༢༠༡༤ ཟླ་ ༣ ཚེས་ ༦ རེས་གཟའ་ཕུར་བུ།
༄༅། །བོད་རྒྱལ་ལོ་ ༢༡༤༡ ཕྱི་ལོ་ ༢༠༡༤ ཟླ་ ༣ ཚེས་ ༡༠ ཉིན་འདས་ལོ་ ༡༩༥༩ ལོར་བོད་ཀྱི་རྒྱལ་ས་ལྷ་སར་བོད་མི་སེར་སྐྱ་ཁྲི་སྟོང་མང་པོས་བོད་བསྟན་པ་ཆབ་སྲིད་ཀྱི་དོན་དུ་རྒྱ་ནག་བཙན་འཛུལ་བར་ཞི་བའི་སྒེར་ལངས་བྱས་ཏེ་མི་ལོ་ཧྲིལ་པོ་ ༥༥ འཁོར་བའི་དུས་དྲན་སྲུང་བརྩི་དང་སྟབས་བསྟུན་ཇར་མན་གཞུང་གི་ལས་ཁུངས་དང་གྲོང་སྡེ་ལྷན་ཁང་གི་སྟེང་བོད་ཀྱི་རྒྱལ་དར་སྒྲེང་འཛུགས་གནང་རྒྱུ་ཡིན་འདུག
དེ་ཡང་ (Tibet Initiative Deutschland) ཞེས་པའི་ཇར་མན་བོད་དོན་སྣེ་ཁྲིད་ཚོགས་པས་བོད་དོན་ཆེད་བོད་ཀྱི་རྒྱལ་དར་སྒྲེང་འཛུགས་ཞེས་པའི་ལས་འགུལ་ལ་རྒྱབ་སྐྱོར་ཞུ་ཆེད། ཇར་མན་ནང་གི་གྲོང་སྡེ་ལྷན་ཁང་ཁག་གིས་གསུམ་བཅུའི་དུས་དྲན་ཉིན་གཞུང་གི་ལས་ཁུངས་སྟེང་བོད་ཀྱི་རྒྱལ་དར་སྒྲེང་འཛུགས་ཐོག་བོད་མི་ཚོའི་རང་ཐག་རང་གཅོད་ལ་རྒྱབ་སྐྱོར་དང་བོད་ནང་གི་འགྲོ་བ་མིའི་ཐོབ་ཐང་ལ་སྲུང་སྐྱོབ་གནང་རྒྱུའི་བརྡ་སྟོན་གསལ་པོ་ཞིག་ད་ལྟའི་དུས་ཚོད་དེར་སྟོན་གནང་རྒྱུ་གལ་ཆེན་ཡིན་སྐོར་(TID) ཞེས་པའི་ཚོགས་པའི་རྒྱུན་ལས་ཚེ་དབང་ནོར་བུ་ལགས་ཀྱིས་གསུངས་འདུག
དེ་བཞིན་ཇར་མན་ནང་གྲོང་ཁྱེར་ཁག་གི་གཞུང་འབྲེལ་ལས་ཁང་སྟེང་གསུམ་བཅུའི་དུས་དྲན་ཉིན་བོད་ཀྱི་རྒྱལ་དར་སྒྲེང་འཛུགས་གནང་རྒྱུའི་ལས་འགུལ་གྱི་འབྲེལ་མཐུད་པ་(Anna Momburg Vanderpool) ལགས་ཀྱིས་ཇར་མན་གྲོང་ཁྱེར་ཁག་གིས་བོད་དོན་ལ་རྒྱབ་སྐྱོར་ཤུགས་ཆེ་ཡོད་པའི་རྣམ་འགྱུར་ལ་གཟིགས་ནས། ཟླ་བ་འདིའི་ཟླ་མཇུག་ཏུ་རྒྱ་ནག་གི་སྲིད་འཛིན་ཞི་ཅིན་ཕིང་(Xi Jinping) གྲོང་ཁྱེར་སྦར་ལིན་(Berlin)ནང་ལྟ་སྐོར་ལ་འབྱོར་སྐབས། ཇར་མན་སྲིད་བློན་ལྕམ་སྐུ་ཨན་གྷ་ལི་མར་ཀལ་(Angela Merkel)མཆོག་གིས་རྒྱ་ནག་གི་སྲིད་འཛིན་ལ་བོད་ནང་གི་དཀའ་རྙོག་སེལ་ཐབས་སུ་རྒྱ་གཞུང་གིས་བོད་མིའི་སྐུ་ཚབ་དང་ལྷན་ཐད་ཀར་གྲོས་མོལ་བྱེད་དགོས་པའི་བསྐུལ་མ་གནང་དགོས་སྐོར་གསུངས་འདུག