༢༠༡༤ ཟླ་ ༥ ཚེས་ ༡༩ རེས་གཟའ་ཟླ་བ།
༄༅། །ཕྱི་ལོ་ ༢༠༡༤ ཟླ་ ༥ ཚེས་ ༡༧ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་བྷི་ཇེ་པི་ཆབ་སྲིད་ཚོགས་པའི་དབུ་ཁྲིད་སྐུ་ཞབས་ན་རེན་དྲ་མོ་དི་ Narendra Modi མཆོག་ལ་རྒྱ་གར་རྒྱལ་ཡོངས་གྲོས་ཚོགས་འོག་མའི་འོས་བསྡུའི་ནང་རྒྱལ་ཁ་ཆེན་པོ་ཐོབ་པར་འཚམས་འདྲི་མཛད་པའི་ནང་འཁོད་དོན། ངོས་ཀྱིས་རྒྱུན་ལྡན་རྒྱ་གར་ནི་འཛམ་གླིང་ནང་མང་གཙོའི་རྒྱལ་ཁབ་ཆེ་ཤོས་ཤིག་དང་སྲོལ་རྒྱུན་ནས་དར་བའི་འཚེ་མེད་ཞི་བའི་ལྟ་གྲུབ་ལ་གཞི་བཅོལ་བའི་ལྷོ་ཨེ་ཤི་ཡའི་ནང་བརྟན་ལྷིང་ལྡན་པའི་རྒྱལ་ཁབ་གཅིག་ཡིན་པ་དང་། རྒྱ་གར་ནང་སྐད་ཡིག་དང་རིག་གཞུང་། ཆོས་ལུགས་སོགས་འདྲ་མིན་སྣ་ཚོགས་ཆིག་སྒྲིལ་དང་འཆམ་མཐུན་ངང་གནས་ཐུབ་བཞིན་ཡོད་པར་བརྟེན། འཛམ་གླིང་རྒྱལ་ཁབ་གཞན་ཚོས་མིག་དཔེ་ལྟ་དགོས་པ་ཞིག་ཡིན། ཞེས་སྤོབས་སེམས་ཆེན་པོའི་ཐོག་ནས་རྗོད་བཞིན་ཡོད། ཅེས་བཀའ་སྩལ་ཡོད་པ་མ་ཟད། སྐུ་ཞབས་མོ་དི་མཆོག་གིས་དེ་སྔ་གུ་ཇ་ར་ཏི་མངའ་སྡེའི་ནང་ཡར་རྒྱས་བཏང་བ་བཞིན་འབྱུང་འགྱུར་ཁོང་གི་དབུ་ཁྲིད་འོག་རྒྱ་གར་རྒྱལ་ཡོངས་ནང་ཡར་རྒྱས་མུ་མཐུད་འགྲོ་ཐུབ་པའི་རེ་བ་ཞུ་རྒྱུ་དང་། ཁོང་གིས་འབྱུང་འགྱུར་དཀའ་ངལ་རྣམས་ལམ་ལྷོང་ལྡན་པའི་ངང་སེལ་ཏེ་འཕགས་ཡུལ་གྱི་མང་ཚོགས་རྣམས་ཀྱི་རེ་འདུན་ལྷུན་གྱིས་འགྲུབ་པའི་སྨོན་འདུན་ཡོད། ཅེས་འཚམས་འཕྲིན་སྩལ་འདུག
