༢༠༡༤ ཟླ་ ༣ ཚེས་ ༡༣ རེས་གཟའ་ཕུར་བུ།
༄༅། །ཕྱི་ལོ་ ༢༠༡༤ ཟླ་ ༣ ཚེས་ ༡༣ ཉིན་གྱི་སྔ་དྲོ་ཆུ་ཚོད་ ༩ པའི་ཐོག་སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་ནས་གོ་སྒྲིག་ཐོག་བོད་ཀྱི་དཔེ་མཛོད་ཀྱི་ཚོགས་ཁང་ནང་སྨོན་ལམ་བོད་ཀྱི་ཀུན་བཏུས་ཚིག་མཛོད་ཆེན་མོའི་ནང་ཆོས་ལུགས་དང་འབྲེལ་བའི་ཐ་སྙད་རྩོམ་སྒྲིག་བྱེད་ཕྱོགས་སྐོར་རིས་མེད་ཆོས་བརྒྱུད་ཁག་གི་རྩོམ་སྒྲིག་མི་སྣའི་ཚོགས་འདུ་ཐེངས་གཉིས་པ་འགོ་འཛུགས་གནང་སོང།
དེ་ཡང་གོང་ཚེས་ཉིན་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་ཆོས་རིག་དྲུང་ཆེ་ནོར་བུ་དོན་ལྡན་ལགས་ཀྱིས་གཙོས་ཆོས་བརྒྱུད་ཁག་གི་རྩོམ་སྒྲིག་པ་དང་སྐུ་ཚབ་མི་སྣ། དེ་བཞིན་གསར་འགོད་པ་བཅས་ཁྱོན་མི་གྲངས་ ༤༠ བརྒལ་བར་ལྷན་འཛོམས་ཐོག་སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གི་འགན་འཛིན་དགེ་བཤེས་བློ་བཟང་སྨོན་ལམ་ལགས་ཀྱིས་ཚིག་མཛོད་ཀྱི་ལས་གཞི་ངོ་སྤྲོད་དང་ཚོགས་འདུའི་དགོས་དམིགས་སྐོར་ངོ་སྤྲོད་གནང་ཡོད། དེ་ནས་སྐུ་མགྲོན་གཙོ་བོས་ལས་གཞི་དང་འབྲེལ་བའི་སྐོར་ལ་གསུང་བཤད་གནང་དོན། དེ་རིང་འདི་གར་ཕེབས་པའི་ཆོས་ལུགས་ཆོས་བརྒྱུད་ཁག་གི་མི་སྣ་དང་འབྲེལ་ཡོད་རྣམ་པར་ངས་ཆོས་རིག་ལས་ཁུངས་ཀྱི་ཚབ་ཞུས་ཏེ་འཚམས་འདྲི་ཞུ་རྒྱུ་ཡིན། དགེ་བཤེས་བློ་བཟང་སྨོན་ལམ་ལགས་ཀྱིས་དགེ་བཤེས་ལྷ་རམས་པའི་སློབ་གཉེར་བློས་གཏོང་གིས་སྨོན་ལམ་དྲ་རྒྱ་སོགས་ཀྱི་ཐོག་ལས་དོན་མང་པོ་བསྒྲུབས་ཡོད་པ་ཀུན་གྱིས་མཁྱེན་གསལ་རེད། ལྷག་པར་ཁོང་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་དགོངས་གཞིར་བཟུང་ཚིག་མཛོད་ཅིག་འདོན་སྤེལ་བྱེད་རྒྱུའི་ལས་གཞི་ཞིག་འགོ་བརྩམས་ཡོད། སྤྱིར་བཏང་ཐ་སྙད་དང་ཚིག་མཛོད་སྒྲིག་སྐབས་དག་ཆར་ཞུ་དག་ཡག་པོ་གཏོང་དགོས་རྒྱུ་ཧ་ཅང་གལ་ཆེན་པོ་རེད། ལས་གཞི་འདིར་དུས་ཡུན་ལོ་དགུའི་དམིགས་ཚད་བཟུང་ཡོད་སྟབས། ཐོག་མ་ནས་ཞུ་དག་ལེགས་པོ་ཞིག་གནང་རྒྱུ་གནད་འགག་ཆེན་པོ་ཆགས་ཀྱི་ཡོད། དེ་བཞིན་ང་ཚོའི་ཆོས་ལུགས་ཆོས་བརྒྱུད་ཁག་སོ་སོའི་ནང་ཐ་སྙད་མང་པོ་ཡོད་པར་དོན་དག་ཀྱང་གཅིག་མཚུངས་གོ་རྒྱུ་དེ་འདྲ་ཡོད། དེར་བརྟེན་དེ་དག་ཚང་མ་གཅིག་ཏུ་སྤུང་སྟེ་སོ་སོའི་འགྲེལ་བཤད་གསལ་པོ་ཞིག་རྒྱག་དགོས་རྒྱུ་ནི་གལ་ཆེན་པོ་རེད། ལྷག་པར་༸གོང་ས་༸སྐྱབས་མགོན་ཆེན་པོ་མཆོག་གིས་ང་ཚོ་ནང་ཆོས་བྱེད་མཁན་རྣམས་དུས་རབས་ཉེར་གཅིག་གི་ནང་པ་ཞིག་བྱེད་དགོས་སྐོར་བཀའ་སློབ་ཕེབས་པ་ལྟར། ང་ཚོ་ནང་པ་དེ་ལྟར་ཆགས་དགོས་སྟབས་དེང་དུས་དང་མཐུན་པའི་འགྲེལ་བཤད་རྣམས་ཁ་གསལ་པོ་གོ་བདེ་ཡོང་ཐབས་བྱེད་རྒྱུ་གལ་ཆེན་པོ་རེད། ཅེས་སོགས་ཀྱི་གསུང་བཤད་གནང་ཡོད།
དེ་ནས་ཚོགས་ཞུགས་རྩོམ་སྒྲིག་པ་རྣམས་ཀྱིས་ཕན་ཚུན་ངོ་སྤྲོད་གྲུབ་མཚམས་ཆོས་བརྒྱུད་སོ་སོའི་ཚིག་མཛོད་རྩོམ་སྒྲིག་ཁང་རྣམས་ཀྱི་སྐུ་ཚབ་མི་གཅིག་གིས་སྐར་མ་བཅོ་ལྔ་ནས་ཉི་ཤུའི་བར་ལོ་གཅིག་རིང་གི་ལས་ཀ་ངོ་སྤྲོད་དང་ཉམས་མྱོང་ཕྱོགས་བསྡོམས་ཀྱི་གསུང་བཤད་གནང་སྟེ་བགྲོ་གླེང་འགོ་འཛུགས་གནང་ཡོད། ཐེངས་འདིའི་ཚོགས་འདུ་འདི་བཞིན་ཕྱི་ཚེས་ ༡༥ བར་འཚོགས་རྒྱུ་ཡིན་འདུག་པ་མ་ཟད། དགེ་བཤེས་བློ་བཟང་སྨོནལམ་ལགས་ཀྱིས་ཚོགས་འདུ་མཇུག་བསྡོམས་ཀྱི་གསུང་བཤད་ཀྱང་གནང་རྒྱུ་ཡིན་འདུག་པ་བཅས། །
