ་ཚོས་འགྲོ་བ་མིའི་ཐོབ་ཐང་ལ་༸གོང་ས་༸སྐྱབས་མགོན་ཆེན་པོ་མཆོག་གིས་རྩིས་མེད་རྡོག་རོལ་གཏོང་བཞིན་ཡོད་པའི་སྐྱོན་བརྗོད་བྱས་པ་དེར་གཞི་རྩ་གང་ཡང་མེད། དེ་ཡང་སྲིད་སྐྱོང་མཆོག་གིས། དོལ་རྒྱལ་རྗེས་འབྲང་པ་ཚོས་ནོར་ཝེའི་སྲིད་གཞུང་གིས་ཐེངས་འདིར་རྒྱ་ནག་གཞུང་གི་གནོན་ཤུགས་འོག་༸གོང་ས་མཆོག་དང་མཇལ་འཕྲད་ཞུ་རྒྱུ་མིན་པའི་ཐག་གཅོད་བྱས་པ་དེར་དགའ་བསུ་ཞུས་ཡོད། བྱེད་ཕྱོགས་དེས་ཁོ་པ་ཚོས་རྒྱ་ནག་གཞུང་གི་ཆབ་སྲིད་ཀྱི་ལག་ཆར་བཀོལ་སྤྱོད་བྱེད་བཞིན་ཡོད་པ་ཧ་ཅང་གསལ་པོ་མཚོན་ཐུབ། ༸གོང་ས་༸སྐྱབས་མགོན་ཆེན་པོ་མཆོག་ནི་བོད་མི་དང་ཞི་བདེ་ལ་དགའ་བའི་འཛམ་གླིང་མི་མང་ས་ཡ་མང་པོའི་རེ་བའི་འབྱུང་ཁུངས་ཤིག་ཏུ་གྱུར་ཡོད།
དོལ་རྒྱལ་ཚོགས་པས་༸གོང་ས་མཆོག་དང་བོད་མིའི་སྒྲིག་འཛུགས་ལ་གཞི་མེད་སྐྱོན་འཛུགས་ཀྱིས་མང་ཚོགས་བསླུ་ཐབས་བྱ་རྒྱུའི་ལས་འགུལ་འདྲ་མིན་སྤེལ་བཞིན་ཡོད་ཀྱང་། མང་ཚོགས་ཀྱིས་དོལ་རྒྱལ་ཚོགས་པའི་སྐྱོན་བརྗོད་དེ་དག་ལ་གཞི་རྩ་གང་ཡང་མེད་པ་གསལ་རྟོགས་ཐུབ་རྒྱུར་ང་ཚོས་ཡིད་ཆེས་ཞུ་བཞིན་ཡོད། ཅེས་གསུངས། དོན་དངོས་ཐོག་བོད་མིའི་སྒྲིག་འཛུགས་ཀྱིས་དོལ་རྒྱལ་རྗེས་འབྲང་པ་ཚོའི་ཆོས་དད་རང་དབང་འཕྲོག་རྒྱུའི་ཚབ་ཏུ་ཁོ་པ་ཚོར་རྒྱ་གར་ནང་དང་ཕྱི་རྒྱལ་ཁག་ཏུ་ཕྱོགས་སྐྱོད་ལག་འཁྱེར་ཐོབ་ཆེད་རྒྱབ་གཉེར་ངོས་སྦྱོར་སྤྲད་ཡོད། རྒྱབ་གཉེར་གྱི་ཡིག་ཆར་བརྟེན་ནས་ཁོ་པ་ཚོར་རྒྱ་གར་གཞུང་གི་ཆོག་མཆན་ཐོབ་སྟེ་རྒྱ་གར་ནང་དང་ཕྱི་རྒྱལ་ཡུལ་གྲུར་འགྲོ་ཆོག་པ་བྱུང་ཡོད། བྱང་ཨ་རི་དང་ཡུ་རོབ་ནང་དོལ་རྒྱལ་རྗེས་འབྲང་པ་ཚོས་ཁྲིམས་མཐུན་ཡིག་ཆ་དང་ཆབ་སྲིད་སྐྱབས་བཅོལ་བའི་ཡིག་ཆ་སོགས་ཐོབ་ཆེད་རྒྱ་གར་ནང་ཆོས་དད་རང་དབང་མེད་ཚུལ་གྱི་འུད་སྒྲོག་བྱེད་སྲིད་ཀྱང་ཁོ་པ་ཚོ་རྒྱ་གར་དང་ཕྱི་རྒྱལ་དུ་སྡོད་སྐྱོད་ཆོག་པའི་ཡིག་ཆ་རག་པ་དེ་ཡང་བོད་མིའི་སྒྲིག་འཛུགས་ཀྱི་རྒྱབ་གཉེར་ཁོ་ནར་བརྟེན་ནས་རྒྱ་གར་གཞུང་གིས་སྤྲད་པ་ཞིག་ཆགས་ཡོད།
དེར་བརྟེན་བོད་མིའི་སྒྲིག་འཛུགས་ཀྱིས་དོལ་རྒྱལ་རྗེས་འབྲང་པ་ཚོའི་ཆོས་དད་རང་དབང་ལ་འགོག་རྐྱེན་གང་ཡང་བཟོས་མེད་པ་མ་ཟད། ཁོ་པ་ཚོ་རྒྱ་གར་དང་ཕྱི་རྒྱལ་ནང་སྡོད་སྐྱོད་བྱ་རྒྱུའི་ཐོབ་ཐང་ལའང་འགོག་རྐྱེན་གང་ཡང་བཟོས་མེད་པ་དཔེར་ན། འཇམ་མགོན་བསྟན་སྲུང་རྡོ་རྗེ་ཤུགས་ལྡན་ལ་མི་ཕྱེད་དད་སྟོབས་ལྷ་མི་སྲུང་སྐྱོབ་ཚོགས་པ། ཟེར་བའི་སྤྱི་ཁྱབ་དྲུང་ཆེ་ཟུར་པ་འཆི་མེད་ཚེ་རིང་གིས་ལྡི་ལི་སྐུ་ཚབ་དོན་ཁང་གི་རྒྱབ་གཉེར་འོག་རྒྱ་གར་གཞུང་གིས་ཕྱིར་སྐྱོད་ལག་འཁྱེར་(IC)གནང་བ་དེ་འཁྱེར་ནས་ཨ་རིར་ཕྱིན་ཡོད། ཁོ་པར་རྒྱ་གར་ནང་སྡོད་ཆོག་པའི་སྐྱབས་བཅོལ་ལག་དེབ་ (RC) ཐོབ་ཡོད་པ་དེ་ཡང་བོད་མིའི་སྒྲིག་འཛུགས་ས་གནས་ལས་ཁུངས་ཤིག་གིས་རྒྱབ་གཉེར་ཡིག་ཆ་སྤྲད་པར་བརྟེན་ནས་ཡིན།
ད་དུང་དེས་མ་ཟད། བྱང་ཨ་རིའི་དགེ་ལྡན་སྙན་བརྒྱུད་འཛིན་སྐྱོང་ཚོགས་པ། ཟེར་བའི་དྲུང་ཆེ་ཟུར་པ་ཨ་ཐར་ཚེ་རིང་ནས་ཀྱང་ལྡི་ལི་སྐུ་ཚབ་དོན་ཁང་གི་རྒྱབ་གཉེར་འོག་རྒྱ་གར་གཞུང་གི་ཕྱི་བསྐྱོད་ལག་འཁྱེར་ (IC)གནང་བ་དེ་འཁྱེར་ནས་ཨ་རིར་ཕྱིན་ཡོད་པ་མ་ཟད། དོལ་རྒྱལ་རྗེས་འབྲང་པ་གཞན་མང་པོ་ཞིག་གིས་དེ་མཚུངས་བྱས་ནས་ཕྱིན་ཡོད། ༸གོང་ས་༸སྐྱབས་མགོན་ཆེན་པོ་མཆོག་གིས་བོད་མི་དང་ནང་པའི་རྗེས་འབྲང་པ་ཚོར་འཇིག་རྟེན་པའི་དྲེགས་པ་དོལ་རྒྱལ་བསྟེན་གསོལ་བྱས་ན་སྐྱབས་འགྲོའི་བསླབ་བྱ་དང་འགལ་བཞིན་ཡོད་པ་མ་ཟད། ཆོས་ལུགས་ཕན་ཚུན་མཐུན་ལམ་དམ་ཚིག་གཙང་མར་གནོད་གཞིར་འགྱུར་བཞིན་ཡོད་པའི་བཀའ་སློབ་སྩལ་ཡོད། ༸གོང་ས་༸སྐྱབས་མགོན་ཆེན་པོ་མཆོག་ནི་ཆོས་ཕྱོགས་ཀྱི་དབུ་ཁྲིད་གཅིག་ཡིན་པར་བརྟེན་གདུལ་བྱ་ལོག་ལམ་ལས་སྐྱོབ་པར་མཛད་རྒྱུ་ནི་ཁོང་གི་ཐུགས་འགན་ཞིག་ཡིན་པར་ངོ་འཛིན་མཛད་བཞིན་ཡོད། འོན་ཀྱང་༸གོང་ས་མཆོག་གིས་དོལ་རྒྱལ་བསྟེན་གསོལ་བྱེད་མིན་གཙོ་བོ་གང་ཟག་སྒེར་སོ་སོས་ཐག་གཅོད་བྱ་རྒྱུ་ཡིན་པ་ཐེངས་མང་བཀའ་སློབ་སྩལ་ཡོད་པར་བརྟེན་དོལ་རྒྱལ་བསྟེན་སྲོལ་བྱེད་མིན་མཐའ་མའི་ཐག་གཅོད་དེ་གང་ཟག་སྒེར་པ་སོ་སོས་ཐག་གཅོད་བྱ་རྒྱུ་རེད།
གནས་སྟངས་དེ་དག་ཧ་ཅང་གསལ་རྟོགས་ཡོད་བཞིན་དུ་དོལ་རྒྱལ་རྗེས་འབྲང་པ་ཚོས་བོད་མི་དོལ་རྒྱལ་བསྟེན་གསོལ་བྱེད་མཁན་ཚོར་ཤེས་ཡོན་དང་འཕྲོད་བསྟེན། དེ་བཞིན་སྤྱི་ཚོགས་ཀྱི་ཐོབ་ཐང་གཞན་བཅས་མ་སྤྲད་པར་དབྱེ་འབྱེད་བྱེད་བཞིན་ཡོད་པའི་སྐྱོན་འཛུགས་བྱེད་བཞིན་ཡོད། འོན་ཀྱང་དོན་དངོས་ཐོག་དོལ་རྒྱལ་རྗེས་འབྲང་པ་ཚོ་དགོན་སྡེ་ཁག་གི་ནང་མུ་མཐུད་བསྡད་ཡོད་པ་དང་། དོལ་རྒྱལ་རྗེས་འབྲང་པའི་ཕྲུ་གུ་ཚོ་ཡང་བོད་མིའི་སྒྲིག་འཛུགས་ཀྱི་སློབ་གྲྭ་ཁག་དང་གཞན་རང་སྐྱོང་སྡེ་ཚན་གྱི་བོད་མིའི་སློབ་གྲྭ་ཁག་གི་ནང་གཏོང་བཞིན་ཡོད།
ཕྱི་ལོ་ ༡༩༩༨ ཕྱི་ཟླ་ ༦ ནང་རྒྱལ་སྤྱིའི་ཉེས་ཡངས་ཚོགས་པས་རྟོག་ཞིབ་མཐིལ་ཕྱིན་གནང་རྗེས་དོལ་རྒྱལ་ཚོགས་པས་བོད་མིའི་སྒྲིག་འཛུགས་ལ་མ་ཉེས་ཁག་གཡོག་བྱས་པ་དེ་དག་ལ་ཁུངས་སྐྱེལ་དཔང་རྟགས་ར་སྤྲོད་གང་ཡང་མེད་པའི་གསལ་བསྒྲགས་སྤེལ་ཡོད། ཕྱོགས་མཚུངས་ཕྱི་ལོ་ ༢༠༡༠ ལོར་རྒྱ་གར་གྱི་རྒྱལ་ས་ལྡི་ལིའི་ཁྲིམས་ཁང་ཆེ་བས་འཇམ་མགོན་བསྟན་སྲུང་རྡོ་རྗེ་ཤུགས་ལྡན་ལ་མི་ཕྱེད་དད་སྟོབས་ལྷ་མི་སྲུང་སྐྱོབ་ཚོགས་པ། ཟེར་བས་༸གོང་ས་༸སྐྱབས་མགོན་ཆེན་པོ་མཆོག་དང་བོད་མིའི་སྒྲིག་འཛུགས་ལ་ཁྲིམས་གཏུག་བྱས་པ་དེར་རྩིས་མེད་བཏང་ཡོད།
དོལ་རྒྱལ་རྗེས་འབྲང་པ་ཚོར་དབྱེ་འབྱེད་བྱས་པའི་ཁུངས་སྐྱེལ་དཔང་རྟགས་ར་སྤྲོད་གསལ་པོ་སྟོན་རྒྱུ་ཡོད་ན། བོད་མིའི་སྒྲིག་འཛུགས་ཀྱིས་ཞིབ་འཇུག་ནན་ཏན་བྱ་རྒྱུ་ཡིན། ཞེས་བསྐྱར་ནན་ཡང་ནན་བརྗོད་ཡོད་ཀྱང་ད་བར་ཁུངས་སྐྱེལ་ར་སྤྲོད་བྱེད་མཁན་དོལ་རྒྱལ་རྗེས་འབྲང་པ་སུ་གཅིག་ཀྱང་བྱུང་མེད།
ཕྱི་ལོ་ ༡༩༩༧ ལོར་རྡ་ས་མཚན་ཉིད་རིགས་ལམ་སློབ་གྲྭའི་འགན་འཛིན་མཆོག་དང་ཁོང་གི་དགེ་ཕྲུག་གཉིས་དམར་གསོད་གཏོང་མཁན་ལག་དམར་བ་དེ་དག་བཀའ་གདམ་གསར་མ་ཟེར་བ་དང་། འཇམ་མགོན་བསྟན་སྲུང་རྡོ་རྗེ་ཤུགས་ལྡན་ལ་མི་ཕྱེད་དད་སྟོབས་ལྷ་མི་སྲུང་སྐྱོབ་ཚོགས་པ་ཟེར་བ། དེ་བཞིན་བྱང་ཨ་རིའི་དགེ་ལྡན་སྙན་བརྒྱུད་འཛིན་སྐྱོང་ཚོགས་པ་ཟེར་བ་སོགས་དང་ཐད་ཀར་ལག་འབྲེལ་ཡོད་པ་ས་གནས་རྒྱ་གར་ཉེན་རྟོག་མི་སྣས་གསལ་བསྒྲགས་སྤེལ་ཡོད། དེར་བརྟེན་དོལ་རྒྱལ་ཚོགས་པ་ནི་དྲག་སྤྱོད་སྤེལ་མཁན་གྱི་ཚོགས་པ་ཞིག་ཡིན། དེ་རྗེས་རྒྱལ་སྤྱིའི་ཉེན་རྟོག་པས་ (Interpol) ལག་དམར་བ་དྲུག་ཡོད་ཁོངས་ནས་གཉིས་འཛིན་བཟུང་བྱ་རྒྱུའི་བཀོད་ཁྱབ་བཏང་ཡོད། ཕྱོགས་མཚུངས་རྒྱ་གར་དང་ཨ་རིའི་གཞུང་གིས་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཕྱྭར་དོལ་རྒྱལ་ཚོགས་པའི་ཉེན་ཁ་ཧ་ཅང་ཆེན་པོ་ཡོད་པ་ར་སྤྲོད་གནང་ཡོད།།
