༢༠༡༤ ཟླ་ ༢ ཚེས་ ༡༡ རེས་གཟའ་མིག་དམར།
༄༅། །སི་པན་ཁྲིམས་ཁང་ནས་རྒྱ་ནག་གི་སྲིད་འཛིན་ཟུར་པ་ཅང་ཙེ་མིན་གྱིས་གཙོས་འགོ་ཁྲིད་ཁག་གཅིག་འཛིན་བཟུང་བྱེད་དགོས་པའི་བཀའ་རྒྱ་བཏང་འདུག
ཕྱི་ལོ་ ༢༠༡༤ ཟླ་ ༢ ཚེས་ ༡༠ ཉིན་བརྒྱུད་ལམ་ཁག་གཅིག་གི་ནང་གནས་ཚུལ་ཐོན་གསལ་ལྟར་ན། སི་པན་གྱི་ཆེས་མཐོའི་ཁྲིམས་ཁང་གི་ཁྲིམས་དཔོན་ཨ་སི་མེལ་མི་རེ་ནོ་ལགས་ཀྱིས་རྒྱ་ནག་གི་སྲིད་འཛིན་ཟུར་པ་ཅང་ཙེ་མིན་དང་། སྲིད་བློན་ཟུར་པ་ལི་ཕིན་གཉིས་ཀྱིས་གཙོས་རྒྱ་ནག་འགོ་ཁྲིད་ཁ་ཤས་ཀྱིས་བོད་ནང་བོད་མི་རིགས་རྩ་མེད་བཟོ་བའི་སྲིད་བྱུས་ལག་བསྟར་བྱས་ཡོད་པར་བརྟེན། རྒྱལ་སྤྱིའི་ཉེན་རྟོག་སྒྲིག་འཛུགས་ནས་ཁོ་ཚོ་འཛིན་བཟུང་བྱེད་རྒྱུའི་བཀའ་རྒྱ་བཏང་འདུག
དེ་ནི་འདས་པའི་ལོ་ཁ་ཤས་སྔོན་འགྲོ་བ་མིའི་ཐོབ་ཐང་དོན་གཉེར་བ་ཁག་གཅིག་གིས། ལོ་རབས་ ༨༠ དང་༩༠ ནང་རྒྱ་ནག་གི་སྲིད་འཛིན་ཟུར་པ་ཅང་ཙེ་མིན་དང་། སྲིད་བློན་ཟུར་པ་ལེ་ཕིན་གཉིས་ཀྱིས་གཙོས་འགོ་ཁྲིད་ཁག་གཅིག་གིས་བོད་ནང་བོད་མི་རིགས་རྩ་མེད་བཟོ་བའི་སྲིད་བྱུས་ལག་བསྟར་བྱས་ཡོད་པར་ཉེས་འཛུགས་ཀྱིས་སི་པན་ཆེས་མཐོའི་ཁྲིམས་ཁང་ལ་ཁྲིམས་གཏུག་བྱས་པ་ལྟར། སི་པན་ཁྲིམས་ཁང་གིས་རྒྱལ་སྤྱིའི་ཁྲིམས་ལུགས་ཀྱི་ཁྱབ་ཁོངས་དབང་ཚད་གཞིར་བཟུང་རྒྱ་ནག་གི་སྲིད་འཛིན་ཟུར་པ་ཅང་ཙེ་མིན་དང་། སྲིད་བློན་ཟུར་པ་ལི་ཕིན་སོགས་འཛིན་བཟུང་བྱེད་དགོས་པའི་བཀའ་ཁྱབ་བཏང་ཡོད། སི་པན་ཁྲིམས་ཁང་གིས་རྒྱ་ནག་གི་དཔོན་རིགས་ཚོས་བོད་ནང་མི་རིགས་རྩ་མེད་ཀྱི་སྲིད་བྱུས་ལག་བསྟར་བྱས་པའི་ཉེས་བཙུགས་གྱོད་དོན་ལ་ཞིབ་འཇུག་བྱས་ནས་ཉེས་པ་ཡོད་པ་ཕྱིར་བསྒྲགས་གནང་ཡོད། །
