༢༠༡༤ ཟླ་ ༡ ཚེས་ ༢༢ རེས་གཟའ་ལྷག་པ།
༄༅། །བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱིས་གོ་སྒྲིག་འོག་རྒྱ་གར་བྱང་ཤར་འབྲས་ལྗོངས་ཀྱི་རྒྱལ་ས་སྒང་ཏོག་ཏུ་ཡོད་པའི་བོད་ཀྱི་གསོལ་མགྲོན་ཁང་གི་ཚོགས་ཁང་ནང་བོད་རིགས་ན་གཞོན་ཁག་གཅིག་ལ་ཕྱི་ལོ་ ༢༠༡༤ ཟླ་ ༡ ཚེས་ ༡༨ ནས་ ༢༧ བར་ཉིན་གྲངས་བཅུའི་རིང་བོད་དོན་གོ་རྟོགས་སྤེལ་ཆེད་ཟབ་སྦྱོང་གནང་བཞིན་ཡོད་འདུག
དེ་ཡང་ཟབ་སྦྱོང་དབུ་འབྱེད་ཀྱི་མཛད་སྒོར་སྐུ་མགྲོན་གཙོ་བོ་ཤར་ཕྱོགས་བོད་མིའི་ས་གནས་ཁྲིམས་ཞིབ་པ་ལྷ་འབྲུག་ལགས་ཆེད་ཕེབས་གནང་འདུག ཟབ་སྦྱོང་འདིའི་ཐོག་ར་བང་ལ་དང་སྒང་ཏོག་གཞིས་ཁོངས་ཀྱི་བོད་རིགས་ན་གཞོན་ཁྱོན་མི་གྲངས་ ༣༠ བརྒལ་བས་མཉམ་ཞུགས་གནང་ཡོད་འདུག ཐེངས་འདིའི་ཟབ་སྦྱོང་ཐོག་སྒང་ཏོག་གི་མཁན་རིན་པོ་ཆེ་ཆོས་དབྱངས་མཆོག་གིས་དབུས་པདྨ་དགའ་དབང་ལགས་དང་། བཀྲ་ཤིས་བསྟན་འཛིན་ལགས། བོད་མིའི་སྒྲིག་འཛུགས་ཀྱི་ཟུང་དྲུང་འཇིགས་མེད་པ་སངས་ལགས་དང་། དྲུང་ལས་སྐལ་ལྡན་མཚོ་མོ་ལགས། དྲུང་ལས་བསྟན་པ་རྒྱལ་མཚན་ལགས། ཌལ་ཧོར་ས་གནས་འགོ་འཛིན་འཇིགས་མེད་རྡོ་རྗེ་ལགས་བཅས་ཀྱིས་བོད་ཀྱི་ཆོས་དང་རིག་གཞུང་གི་གལ་གནད་ངོ་སྤྲོད་སྤྱི་དང་། ལྷག་པར་དེང་སྐབས་བོད་ཀྱི་ཁོར་ཡུག་གནས་སྟངས། བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས། དེ་བཞིན་རང་ཉིད་ཀྱི་ཤེས་འཇོན་གོང་འཕེལ་གཏོང་ཕྱོགས་སྐོར། གཞན་ཡང་གཉིས་སྨན་དབུ་མའི་ལམ་གྱི་སྲིད་བྱུས་སོགས་བརྗོད་གཞི་ཁག་གཅིག་གི་ཐོག་ཟབ་ཁྲིད་གནང་རྒྱུ་ཡིན་འདུག
ཐེངས་འདིའི་ཟབ་སྦྱོང་འདི་བཞིན་འབྲས་ལྗོངས་དང་ར་བང་ལ་ཁུལ་གྱི་བོད་རིགས་ན་གཞོན་ཁྲོད་བོད་དོན་གོ་རྟོགས་ཤུགས་ཆེ་རུ་གཏོང་ཐབས་ཙམ་མ་ཟད། ལྷག་པར་དེའི་ཁོངས་ནས་རྩེ་ཕུད་སློབ་མ་ལྔ་འདེམས་སྒྲུག་གིས་ཁོང་རྣམས་མ་འོངས་པར་དབྱིན་ཡུལ་དུ་རྟེན་གཞི་བྱས་པའི་སུ་ཝན་སི་Swansea University གཙུག་ལག་སློབ་གཉེར་ཁང་དུ་གཏོང་ཐབས་སླད་འབད་བརྩོན་གནང་བཞིན་ཡོད་འདུག
