༢༠༡༤ ཟླ་ ༤ ཚེས་ ༢ རེས་གཟའ་ལྷག་པ།
༄༅། །ཕྱི་ལོ་ ༢༠༡༤ ཟླ་ ༣ ཚེས་ ༣༡ ཉིན་ཡུ་རོབ་གྲོས་ཚོགས་ཀྱི་འཐུས་མི་བགྲེས་པ་ཁག་གཅིག་གིས་གསར་འགོད་གསལ་བསྒྲགས་ཤིག་སྤེལ་བའི་ནང་ཡུ་རོབ་མཐུན་ཚོགས་ཀྱི་འགོ་ཁྲིད་ཚོས་ཐེངས་འདིར་རྒྱ་ནག་གི་སྲིད་འཛིན་ཞི་ཅིན་ཕིང་ Xi Jinping ཐུགས་འཕྲད་གནང་སྐབས། བོད་ནང་དུ་རྒྱ་ནག་གཞུང་གིས་དྲག་གནོན་དང་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་བཞིན་པ་དེར་སེམས་འཚབ་ཀྱི་རྣམ་པ་ཤུགས་ཆེ་སྟོན་དགོས་པའི་འབོད་སྐུལ་ཞུས་འདུག དེ་ཡང་ཕྱི་ལོ་ ༢༠༡༤ ཟླ་ ༣ ཚེས་ ༣༡ ཉིན་ཡུ་རོབ་གྲོས་ཚོགས་ཀྱི་འཐུས་མི་དང་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ཐོ་མ་སི་མཱན་ (Thomas Mann) མཆོག་གིས་གསར་འགོད་གསལ་བསྒྲགས་ཤིག་སྤེལ་བ་དེའི་ནང་འཁོད་དོན། ཡུ་རོབ་སྤྱི་མཐུན་ཚོགས་པའི་འཛིན་སྐྱོང་འགན་འཛིན་སྐུ་ཞབས་ཧར་མན་ཝེན་རོམ་པོ་ཡེ་མཆོག་དང་། (Council President Herman van Rompuy) དེ་བཞིན་སྐུ་ཞབས་མེ་ནུ་ཡེལ་བྷ་རོ་སོ་མཆོག (Commission President Manuel Barroso) གཞན་ཡང་ཡུ་རོབ་གྲོས་ཚོགས་ཀྱི་ཚོགས་གཙོ་མར་ཊིན་ཤལ་ཛི་མཆོག་ (Martin Schulz, the President of the EP) བཅས་ལ་ཕྱི་ཟླ་ ༤ ཚེས་ ༡ ཉིན་སྲིད་འཛིན་ཞི་ཅིན་ཕིང་དང་མཉམ་ཐུག་འཕྲད་སྐབས་འགྲོ་བ་མིའི་ཐོབ་ཐང་གི་གནད་དོན་སྐོར་ནན་པོ་གླེང་དགོས་པའི་རེ་འདུན་ཡང་བཏོན་ཡོད། དེ་བཞིན་ཁོང་གིས་གསུང་དོན། ཡུ་རོབ་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པས་རྒྱ་ནག་ནང་གི་འགྲོ་བ་མིའི་ཐོབ་ཐང་ལ་བརྩིས་མེད་རྡོག་རོལ་གཏོང་བཞིན་པ་དེར་སྐྱོན་བརྗོད་ཤུགས་ཆེ་གནང་བ་མ་ཟད། བགྲོ་གླེང་དང་གཞུང་འབྲེལ་གྲོས་ཆོད་གལ་ཆེ་རིགས་མང་དག་གཅིག་བཞག་ཡོད། དེར་བརྟེན་དེ་རིང་རྒྱ་ནག་གི་སྲིད་འཛིན་ས་གནས་སུ་བསླེབས་སྐབས་དང་བསྟུན་བོད་དོན་རྒྱབ་སྐྱོར་གྱི་བསྒྲགས་གཏམ་ཤུགས་ཆེ་སྤེལ་ཏེ་ལངས་ཕྱོགས་གསལ་སྟོན་གནང་དགོས། ཐེངས་འདིའི་རྒྱ་ནག་སྲིད་འཛིན་གྱིས་གཟིགས་སྐོར་དེས་ཡུ་རོབ་སྒྲིག་འཛུགས་འདི་རྒྱ་ནག་གཞུང་ལ་གལ་ཆེ་ཞིག་ཆགས་ཡོད་པ་མཚོན་བཞིན་ཡོད། དེར་བརྟེན་ཡུ་རོབ་མཐུན་ཚོགས་ཀྱི་འགོ་ཁྲིད་ཚོས་འགྲོ་བ་མིའི་ཐོབ་ཐང་གི་གནད་དོན་གལ་ཆེར་བརྩི་བཞིན་ཡོད་པ་རྒྱ་ནག་གཞུང་ལ་གསལ་སྟོན་གནང་རྒྱུའི་འགན་ཆེན་པོ་ཡོད། ཅེས་གསུངས། གཞན་ཡང་ཁོང་གིས་མུ་མཐུད་གསུང་དོན། ཡུ་རོབ་མཐུན་ཚོགས་དང་རྒྱ་ནག་དབར་ཚོང་འབྲེལ་གྱི་གྲོས་མཐུན་འཇོག་སྐབས་སྤྱི་ཚོགས་དང་ཁོར་ཡུག་གི་གནད་དོན་ངེས་པར་དུ་གླེང་དགོས་པ་མ་ཟད། རྒྱ་ནག་གཞུང་གིས་གཞི་རྩའི་འགྲོ་བ་མིའི་ཐོབ་ཐང་ལ་བརྩི་བཀུར་མ་བྱས་བར་ཡུ་རོབ་མཐུན་ཚོགས་ཀྱིས་རྒྱ་ནག་ལ་གོ་མཚོན་འཚོང་རྒྱུར་དམ་བསྒྲགས་བྱེད་བཞིན་པ་འདི་མུ་མཐུད་གནས་དགོས། ཞེས་གསུངས་འདུག
