༢༠༡༤ ཟླ་ ༣ ཚེས་ ༡༣ རེས་གཟའ་ཕུར་བུ།

༄༅། །ཕྱི་ལོ་ ༢༠༡༤ ཟླ་ ༣ ཚེས་ ༡༢ ཉིན་བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱི་ཁྱབ་ཁོངས་བུད་མེད་ནུས་ཤུགས་གོང་སྤེལ་ཚན་པས་ Women’s Empowerment Desk གོ་སྒྲིག་འོག་རྒྱ་གར་བྱང་ཕྱོགས་ས་གནས་ཨཏྟར་ཁཎྜ་ Uttrakhand དང་ཧི་མཱ་ཅལ་མངའ་སྡེའི་ནང་རྟེན་གཞི་བྱས་པའི་བཙུན་དགོན་ཁག་གི་བཙུན་མ་རྣམས་ལ་ནུས་ཤུགས་གོང་སྤེལ་དང་། དེ་བཞིན་བཙུན་མའི་དགོས་མཁོ་ཁག་ལ་དཔྱད་ཞིབ་བྱ་རྒྱུའི་ཟབ་སྦྱོང་དེ་འབྲེལ་ཡོད་ལས་བྱེད་བསྟན་འཛིན་ཚེ་དབྱངས་ལགས་ཀྱིས་གོང་ཚེས་ཉིན་ཐོག་མར་བདེ་སྐྱིད་གླིང་བོད་མིའི་གཞིས་ཆགས་སུ་རྟེན་གཞི་བྱས་པའི་ས་སྐྱ་རིན་ཆེན་ཆོས་གླིང་བཙུན་དགོན་དུ་དབུ་འཛུགས་ཞུས་ཡོད། དེ་རྗེས་ས་སྐྱ་མཐོ་སློབ་དང་འབྲི་གུང་བསམ་གཏན་གླིང་བཙུན་དགོན། དེ་བཞིན་ཌོ་ལན་ཇི་བོན་གཞིས་སུ་རྟེན་གཞི་བྱས་པའི་རཏྣཱ་སྨན་གླིང་བཙུན་དགོན་དང་། དཔལ་སྤུངས་ཤེས་རབ་གླིང་སོགས་ཀྱི་བཙུན་མ་བཅས་ཁྱོན་བཙུན་མ་གྲངས་ ༣༣༠ བརྒལ་བར་ཟབ་སྦྱོང་སྤྲོད་རྒྱུ་ཡིན་འདུག དེ་སྔ་ཟབ་སྦྱོང་སྤྲོད་ཐེངས་དང་པོ་ཕྱི་ལོ་ ༢༠༡༢ ལོར་རྡ་སའི་ཉེ་འཁོར་དུ་རྟེན་གཞི་བྱས་པའི་བཙུན་དགོན་ཁག་འདྲ་མིན་གྱི་བཙུན་མ་ཁྱོན་བསྡོམས་ ༢༧༥ ལ་ཕུལ་ཡོད།
ཐེངས་འདིའི་ཟབ་སྦྱོང་སྐབས་ཀྱི་སློབ་སྟོན་པ་འབྲི་གུང་བཀའ་བརྒྱུད་བཙུན་དགོན་འགན་འཛིན་རྣམ་རྒྱལ་ལྷ་མོ་སྟག་ལྷ་ལགས་དང་འབྲི་གུང་བཀའ་བརྒྱུད་དགོན་པའི་མཁན་པོ་རང་གྲོལ་ལགས། སྨན་པ་བསོད་ནམས་དབང་མོ་ལགས། ༸སྐུའི་བླ་ཞབས་ཟུར་པ་བསྟན་འཛིན་ཟླ་སྒྲོན་ལགས། སྤྱི་འཐུས་ཤར་གླིང་ཟླ་སྒྲོན་ལགས་སོགས་ཡིན་པ་མ་ཟད། འབྲེལ་ཡོད་ས་གནས་གཞིས་ལས་ཁང་གི་ལས་བྱེད་རྣམས་ཀྱང་ཕེབས་འདུག