༢༠༡༤ ཟླ་ ༡ ཚེས་ ༢༠ རེས་གཟའ་ཟླ་བ།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༢༠༡༤ ཟླ་ ༢ དང་ ༣ པའི་ནང་ཨ་རིའི་ནང་མཛད་འཕྲིན་རིམ་པ་བསྐྱང་རྒྱུའི་ཁོངས་ནས་ཟླ་ ༢ ཚེས་ ༢༤ ཉིན་ཨ་རིའི་ནུབ་ཕྱོགས་མངའ་སྡེ་ཁལ་ལི་ཕོར་ནི་ཡའི་གྲོང་ཁྱེར་ནང་རྟེན་གཞི་བྱས་པའི་ཡི་ཤུ་གཙུག་ལག་སློབ་གྲྭ་ཆེན་པོ་ཞིག་གི་ནང་མཁས་དབང་ཁག་གཅིག་དང་ལྷན་བྱམས་བརྩེ་དང་། ཚོང་ལས། བཟང་སྤྱོད། ཅེས་པའི་བརྗོད་གཞི་ཐོག་བགྲོ་གླེང་མཛད་རྒྱུ་ཡིན་འདུག
དེ་ཡང་གཙུག་ལག་སློབ་ཁང་དེའི་ཚོགས་གཙོ་མཆོག་གིས་གསུང་དོན། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གིས་བྱམས་བརྩེེ་དང་འགྲོ་བ་མིའི་རིན་ཐང་གོང་འཕེལ་གཏོང་གནང་མཛད་བཞིན་ཡོད་སྟབས། ང་ཚོས་ང་ཚོའི་གཙུག་ལག་སློབ་ཁང་འདིར་༸གོང་ས་༸སྐྱབས་མགོན་ཏཱ་ལའི་བླ་མ་མཆོག་ཆིབས་སྒྱུར་བསྐྱང་རྒྱུར་སྐོམ་པ་ཆུ་འདོད་ལྟར་ཕེབས་སྒུག་ཞུ་བཞིན་ཡོད། ཅེས་སོགས་ཀྱི་གསུང་འདུག ལྷག་པར་གཙུག་ལག་སློབ་ཁང་དེའི་སྤྱི་ཁྱབ་དྲུང་ཆེ་མཆོག་གིས་གསུང་དོན། བྱམས་བརྩེ་དང་གཞན་ཕན། འགྲོ་བ་མིའི་རིན་ཐང་སོགས་ཀྱི་གནད་དོན་ཐོག་༸གོང་ས་ཏཱ་ལའི་བླ་མ་མཆོག་དང་ལྷན་ཞིབ་འཇུག་གནང་བ་བརྒྱུད་ང་ཚོར་ཧ་ཅང་ཕན་ཐོགས་ཆེན་པོ་བྱུང་ལ་སེམས་ཤུགས་འཕེལ་བ་མ་ཟད། ཚོང་ལས་ཀྱི་བྱ་གཞག་ནང་བཟང་སྤྱོད་དང་བྱམས་བརྩེའི་རིན་ཐང་ལག་བསྟར་ཐུབ་མིན་སྐོར་ལ་སྔར་ལྷག་ཤེས་རྟོགས་ཡོང་རྒྱུའི་རེ་བ་བྱེད་བཞིན་ཡོད། ཅེས་གསུངས་འདུག
དེ་བཞིན་༸གོང་ས་༸སྐྱབས་མགོན་ཆེན་པོ་མཆོག་གིས། མི་ཚང་མ་བདེ་བ་འདོད་པ་ལས་སྡུག་བསྔལ་མི་འདོད་པ་མ་ཟད། ཆོས་ལ་ཡིད་ཆེས་མེད་མཁན་ཚོས་ཀྱང་སོ་སོའི་མི་ཚེ་འདི་བདེ་སྐྱིད་ལྡན་པ་ཞིག་སྐྱེལ་ཆེད་འགྲོ་བ་མིའི་རིན་ཐང་གལ་ཆེན་པོ་ཡིན་པར་ངོས་འཛིན་བྱེད་བཞིན་ཡོད། དེར་བརྟེན་ཆོས་ལུགས་ཚང་མས་ཕན་ཚུན་འཆམ་མཐུན་སོགས་བྱ་རྒྱུ་གལ་ཆེ་ཡིན་སྐོར་སོགས་ཀྱི་བཀའ་སློབ་ཕེབས་ཡོད་པ་རྣམས་གཙུག་ལག་སློབ་ཁང་དེའི་དྲ་རྒྱའི་ཐོག་བཀོད་ཡོད་འདུག
