༢༠༡༤ ཟླ་ ༤ ཚེས་ ༢༡ རེས་གཟའ་ཟླ་བ།

༄༅། །ཕྱི་ལོ་ ༢༠༡༤ ཟླ་ ༤ ཚེས་ ༡༩ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་ཉི་ཧོང་ནས་རྡ་སར་༸ཞབས་སོར་འཁོད་མ་ཐག་ལྷོ་ཀོ་རི་ཡའི་སྲིད་འཛིན་ལྕམ་སྐུ་པཀ་གྷེན་ཧུའི་ Ms Park Geun-hye མཆོག་ལ་ཉེ་ལམ་ལྷོ་ཀོ་རི་ཡའི་མཚོ་གྲུ་ཞིག་གྲུ་ལོག་ཤོར་ནས་སློབ་ཕྲུག་མང་པོ་འཆི་སྐྱོན་ཤོར་བར་བརྟེན་སེམས་གསོའི་གསུང་འཕྲིན་ཞིག་སྩལ་བའི་ནང་འཁོད་དོན། ཐེངས་འདིར་ཨན་སན་ Ansan གྲོང་ཁྱེར་གྱི་ཌེན་ཝོན་སློབ་གྲྭ་ཆེ་བའི་ Danwon High School སློབ་ཕྲུག་གྲངས་ ༣༥༠ བཞུགས་པའི་གྲུ་གཟིང་ཞིག་གྲུ་ལོག་ཤོར་ནས་སློབ་ཕྲུག་མང་པོའི་ཚེ་སྲོག་ཤོར་བར་ངོས་རང་ཧ་ཅང་བློ་ཕམ་བྱུང་། ལྷག་པར་སློབ་ཕྲུག་དེ་དག་གི་ཕ་མ་སྤུན་ཉེ་རྣམས་དེང་སྐབས་སེམས་ངལ་ཧ་ཅང་ཆེན་པོས་རྡུང་བཞིན་ཡོད་པར་ངོས་ཀྱིས་གདུང་སེམས་མཉམ་སྐྱེ་ཞུས་པ་དང་སྦྲགས། གོད་ཆག་འོག་འདས་གྲོངས་སུ་གྱུར་བ་རྣམས་ལ་སྨོན་ལམ་རྒྱག་རྒྱུ་དང་ཤུལ་ལུས་ནང་མི་སྤུན་མཆེད་ཙམ་མ་ཟད། ལྷོ་ཀོ་རི་ཡའི་སྲིད་འཛིན་མཆོག་དང་མི་མང་རྣམས་ལ་དཀའ་ངལ་ཧ་ཅང་ཆེ་བའི་དུས་སྐབས་འདིར་ངོས་ཀྱིས་ཁྱེད་རྣམས་ལ་གདུང་སེམས་མཉམ་སྐྱེ་དང་སེམས་གསོ་ཞུ་རྒྱུ་ཡིན། ཞེས་འཁོད་ཡོད། གསུང་འཕྲིན་ངོ་མ་དབྱིན་ཡིག་ནང་ཡོད་པ་ནས་འདི་ག་ཕྱི་དྲིལ་བོད་ཡིག་ཚན་པས་ཕབ་བསྒྱུར་ཞུས་པས་དབྱིན་ཡིག་ལ་རྩ་འཛིན་ཡོང་བ་ཞུ།