༢༠༡༤ ཟླ་ ༤ ཚེས་ ༢ རེས་གཟའ་ལྷག་པ།

༄༅། །ཝི་ཏི་ནམ་རྒྱལ་ཡོངས་ནང་པའི་ལྷན་ཚོགས་ National Vietnam Buddhist Sangha ཀྱི་དབུ་བླ་དང་པོ་དགུང་གྲངས་ ༩༧ ལ་ཕེབས་པ་སྐུ་ཞབས་ཐིག་ཊི་ཏིན་ Thich Tri Tinh མཆོག་དགོངས་པ་རྫོགས་པའི་གནས་ཚུལ་ཐོན་པར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༢༠༡༤ ཟླ་ ༤ ཚེས་ ༡ ཉིན་ཝི་ཏི་ནམ་རྒྱལ་ཡོངས་ནང་པའི་ལྷན་ཚོགས་ལ་ཐུགས་གསོའི་གསུང་འཕྲིན་ཞིག་སྩལ་ཡོད་པའི་ནང་འཁོད་དོན། ངོས་ཀྱིས་དབུ་བླ་དམ་པ་ཁོང་གི་ཆེད་སྨོན་ལམ་རྒྱག་རྒྱུ་དང་ཝི་ཏི་ནམ་དང་དེ་བཞིན་ས་ཕྱོགས་གཞན་དུ་གནས་འཁོད་ཁོང་གི་དད་ལྡན་རྗེས་འབྲང་པ་རྣམས་ལ་སེམས་གསོ་དང་གདུང་སེམས་མཉམ་སྐྱེ་ཞུ་རྒྱུ་ཡིན། ཞེས་བཀའ་སྩལ་བ་དང་སྦྲགས། དབུ་བླ་དམ་པ་ཁོང་གིས་ཝི་ཏི་ནམ་ཡུལ་དུ་རྒྱལ་བའི་བསྟན་པ་འཛིན་སྐྱོང་སྤེལ་གསུམ་ལ་རླབས་ཆེན་གྱི་བྱས་རྗེས་འཇོག་གནང་མཛད་པ་དེ་དག་ཐུགས་ལ་དྲན་གསོ་མཛད་དེ་རྗེས་འཇུག་འདུལ་བྱ་རྣམས་ཀྱིས་བྱམས་བརྩེ་དང་འཚེ་མེད་ཞི་བའི་ལམ་ནས་ལས་དོན་སྤེལ་ཐུབ་ཚེ་དམ་པ་ཁོང་གི་བཀའ་དྲིན་རྗེས་དྲན་གྱི་ལེགས་སྐྱེད་མཚོན་ཐུབ། ཅེས་འཁོད་འདུག

གསུང་འཕྲིན་ངོ་མ་དབྱིན་ཡིག་ནང་སྩལ་ཡོད་པ་ནས་འདི་ག་ཕྱི་དྲིལ་བོད་ཡིག་ཚན་པས་ཕབ་བསྒྱུར་ཞུས་པས་དབྱིན་ཡིག་ལ་རྩ་འཛིན་ཡོང་བ་ཞུ།