༢༠༡༤ ཟླ་ ༣ ཚེས་ ༡༡ རེས་གཟའ་མིག་དམར།

༄༅། །ཕྱི་ལོ་ ༢༠༡༤ ཟླ་ ༣ ཚེས་ ༡༠ ཉིན་ཕ་རན་སིའི་རྒྱལ་ས་པེ་རི་སིར་ Paris བོད་མི་དང་བོད་དོན་རྒྱབ་སྐྱོར་བ་བརྒྱ་ཕྲག་མང་པོས་ལག་ཏུ་རྒྱལ་དར་དང་སྦྱར་ཡིག་སོགས་འཁྱེར་བ་མ་ཟད། བོད་མིར་གཞི་རྩའི་འགྲོ་བ་མིའི་ཐོབ་ཐང་སྤྲོད་དགོས་པ་དང་། རྒྱ་ནག་གཞུང་གིས་བོད་ཀྱི་གནད་དོན་སེལ་ཆེད་གྲོས་མོལ་བྱེད་དགོས་པ་སོགས་ཀྱི་འབོད་ཚིགས་བསྒྲགས་ཏེ་གསུམ་བཅུའི་དུས་དྲན་ཐེངས་ ༥༥ སྲུང་བརྩི་གཟབ་རྒྱས་ཞུས་ཡོད། སྐབས་དེར་སྐུ་ཚབ་དོན་གཅོད་དངོས་བསྒྲུབ་རྡོ་རྗེ་ལགས་ཀྱིས་བཀའ་ཤག་གི་གསུང་འཕྲིན་བཀླགས་པ་མ་ཟད། ཕ་རན་སིའི་ས་གནས་བོད་རིགས་ཚོགས་པའི་ཚོགས་གཙོས་ཕ་རན་སིའི་སྐད་ནང་ཕབ་བསྒྱུར་ཞུས་པའི་བཀའ་ཤག་གི་གསུང་འཕྲིན་སྒྲོག་སྦྱངས་ཞུས། དེ་རྗེས་ཕ་རན་སིའི་གྲོས་ཚོགས་གོང་མའི་བོད་དོན་རྒྱབ་སྐྱོར་ཚོགས་པའི་འཐུས་མི་སྐུ་ཞབས་ཨན་དེ་རེ་གྷ་ཏོ་ལིན་ Mr. Andre Gattolin མཆོག་གིས་མཛད་སྒོ་དང་འབྲེལ་བའི་གསུང་བཤད་གནང་སྐབས་ཕ་རན་སིའི་གྲོས་ཚོགས་གོང་མའི་བོད་དོན་རྒྱབ་སྐྱོར་ཚོགས་པའི་ཚབ་ཞུས་ནས་བོད་མི་ཚོའི་དཀའ་ངལ་ལ་གདུང་སེམས་མཉམ་སྐྱེ་ཞུས་པ་དང་སྦྲགས། ཕ་རན་སིའི་སྲིད་འཛིན་སྐུ་ཞབས་ཕ་རན་ཀོ་ཡི་སི་ཧོ་ལན་ཌི་ Francois Hollande མཆོག་ལ་ཨ་རིའི་སྲིད་འཛིན་སྐུ་ཞབས་བྷ་རཀ་ཨོ་བྷ་མ་ Barack Obama མཆོག་ལྟར་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ཕ་རན་སིར་གཞུང་འབྲེལ་གདན་ཞུ་གནང་དགོས་པའི་འབོད་སྐུ་ཞུ་རྒྱུའི་ཁས་ལེན་ཡང་གནང་ཡོད། ཐེངས་འདིའི་གསུམ་བཅུའི་དུས་དྲན་སྐབས་ཕ་རན་སིའི་གྲོང་སྡེ་ལྷན་ཚོགས་ ༦༠༠ ཙམ་གྱིས་བོད་ཀྱི་རྒྱལ་དར་འགྲེང་འཛུགས་བྱས་པ་བརྒྱུད་ནས་བོད་མིའི་བདེན་དོན་ལ་རྒྱབ་སྐྱོར་དང་གདུང་སེམས་མཉམ་སྐྱེའི་རྣམ་པ་ཤུགས་ཆེ་བསྟན་འདུག་པ་བཅས།།