༢༠༡༤ ཟླ་ ༢ ཚེས་ ༡༡ རེས་གཟའ་མིག་དམར།

༄༅། །རྒྱལ་སྤྱིའི་བོད་དོན་ལས་འགུལ་ཁང་གི་གསར་དུ་འོས་འདེམས་བྱུང་པའི་ཚོགས་གཙོ་མ་ཊོ་མེཀ་ཀ་སི་ Mr Matteo Maccaci ལགས་ཀྱི་སྣེ་ཁྲིད་འོག་ལས་འགུལ་ཁང་གི་ཚོགས་མི་ Steve Schroder ལགས་དང་། ཡུ་རོབ་རྒྱལ་སྤྱིའི་བོད་དོན་ལས་འགུལ་ཁང་གི་ངེས་སྟོན་པ་ཚེ་རིང་བྱམས་པ་ལགས་བཅས་ཕྱི་ལོ་ ༢༠༡༤ ཟླ་ ༢ ཚེས་ ༡༠ ནས་ ༡༣ བར་ཉིན་གྲངས་གསུམ་རིང་བཞུགས་སྒར་རྡ་སར་འཚམས་གཟིགས་སུ་ཕེབས་ཡོད་འདུག
དེ་ཡང་ཕྱི་ཚེས་ ༡༠ ཉིན་སྐུ་ཚབ་རྣམ་པས་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་དང་མཇལ་འཕྲད་གནང་ཡོད་པ་མ་ཟད། བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་བདེ་སྐྱིད་ཆོས་དབྱངས་མཆོག་དང་དྲུང་ཆེ་བཅས་མཇལ་འཕྲད་གནང་སྟེ་བོད་དོན་ཐོག་རྒྱལ་སྤྱིའི་རྒྱབ་སྐྱོར་ཐོབ་ཐབས་སུ་ནུས་ཤུགས་ཆེ་རུ་གཏོང་ཕྱོགས་དགོངས་ཚུལ་བརྗེ་ལེན་གནང་ཡོད། ལྷན་འཛོམས་ཐོག་ཕྱི་དྲིལ་དྲུང་ཆེ་བཀྲ་ཤིས་ཕུན་ཚོགས་ལགས་དང་། དངོས་གྲུབ་རྡོ་རྗེ་ལགས་ཀྱང་མཉམ་ཞུགས་གནང་ཡོད།

དེ་བཞིན་ཁོང་རྣམ་པས་བོད་མིའི་སྒྲིག་འཛུགས་ཀྱི་སྲིད་སྐྱོང་མཁས་དབང་བློ་བཟང་སེང་གེ་མཆོག་མཇལ་འཕྲད་གནང་རྒྱུ་ཡིན་པ་མ་ཟད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་མཇལ་བཅར་ཞུ་རྒྱུ་ཡིན་འདུག ཕྱོགས་མཚུངས་བོད་མིའི་ཤེས་ཡོན་བསྟི་གནས་ཁག་དང་། བོད་ཀྱི་གཞོན་ནུ་ལྷན་ཚོགས་དང་། དགུ་བཅུ་གསུམ། བུད་མེད་ལྷན་ཚོགས། བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་། བོད་ཁྱིམ་སློབ་གྲྭ་བཅས་གཞུང་འབྲེལ་མིན་པའི་ཚོགས་པ་ཁག་ལའང་གཟིགས་སྐོར་གནང་རྒྱུ་ཡིན་འདུག