༢༠༡༤ ཟླ་ ༤ ཚེས་ ༢༡ རེས་གཟའ་ཟླ་བ།
༄༅། །ཕྱི་ལོ་ ༢༠༡༤ ཟླ་ ༤ ཚེས་ ༢༡
ཉིན་གྱི་ཕྱེད་ཡོལ་ཆུ་ཚོད་ ༣།༣༠ ཐོག་དབུས་བོད་མིའི་སྒྲིག་འཛུགས་ཀྱི་འོས་བསྡུ་ལས་ཁང་དུ་འོས་བསྡུའི་འགན་འཛིན་འཇམ་དཔལ་ཆོས་བཟང་མཆོག་དང་འགན་འཛིན་ལས་འཕར་དགེ་བཤེས་རིག་འཛིན་ཆོས་གྲགས་ལགས་གཉིས་ཀྱིས་བོད་པའི་གསར་འགོད་པ་རྣམས་ལ་མདོ་སྨད་སྤྱི་འཐུས་གཅིག་གི་བར་མའི་དངོས་གཞིའི་འོས་མི་གསུམ་གྱི་མིང་གཞུང་གསལ་བསྒྲགས་གནང་སོང་།
དེ་ཡང་ཐོག་མར་འོས་བསྡུའི་འགན་འཛིན་འཇམ་དཔལ་ཆོས་བཟང་མཆོག་གིས་འོས་བསྡུའི་སྐོར་ངོ་སྤྲོད་གསུང་བཤད་གནང་དོན། མདོ་སྨད་སྤྱི་འཐུས་གཅིག་གི་བར་མའི་འོས་བསྡུའི་ལས་རིམ་སྔོན་འགྲོའི་འོས་བསྡུ་གོང་དུ་ང་ཚོས་གསལ་བསྒྲགས་བྱས་ཡོད། ལས་རིམ་འདིའི་ནང་དུ་ཕྱི་ཟླ་ ༤ ཚེས་ ༢༡ ཉིན་དངོས་གཞིའི་འོས་མི་དེ་དག་གསལ་བསྒྲགས་བྱེད་རྒྱུ་དེ་རེད། དངོས་གཞིའི་འོས་མི་གསལ་བསྒྲགས་བྱེད་རྒྱུར་དེ་སྔ་ཞུས་པ་ལྟར། ད་རེས་བར་མའི་འོས་བསྡུའི་ནང་རྒྱ་གར་དང་བལ་ཡུལ་ཐེ་བའི་ས་གནས་འོས་བསྡུ་ལས་ཁང་ཁག་ ༤༦ མཉམ་ཞུགས་གནང་ཡོད། འོས་བསྡུའི་སྒྲིག་གཞི་ནང་ལྟར། དངོས་གཞིའི་འོས་བསྡུ་གསལ་བསྒྲགས་བྱེད་པར་འོས་མི་གཅིག་འདེམས་དགོས་ན། དེའི་ཉིས་ལྡབ་ལས་མ་ཉུང་བའི་སྒང་ལ་དང་བླངས་ཡོད་ན། དང་བླངས་དེ་དག་གསལ་བསྒྲགས་བྱེད་དགོས། འོན་ཀྱང་མདོ་སྨད་སྤྱི་འཐུས་གཅིག་གི་བར་མའི་འོས་བསྡུ་ནང་དང་བླངས་གཅིག་ཀྱང་མེད། ཅེས་སོགས་ཀྱི་ངོ་སྤྲོད་གནང་གྲུབ་མཚམས་འགན་འཛིན་ལས་འཕར་དགེ་བཤེས་རིག་འཛིན་ཆོས་གྲགས་ལགས་ཀྱིས་ཐེངས་འདིའི་བར་མའི་དངོས་གཞིའི་འོས་མི་གསལ་བསྒྲགས་གནང་གསལ།
༡༽བཀྲ་ཤིས་དོན་གྲུབ། ཕ་ཡུལ་མགོ་ལོག་གསེར་རྟ། ད་ལྟའི་སྡོད་གནས་བལ་ཡུལ།
༢༽ཚངས་དབྱངས་རྒྱ་མཚོ། ཕ་ཡུལ། མགོ་ལོག ད་ལྟའི་སྡོད་གནས་རྡ་ས།
༣༽ཀརྨ་དགེ་ལེགས། ཕ་ཡུལ། བྱ་ཁྱུང། ད་ལྟའི་སྡོད་གནས་བྷན་ངྷ་ར། ཅེས་ངོ་སྤྲོད་གནང་གྲུབ་མཚམས་གསར་འགོད་པའི་དྲི་བ་ཁག་ལ་ལན་འདེབས་གནང་ཡོད་པ་བས།།
