༢༠༡༤ ཟླ་ ༤ ཚེས་ ༢༤ རེས་གཟའ་ཕུར་བུ།
༄༅། །ཕྱི་ལོ་ ༢༠༡༤ ཟླ་ ༤ ཚེས་ ༢༣ ཉིན་གྱི་སྔ་དྲོ་ཆུ་ཚོད་ ༡༠།༣༠ ཐོག་ཆོལ་གསུམ་ཆིག་སྒྲིལ་ཚོགས་པ་མི་ལོ་ ༥༠ འཁོར་བའི་དུས་དྲན་མཛད་སྒོ་ (Club House )ནང་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་གཙོས་ཧིན་བོད་མཛའ་འབྲེལ་ཚོགས་པའི་ཚོགས་གཙོ་དང་རྒྱུན་ལས་རྣམ་པ། རྡ་སའི་གཞུང་འབྲེལ་མིན་པའི་ཚོགས་པ་ཁག་གི་ཚོགས་གཙོ་དང་སྐུ་ཚབ་རྣམ་པ། དེ་བཞིན་ཚོགས་པ་དེའི་རྒྱུན་ལས་ཟུར་པ་རྣམ་པ། ཚོགས་མི་བཅས་ཁྱོན་མི་གྲངས་ ༧༠ བརྒལ་བ་འཛོམས་ཐོག་ཚོགས་འདུག
དེ་ཡང་མཛད་སྒོའི་ཐོག་མར་སྐུ་མགྲོན་གཙོ་བོ་མཆོག་གིས་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་མཐོང་གྲོལ་རིན་པོ་ཆེར་མཇལ་དར་སྒྲོལ་འབུལ་དང་འབྲེལ་སྣང་གསལ་ཞལ་འབྱེད་གནང་། དེ་ནས་ཚང་མ་སྐུ་བཞེངས་ཐོག་བོད་རྒྱལ་ཁབ་ཆེན་པོའི་རྒྱལ་གླུ་བཏང་གྲུབ་མཚམས། བོད་བསྟན་སྲིད་ཆེད་རང་སྲོག་བློས་གཏོང་གནང་མཁན་གྱི་རྒྱལ་གཅེས་པ་ཕོ་མོ་འདས་གསོན་ཡོངས་ལ་གདུང་སེམས་མཉམ་སྐྱེ་མཚོན་སླད་མྱ་ངན་གུས་འདུད་དང་ངག་བཅད་སྐར་མ་གཅིག་ཞུས་ཡོད། དེ་རྗེས་ཆོལ་གསུམ་ཆིག་སྒྲིལ་ཚོགས་པའི་ཚོགས་གཙོ་བསྟན་འཛིན་གྲགས་པ་ལགས་ཀྱིས་ཚོགས་པ་ངོ་སྤྲོད་ཀྱི་གསུང་བཤད་དང་དྲུང་ཆེ་སྨན་པ་བསོད་ནམས་ཕུན་ཚོགས་ལགས་ཀྱིས་ལས་བསྡོམས་སྒྲོགས་སྦྱང་གནང་ཡོད། དེ་ནས་སྐུ་མགྲོན་གཙོ་བོ་སྤྱི་འཐུས་ཚོགས་གཙོ་མཆོག་གིས་གཏམ་བཤད་གནང་དོན། དེ་རིང་འདི་གར་ཕེབས་པའི་རྣམ་པ་ལྷན་རྒྱས་ཚང་མར་འཚམས་འདྲི་ཞུ་རྒྱུ་ཡིན། སྤྱིར་བཏང་ཆོས་རྒྱལ་ཚོའི་སྐབས་ནས་བཟུང་བོད་ཆོལ་ཁ་གསུམ་གཅིག་ཏུ་བསྡུས་དང་མ་བསྡུས་པའི་གནས་སྟངས་མང་པོ་བྱུང་ཡོད། བོད་ས་མ་ཤོར་བའི་གོང་བོད་ཆོལ་ཁ་གསུམ་གཅིག་སྒྲིལ་ཡོང་རྒྱུ་ཕར་ཞོག ཐ་ན་ཆོལ་ཁ་སོ་སོའི་ནང་ས་ཁུལ་དང་ལུང་ཚན་བར་མ་མཐུན་པའི་གནས་སྟངས་མང་པོ་ཞིག་ཆབ་སྲིད་ཀྱི་ཐོག་ནས་བྱུང་ཡོད།
འོན་ཀྱང་། ཆོས་ཕྱོགས་ཀྱི་ཐོག་ནས་བོད་མི་རྣམ་ས་རྡོག་རྩ་ཆིག་བསྒྲིལ་བྱུང་ཡོད། ལྷག་པར་བཙན་བྱོལ་ལ་གྱར་རྗེས། ང་ཚོས་རྒྱ་གར་སྐད་དང་འགྲོ་ལུགས་འགྲོ་སྟངས་མ་ཤེས་བ་དང་ལྟ་རྒྱ་མཐོང་རྒྱ་མེད་པའི་དཀའ་ངལ་འོག ཆིག་སྒྲིལ་གྱི་ཚོགས་པ་བཙུགས་ཏེ་ཆོལ་ཁ་ཙམ་མ་ཡིན་པའི་ཆོས་བརྒྱུད་ཁག་གི་སྐུ་ཚབ་ཡོད་པའི་ཚོགས་པ་ཞིག་ཆགས་ཡོད། ཚོགས་པ་འདི་བརྒྱུད་ནས་ཆོལ་ཁ་གསུམ་གྱི་གནད་ཡོད་མི་སྣ་ཚོ་ཕན་ཚུན་ཐུག་འཕྲད་དང་བསམ་བློ་བརྗེ་རེས་བྱེད་རྒྱུའི་སྡིངས་ཆ་བསྐྲུན་ཡོད་པར་ངོས་འཛིན་ཞུ་བཞིན་ཡོད། འོན་ཀྱང་བར་ལམ་ཞིག་ནས་ཆིག་སྒྲིལ་ཚོགས་པའི་ལས་དོན་བྱེད་ཕྱོགས་ལ་ཉམས་ཆགས་ཕྱིན་པ་རེད། དེང་སང་ང་ཚོའི་སྤྱི་ཚོགས་ནང་སྤྱི་པའི་སྒྲིག་འཛུགས་ལ་ཤུགས་རྒྱག་རྒྱུ་ཉུང་དུ་སོང་སྟེ། ཡན་ལག་བྱེ་བྲག་པ་ཚོ་ཤུགས་ཆེན་པོ་ཆགས་པའི་གནས་སྟངས་ཤིག་ལོ་རྒྱུས་ཐོག་བྱུང་བ་རེད། གངས་ཅན་ཆིག་སྒྲིལ་ཚོགས་པ་བཙུགས་ནས་མི་ལོ་ ༥༠ འཁོར་བའི་དུས་དྲན་སྲུང་བརྩི་བྱེད་བཞིན་ཡོད། མདོར་ན། སྒྲིག་འཛུགས་གང་ཞིག་ཡོད་པ་དེ་དག་གིས་སྤྱི་ཚོགས་ལ་ཕན་ཐོགས་པའི་ལས་ཀ་བྱེད་ཐུབ་པ་དགོས་རྒྱུ་གལ་ཆེན་པོ་རེད། ད་ལྟའི་ཆོལ་གསུམ་ཆིག་སྒྲིལ་ཚོགས་པའི་རྒྱུན་ལས་རྣམ་པ་ཡིན་ནའང་རེད། ཆོལ་གསུམ་ཆིག་སྒྲིལ་ཚོགས་པ་བརྗོད་སྐབས་ཆོལ་ཁ་གསུམ་གྱི་འཐུས་མི་ཆ་ཚང་ཡོད་པའི་ཐོག་ནས་ཆོལ་ཁ་གསུམ་གྱི་བསམ་ཚུལ་ཚང་མ་སྤུངས་ཐུབ་ས་དང་ཆོལ་ཁ་གསུམ་གྱི་ནུས་པ་འདོན་ཐུབ་ས་ཞིག་ཡིན་དགོས། མ་འོངས་བར་ཚོགས་པའི་སྒྲིག་གཞི་དང་ལས་གཞི་ག་འདྲ་ཞིག་བཟོ་དགོས་མིན་ཆབ་སྲིད་ཐོག་ལ་རྣམ་འགྱུར་ག་འདྲ་ཞིག་སྟོན་དགོས་མིན་ལའང་བསམ་བློ་གཏོང་དགོས་རྒྱུ་གལ་ཆེན་རེད། ཅེས་སོགས་ཀྱི་གསུང་བཤད་གནང་སྟེ་དངོས་གཞིའི་མཛད་སྒོ་མཇུག་བསྒྲིལ་ཡོད་པ་བཅས། །
