༢༠༡༤ ཟླ་ ༤ ཚེས་ ༣༠ རེས་གཟའ་ལྷག་པ།
༄༅། །འདི་གར་གནས་ཚུལ་བཏང་འབྱོར་བྱུང་བ་ལྟར་ན། ཉེ་བའི་བདུན་ཕྲག་གཅིག་གི་གོང་བོད་ཀྱི་གྲོང་ཁྱེར་ལྷ་སའི་ཉེ་འགྲམ་སྟག་རྩེ་རྫོང་ཁོངས་བསམ་གྲུབ་གླིང་གི་མང་ཚོགས་བརྒྱ་ཕྲག་བརྒལ་བས། ས་གནས་རྒྱ་ནག་གིས་ས་ཞིང་གཞུང་བཞེས་བཏང་རྗེས་གུན་གསབ་སྤྲོད་ཕྱོགས་ཐད་འདོད་བློ་མ་ཁེངས་བར་རྫོང་སྲིད་གཞུང་གི་འབྲེལ་ཡོད་ཚན་པར་ཞུ་གཏུག་ངོ་རྒོལ་བྱས་ཡོད་པ་རེད། འོན་ཀྱང་རྫོང་ནས་ཡ་ལན་མ་སྤྲད་པར་བརྟེན་ལྷ་ས་གྲོང་ཁྱེར་སྲིད་གཞུང་ལ་ཞུ་གཏུག་བྱེད་པར་བསྐྱོད་སྐབས་ཚལ་གུང་ཐང་ནས་རྒྱ་ནག་གི་ཉེན་རྟོག་པ་ཚོས་འགྲོ་ལམ་བཀག་ནས་ལྷ་སར་བསྐྱོད་དུ་བཅུག་མེད་པ་རེད་འདུག དེ་ནི་གཙོ་བོ་མང་ཚོགས་ཀྱི་ཤེས་རྟོགས་ལྟར་ན། ལྷ་སའི་ཁྲེན་ཀོན་ཆུས་ཁོངས་ཚལ་གུང་ཐང་ཡུལ་ཚོའི་མང་ཚོགས་ལ་གུན་གསབ་ས་ཞིང་མུའུ་རེར་རྒྱ་སྒོར་༡༦༠༠༠༠ སྤྲད་ཡོད་ཀྱང་། སྟག་རྩེ་རྫོང་ཁོངས་ཀྱི་བསམ་གྲུབ་གླིང་གི་ཞིང་པར་གུན་གསབ་མུའུ་རེར་རྒྱ་སྒོར་ ༣༢༠༠༠ ལས་སྤྲད་མེད་པར་བརྟེན་མང་ཚོགས་ཀྱི་འདོད་བློ་མ་ཁེངས་བར་ངོ་རྒོལ་བྱས་པ་ཡིན་ཚུལ་ཤོད་བཞིན་པ་རེད།
ས་གནས་མང་ཚོགས་ཀྱི་ས་ཞིང་གཞུང་བཞེས་བཏང་བ་ནི་ལྷ་ས་ནས་ཀོང་པོ་བར་གཞུང་ལམ་བཟོ་བཞིན་པའི་ལམ་ཐིག་འཁེལ་བའི་ལྷ་སའི་ཁྲེན་ཀོན་ཆུས། སྟག་རྩེ་རྫོང་། མལ་གྲོ་རྫོང་། ཀོང་པོ་བཅས་ཀྱི་ས་གནས་མི་ཉུང་བ་ཚུད་ཡོད་པ་རེད།
ཡང་གནས་ཚུལ་ཡོང་ཁུངས་གཞན་ལྟར་ན། ས་ཞིང་གཞུང་བཞེས་བྱས་པའི་དཀའ་ངལ་དེ་སྟག་རྩེ་རྫོང་གི་བདེ་ཆེན་གྲོང་ཚོ་དང་། བསམ་གྲུབ་གླིང་གྲོང་ཚོ་སོགས་ཡིན་པ་དང་། ཞིང་པར་ས་ཞིང་མེད་ན་འཚོ་བ་སྐྱེལ་ཐབས་དཀའ་བས་ངོ་རྒོལ་བྱེད་བཞིན་པ་བརྗོད་ཡོད་འདུག
