༢༠༡༤ ཟླ་ ༢ ཚེས་ ༢༡ རེས་གཟའ་པ་སངས།
༄༅། །ཕྱི་ལོ་ ༢༠༡༤ ཟླ་ ༢ ཚེས་ ༢༠ ཉིན་གྱི་ཕྱི་དྲོ་ཨ་རིའི་ཕོ་བྲང་དཀར་པོའི་མགྲིན་ཚབ་པས་གསལ་བསྒྲགས་ཤིག་སྤེལ་བའི་ནང་འཁོད་དོན། ཕྱི་ཚེས་ ༢༡ ཉིན་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་དང་ཨ་རིའི་སྲིད་འཛིན་བྷ་རཀ་ཨོ་བྷ་མཆོག་རྣམ་གཉིས་མཇལ་འཕྲད་གནང་གཏན་འཁེལ་འདུག
དེ་ཡང་ཨ་རིའི་རྒྱལ་ཡོངས་བདེ་འཇགས་ལྷན་ཁང་གི་མགྲིན་ཚབ་ལྕམ་སྐུ་ (Caitlin Hayden) ལགས་ཀྱིས་གསུང་དོན། ཨ་རིའི་སྲིད་འཛིན་བྷོ་རཀ་ཨོ་བྷ་མ་མཆོག་གིས་རྒྱལ་སྤྱིའི་སྟེང་དུ་ཆོས་ལུགས་དང་རིག་གཞུང་གི་དབུ་ཁྲིད་གུས་བཀུར་ལྡན་པའི་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་དང་མཇལ་འཕྲད་གནང་རྒྱུ་ཡིན་པ་དང་། ཨ་རིའི་སྲིད་འཛིན་མཆོག་གིས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ཕྱི་ལོ་ ༢༠༡༠ ལོའི་ཟླ་བ་ ༢ པ་དང་ ༢༠༡༡ ཟླ་བ་ ༧ པའི་ནང་མཇལ་འཕྲད་ཞུས་ཡོད། འདས་པའི་ལོ་ངོ་བཅུ་ཕྲག་གསུམ་རིང་ཆབ་སྲིད་ཚོགས་པ་གཉིས་ཀ་ནས་ཡིན་པའི་སྲིད་འཛིན་རྣམས་ནས་ཕོ་བྲང་དཀར་པོའི་ནང་༸གོང་ས་ཏཱ་ལའི་བླ་མ་མཆོག་དང་མཇལ་འཕྲད་ཞུས་ཡོད། ལྷག་པར་ཨ་རིས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གིས་འདོན་གནང་མཛད་པའི་དབུ་མའི་ལམ་ལ་རྒྱབ་སྐྱོར་ཞུས་དང་ཞུ་མུས་ཡིན། དེ་བཞིན་བོད་ཀྱི་ས་ཁུལ་ནང་འགྲོ་བ་མིའི་ཐོབ་ཐང་གི་གནས་སྟངས་ཇེ་ཞན་ཇེ་སྡུག་ཏུ་འགྲོ་བཞིན་པའི་ཐོག་ང་ཚོར་སེམས་འཚབ་ཡོད། རྒྱ་ནག་གཞུང་ནས་༸གོང་ས་ཏཱ་ལའི་བླ་མ་མཆོག་གམ་ཁོང་གི་སྐུ་ཚབ་དང་ལྷན་སྔོན་འགྲོའི་ཆ་རྐྱེན་མེད་པའི་ཐོག་ནས་གྲོས་མོལ་གནང་དགོས་པའི་བསྐུལ་མ་མུ་མཐུད་བྱེད་རྒྱུ་ཡིན། ཞེས་གསུངས་འདུག་པ་བཅས། །