༢༠༡༤ ཟླ་ ༡ ཚེས་ ༢༣ རེས་གཟའ་ཕུར་བུ།
༄༅། །ཕྱི་ལོ་ ༢༠༡༤ ཟླ་ ༡ ཚེས་ ༢༣ རེས་གཟའ་ཕུར་བུའི་ཕྱེད་ཡོལ་ཆུ་ཚོད་ ༤ ཐོག་གངས་སྐྱིད་གཉའ་ཁྲི་ཚོགས་ཁང་དུ་བོད་ཀྱི་ཆབ་སྲིད་བཙོན་ཟུར་གྲགས་ཅན་སྟག་སྣ་འཇིགས་མེད་བཟང་པོ་ལགས་ཀྱིས་བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་རྣམས་ལ་རང་ཉིད་ཀྱི་མི་ཚེའི་ལོ་རྒྱུས་དང་འབྲེལ་བའི་སྐོར་གསུང་བཤད་གནང་ཡོད། དེ་ཡང་སྐབས་དེར་ཐོག་མར་བདེ་སྲུང་ལས་བྱེད་ཆབ་སྲིད་བཙོན་ཟུར་ལྷག་པ་ཚེ་རིང་ལགས་ཀྱིས་ངོ་སྤྲོད་གནང་གྲུབ་མཚམས་སྟག་སྣ་འཇིགས་མེད་བཟང་པོ་ལགས་ཀྱིས་ལོ་རྒྱུས་སྙིང་བསྡུས་ངོ་སྤྲོད་གནང་དོན།
ང་རང་ལྷ་ས་གྲོང་ཁྱེར་ཁོངས་ཆུ་ཤུར་རྫོང་སྟག་སྣ་གཞིས་ཀར་སྐྱེས་པ་རེད། ཆུང་དུས་སྐབས་གཞུང་ཞབས་སུ་བཞུགས་ཆེད་བོད་ཀྱི་སྐད་ཡིག་ལ་སྦྱང་བརྩོན་བྱས་པ་ཡིན། ང་རང་བཙོན་ཁང་དུ་མ་བཅུག་གོང་ཟས་ཞིམ་སློབ་གྲྭར་ཕྱི་ལོ་ ༡༩༦༥ ལོར་དགེ་རྒན་ལས་ཀ་བྱེད་མུས་སྐབས་རྒྱ་ནག་གཞུང་ནས་ཀུན་གཟིགས་པཎ་རིན་ཆེན་པོ་ཆེ་མཆོག་ལ་འཐབ་རྩོད་བྱ་རྒྱུའི་ལས་འགུལ་སྤེལ་བར་དང་ལེན་མ་བྱས་སྟབས། འཛིན་བཟུང་བྱས་ཏེ་ལོ་གསུམ་གྱི་ཁྲིམས་ཐག་བཅད་བྱུང། ཕྱི་ལོ་ ༡༩༧༠ ལོར་སླར་ཡང་གསར་བརྗེར་ངོ་རྒོལ་གྱི་ལས་འགུལ་སྤེལ་བའི་ཉེས་མིང་འོག་ལོ་ ༡༠ བཙོན་འཇུག་གི་ཁྲིམས་ཐག་བཅད་བྱུང། ཕྱི་ལོ་ ༡༩༨༣ ལོར་རྒྱལ་ས་ལྷ་སའི་གཙུག་ལག་ཁང་མདུན་དུ་བོད་རང་བཙན་གྱི་སྦྱར་ཡིག་སྦྱར་བ་མ་ཟད། སྦྱར་ཡིག་གི་ཕྲེད་དར་མངོན་གསལ་དོད་པོའི་ཐོག་ཁྱེར་ནས་འབོད་ཚིག་ཐེངས་མང་བསྒྲགས་པར་བརྟེན་ནས་སྤྱི་བདེ་མི་སྣས་འཛིན་བཟུང་བྱས་ཏེ་ལོ་ ༡༥ བཙོན་འཇུག་གི་ཁྲིམས་ཐག་བཅད་བྱུང། བཙོན་ཁང་དུ་སྡོད་མུར་ཕྱི་ལོ་ ༡༩༨༧ རྒྱལ་ས་ལྷ་སར་མི་རབས་གསར་པ་ཚོས་ངོ་རྒོལ་བྱེད་བཞིན་ཡོད་པ་ངས་བཙོན་ཁང་ནང་ནས་ཤེས་རྟོགས་བྱུང་སྟབས། བཙོན་ཁང་ནང་ངོ་རྒོལ་བྱས་པར་བརྟེན་ནས་གསར་བརྗེར་ངོ་རྒོལ་བྱས་པའི་ཉེས་མིང་འོག་ལོ་ ༥ བསྐྱར་སྤར་བྱས་བྱུང། ཕྱི་ལོ་ ༡༩༩༢ ལོར་སུད་སི་ནས་འགྲོ་བ་མིའི་ཐོབ་ཐང་ཚན་པའི་འབྲེལ་ཡོད་མི་སྣ་གྲྭ་བཞི་བཙོན་ཁང་དུ་ལྟ་སྐོར་དུ་ཡོང་སྐབས། བོད་རང་བཙན་གྱི་སྐད་འབོད་བྱས་པར་བརྟེན་ལོ་ ༨ བསྐྱར་སྤར་བྱས་བྱུང་།
རྒྱ་ནག་གཞུང་གིས་ངར་དུས་བཀག་བཙོན་འཇུག་མི་ལོ་ ༤༡ ཧྲིལ་པོ་བཏང་བྱུང་། བཙོན་ཁང་ནང་གི་འབྲེལ་ཡོད་དཔོན་རིགས་ཚོས་ང་རང་ཨ་རིར་བསྐྱོད་ནས་བོད་དུ་ལོག་ཡོང་རྒྱུ་མིན་པའི་ཁས་ལེན་ཡིག་གེ་བྲིས་དགོས་བརྗོད་ཀྱང་གུས་པས་དང་ལེན་བྱས་མེད། མདོར་ན། ང་རང་ལ་མི་ལོ་ ༣༢ བསྡད་རྗེས་མཐར་ཆ་རྐྱེན་གང་ཡང་མེད་པར་སྨན་བཅོས་གྱི་ངོ་བོའི་ཐོག་ནས་གློད་བཀྲོལ་ཐོབ་བྱུང་། ཞེས་གསུངས་པ་མ་ཟད། མཐར་སྲི་ཞུ་བ་རྣམས་ལ་འབོད་སྐུལ་ཞུས་དོན། སྤྱིར་བཏང་ཁྱེད་རྣམ་པས་དཀའ་ངལ་འཛེམས་མེད་ཐོག་སྐུ་ལས་མང་དག་ཅིག་བསྐྱོན་དང་སྐྱོན་མུས་རེད། ཁྱེད་རྣམ་པས་སྤྱི་དོན་ཨང་པོར་བཞག་ཐོག་ལྷག་བསམ་རྣམ་དག་གིས་ལས་དོན་སྒྲུབ་རོགས་གནང་ཞུ་རྒྱུ་ཡིན། དེ་བཞིན་མང་གཙོ་ཡིན་རུང་གཅིག་སྡུད་དགོས་པ་མ་ཟད། རང་དབང་ཡིན་རུང་སྒྲིག་གཞི་དགོས་རྒྱུ་ཧ་ཅང་གལ་ཆེན་པོ་ཆགས་ཀྱི་ཡོད། ལྷག་པར་ཁྱེད་རྣམ་པས་གཞུང་གི་བཀའ་གསུང་ཅི་སྒྲུབ་ཞུ་དགོས་རྒྱུ་ཧ་ཅང་གལ་འགངས་ཆེན་པོ་ཆགས་ཡོད། ཅེས་སོགས་ཀྱི་གསུང་བཤད་གནང་ཡོད།
དེ་རྗེས་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ཆབ་སྲིད་བཙོན་ཟུར་བགྲེས་སོང་ཁོང་ལ་འཚམས་འདྲི་དང་ཐུགས་རྗེ་ཆེ་ཞུའི་མཇལ་དར་བསྒྲོན་ཏེ་གསུང་དོན། ཁོང་གིས་བོད་སྤྱི་པའི་རྩ་དོན་ཆེད་རང་སྲོག་བློས་གཏོང་གིས་སྐུ་ངལ་བསྐྱོན་ཏེ་ཕྱག་ལས་སྣ་མང་གནང་བར་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་དང་བསྔགས་བརྗོད་ཡོད། ཁོང་གིས་སྐུ་ངལ་ཇི་ལྟར་བསྐྱོན་སྐོར་གསུངས་པ་རྣམས་ང་ཚོ་སྲི་ཞུ་བ་རྣམས་ཀྱིས་ཡིད་འཇགས་བྱེད་དགོས། དེ་ཡང་ཁོང་གིས་འབོད་སྐུལ་གནང་བའི་ནང་སྒེར་དོན་ལས་སྤྱི་དོན་གལ་ཆེ་ཡིན་སྐོར་ཁ་གསལ་གོ་བདེའི་འབོད་སྐུལ་གནང་བ་དེ་རྣམས་ཡིད་འཇགས་ཡོང་བ་ཞུ་རྒྱུ་དང་། ང་རང་གཞོན་ནུའི་ལས་དོན་སྤེལ་སྐབས་སྟག་སྣ་འཇིགས་མེད་བཟང་པོའི་ལོ་རྒྱུས་བཀླགས་མྱོང་ཡོད། ཁོང་ནི་བོད་དོན་ཆེད་འཐབ་རྩོད་གནང་མཁན་མིག་དཔེར་འོས་པ་ཞིག་ཆགས་ཡོད། དེར་བརྟེན་དེ་རིང་གོ་སྐབས་འདི་བརྒྱུད་ནས་ངས་ཁོང་གི་བྱས་རྗེས་དང་བློས་གཏོང་ལ་སྙིང་ཐག་པ་ནས་ཡི་རང་བསྔགས་བརྗོད་ཞུས་པ་དང་སྦྲགས། ཁོང་བརྒྱུད་ནས་བོད་མི་ཆབ་སྲིད་བཙོན་པ་སྤྱི་དང་ལྷག་པར་དུ་དེང་སྐབས་བོད་ནང་དཀའ་སྡུག་མྱོང་བཞིན་པའི་ཆབ་སྲིད་བཙོན་པ་ཚང་མར་གདུང་སེམས་མཉམ་སྐྱེ་དང་གུས་འདུད་ཞུ་རྒྱུ་ཡིན། ཞེས་གསུངས།
དེ་ཡང་ཕྱི་ལོ་ ༡༩༥༠ ལོར་རྒྱ་ནག་གཞུང་གིས་བོད་དུ་དྲག་པོའི་བཙན་འཛུལ་བྱས་རྗེས་ཕྱི་ལོ་ ༡༩༥༡ ཟླ་ ༥ ཚེས་ ༢༣ ཉིན་གྲོས་མཐུན་དོན་ཚན་བཅུ་བདུན་ཞེས་པར་མིང་རྟགས་མི་འགོད་ཀ་མེད་བྱུང་ཡོད། ལྷག་པར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཀྱང་མཐར་གྲོས་མཐུན་གྱི་འབྲུ་དོན་ལྟར། རྒྱ་བོད་གཉིས་ཕན་གྱི་ཁེ་ཕན་ཞིག་ཡོང་ཆེད་མཉམ་ལས་རིམ་པར་མཛད་ཀྱང་རྒྱ་དམར་གྱིས་བོད་ཐོག་འཛིན་པའི་སྲིད་བྱུས་རིམ་བཞིན་ཇེ་སྡུག་ཏུ་བཏང་ཡོད།
དེ་ཡང་ཐོག་མར་བོད་ཀྱི་ཤར་ཕྱོགས་མདོ་སྟོད་སྨད་གཉིས་ནང་མང་གཙོའི་བཅོས་སྒྱུར་གྱི་མིང་ཐོག་ནས་བོད་ཀྱི་དགོན་སྡེ་གྲྭ་ཚང་དང། གནའ་ཤུལ་གྲགས་ཅན་སོགས་ལ་གཏོར་བཤིག་བཏང་བ་མ་ཟད། ས་གནས་བོད་མི་དང་གྲོས་མོལ་གང་ཡང་མ་བྱས་པར་བཙན་ཤེད་ཀྱིས་སྤྱི་ཚོགས་བཅོས་སྒྱུར་བྱས་སྟབས། ས་གནས་དེ་གའི་བོད་མི་རྣམས་འ་ཆད་འུ་ཐུག་གིས་ངོ་རྒོལ་བྱེད་དགོས་ཐུག་ཡོད། བོད་མིའི་ངོ་རྒོལ་གྱི་ལས་འགུལ་ལ་རྒྱ་ནག་གཞུང་གིས་ཁྲག་དྲི་ཁ་བའི་དྲག་གནོན་བྱས་པར་བརྟེན། ཤར་ཁུལ་བོད་མི་རྣམས་རིམ་བཞིན་དབུས་ཕྱོགས་སུ་ཉེན་གཡོལ་དུ་མི་འགྲོ་ཀ་མེད་བྱུང་དང་ཆབས་ཅིག་མཐར་དགའ་ལྡན་ཕོ་བྲང་གི་མངའ་ཞབས་སུ་ཡང་གནས་ཚུལ་ཇེ་སྡུག་ཏུ་སོང་བའི་དབང་གིས་ཕྱི་ལོ་ ༡༩༥༩ ཟླ་ ༣ ཚེས་ ༡༠ ཉིན་གྱི་བོད་མིའི་རང་དབང་སྒེར་ལངས་ཆེན་པོའི་གནས་ཚུལ་ཐོན་ཡོད། དེར་བརྟེན། ཕྱི་ལོ་ ༡༩༥༩ ལོ་ནས་ཕྱི་ལོ་ ༡༩༧༩ ལོ་བར་ནི་བོད་ཀྱི་ལོ་རྒྱུས་ཐོག་བྱུང་མྱོང་མེད་པའི་སྐྱོ་གར་གྱི་ལོ་ཟླ་ཞིག་ཆགས་ཡོད། དུས་ཡུན་དེའི་རིང་བོད་ཀྱི་དགོན་སྡེ་དྲུག་སྟོང་ལྷག་ཙམ་གཏོར་བཤིག་བཏང་བ་དང་། བོད་མི་ས་ཡ་གཅིག་དང་འབུམ་གཉིས་ལྷག་ཙམ་རྐྱེན་འདས་གྱུར་ཡོད། ལོ་རབས་བརྒྱད་ཅུ་པར་རྒྱ་ནག་གི་སྤྱི་ཡོངས་ཀྱི་སྲིད་བྱུས་འགྱུར་ལྡོག་བྱུང་བ་དང་བསྟུན་ནས་བོད་ཐོག་འཛིན་པའི་སྲིད་བྱུས་ལའང་འགྱུར་ལྡོག་བྱུང་ཡོད་ཀྱང། གཞི་རྩའི་བོད་དོན་ཐག་གཅོད་བྱ་རྒྱུའི་ཆོད་སེམས་ཀྱི་ངོ་བོར་འགྱུར་བ་གང་ཡང་བཏང་ མེད། ཐ་ན་སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་གི་གཉིས་ཕན་མཉམ་གནས་དང་གཉིས་མོས་གཉིས་རྒྱལ་ཡོངས་བའི་གཟིགས་རྒྱང་རིང་བའི་དགོངས་པར་རྡོག་རོལ་དང་མཚན་སྨད་བྱེད་ཤུགས་ཆེ་རུ་བཏང་བར་བརྟེན། ཕྱི་ལོ་ ༡༩༨༧ ཟླ་ ༩ ཚེས་ ༢༧ ཉིན་བོད་ཀྱི་རྒྱལ་ས་ལྷ་སར་བོད་མི་རྣམས་ནས་གཞི་རྒྱ་ཆེ་བའི་ངོ་རྒོལ་སྒེར་ལངས་བྱས་ཡོད།
ལྷག་པར་ལོ་དེའི་ཟླ་ ༡༠ ཚེས་ ༡ ཉིན་སླར་ཡང་གཞི་རྒྱ་ཆེ་བའི་སྒེར་ལངས་ཐེངས་གཉིས་པ་བྱས་ཡོད། ཕྱི་ལོ་ ༡༩༨༨ ཟླ་ ༣ ཚེས་ ༥ ཉིན་སླར་ཡང་བོད་ཀྱི་རྒྱལ་ས་ལྷ་སར་དེ་བས་གཞི་རྒྱ་ཆེ་བའི་ངོ་རྒོལ་ཐེངས་གསུམ་པ་བྱས་ཡོད། བོད་མིའི་ངོ་རྒོལ་ལ་དྲག་གནོན་བྱས་པའི་དབང་གིས་བོད་མི་བརྒྱ་ཕྲག་ལྷག་ཙམ་དམར་གསོད་བཏང་བ་དང་། སྟོང་ཕྲག་མང་པོ་བཙོན་འཇུག་བྱས་ཡོད། དེ་བཞིན་ཕྱི་ལོ་ ༡༩༨༩ ཟླ ༣ ཚེས་ ༡༠ ཉིན་ལྷ་སར་ངོ་རྒོལ་སྒེར་ལངས་ཆེ་ཤོས་བྱུང་བ་དང་ཕྱོགས་ཡོངས་ནས་དྲག་གནོན་བྱས་པ་མ་ཟད། ལོ་འཁོར་ཧྲིལ་པོ་གཅིག་རིང་བོད་ཀྱི་རྒྱལ་ས་ལྷ་སར་དྲག་གནོན་གྱི་བཀག་རྒྱ་བསྡམས་ནས་ལྷ་ས་དེ་ངོ་བོའི་ཐོག་ནས་བཙོན་ཁང་ལྟ་བུར་གྱུར་ཡོད།།
