༢༠༡༤ ཟླ་ ༡ ཚེས་ ༣ རེས་གཟའ་པ་སངས།
༄༅། །ཕྱི་ལོ་ ༢༠༡༤ ཟླ་ ༡ ཚེས་ ༡ ཉིན་གྱི་ཕྱེད་ཡོལ་སྦེལ་ཀོབ་ལུགས་བསམ་མཉམ་འབྲེལ་ཚོགས་ནང་སྨར་ཁམས་བརྟན་བཞུགས་ཚོགས་ཆུང་ནས་གོ་སྒྲིག་དང་སེར་སྨད་འོད་ཟེར་རིན་པོ་ཆེ་མཆོག་གིས་མཐུན་འགྱུར་ཞུས་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བོད་གཞིས་བྱེས་གཉིས་ཀྱི་སྨར་ཁམས་ཡོངས་ནས་བརྟན་བཞུགས་བསྟར་འབུལ་ཞུས་པའི་རྟེན་འབྲེལ་གྱི་མཛད་སྒོ་སྨར་ཁམས་པ་ལྔ་བརྒྱ་བརྒལ་བ་ལྷན་འཛོམས་ཐོག་ཚོགས་འདུག
དེ་ཡང་གོང་ཚེས་ཉིན་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་དང་ཆོས་རིག་བཀའ་བློན་པདྨ་ཆོས་འབྱོར་མཆོག བཀའ་བློན་ཁྲི་ཟུར་ཟམ་གདོང་རིན་པོ་ཆེ་མཆོག་བཅས་ཆེད་དུ་གདན་ཞུས་ལྟར་ཕེབས་འདུག སྐབས་དེར་བཀའ་ཁྲི་ཟུར་པ་ཟམ་གདོང་རིན་པོ་ཆེ་མཆོག་གིས་བརྟན་བཞུགས་འབུལ་དགོས་དོན་གཙོ་བོ་ནི་དམ་ཚིག་སྲུང་རྒྱུ་ཡིན་པ་མ་ཟད། བརྟན་བཞུགས་འབུལ་ལམ་ཞུས་ཏེ་བཀའ་གསུང་ཅི་སྒྲུབ་ཞུ་དགོས་རྒྱུ་གལ་ཆེན་ཡིན་སྐོར་དང་འབྲེལ་གསུང་བཤད་གནང་དོན། བོད་རིགས་བརྒྱ་ཕྲག་བརྒལ་བ་ཞིག་ནས་རང་ལས་གཞན་པའི་གང་ཟག་སུ་ལ་ཡང་འཚེ་བ་བྱེད་རྒྱུའི་འབད་བརྩོན་མ་བྱས་པ་ནི། ང་ཚོས་རྗེས་སུ་ཡི་རང་བྱེད་དགོས་པའི་གནས་བབ་ཅིག་ཏུ་གྱུར་ཡོད། འོན་ཀྱང་ང་ཚོས་ད་དུང་དེའི་ཐོག་དགོངས་པ་བཞེས་དགོས་རྒྱུའི་གནས་ཚུལ་གཅིག་གང་རེད་དམ་ཞེ་ན། ང་ཚོས་ལུས་ཀྱི་འཚེ་བ་སྤངས་པ་དེ་དངོས་ཡོད་གནས་སྟངས་རེད་མ་གཏོགས་ངག་གི་འཚེ་བ་དང་ཡིད་ཀྱི་འཚེ་བ་སྤང་ཐུབ་རྒྱུའི་དཀའ་ངལ་ཞིག་ཆགས་ཡོད། ནམ་ཞིག་བོད་རིགས་མང་ཆེ་བས་འཚེ་བ་མེད་པའི་ལྟ་གྲུབ་ལ་ལུས་ངག་ཡིད་གསུམ་གཅིག་གྱུར་ཐོག་ནས་འགྲོ་ཐུབ་པ་བྱུང་ན། བོད་དོན་བདེན་མཐའ་གསལ་རྒྱུའི་དུས་ཡུན་འགོར་རྒྱུའི་གནས་སྟངས་ཕལ་ཆེར་མེད། ཅེས་གསུང་བཤད་གནང་ཡོད།
དེ་ནས་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་གསུང་བཤད་གནང་དོན། སྤྱིར་བཏང་ང་ཚོ་རང་དབང་ལུང་པའི་ནང་ཡོད་པའི་བོད་མིར་བོད་ནང་གི་དངོས་ཡོད་གནས་སྟངས་འཛམ་གླིང་ཁྱོན་ཡོངས་ལ་ཁྱབ་སྤེལ་བྱེད་རྒྱུ་ང་ཚོ་མི་རེ་རེར་ལས་འགན་ཡོད། ད་ལྟ་བར་དུ་བོད་ནང་གི་བོད་མི་ ༡༢༤ ནས་རང་ལུས་མེར་སྲེག་བཏང་ཡོད་ཁོངས་ནས་ ༡༠༧ འདས་གྲོངས་སུ་གྱུར་ཡོད། རང་ལུས་མེར་སྲེག་གཏོང་མཁན་མི་རེ་ངོ་རེས་བོད་བསྟན་སྲིད་མི་རིགས་ཆེད་དུ་རང་སྲོག་བློས་གཏོང་གནང་ཡོད། ང་ཚོ་རང་དབང་ལུང་པར་ཡོད་མཁན་ཚོར་ཉུང་མཐར་ལས་འགན་གང་ཞིག་བསྒྲུབ་དགོས་ཀྱི་ཡོད་དམ་ཞེ་ན། ཆབ་སྲིད་ཀྱི་དགོས་མཁོའི་དབང་གིས་རྒྱལ་སྤྱིའི་ནང་བོད་ནང་གི་ཛ་དྲག་གནས་སྟངས་འགྲེལ་བཤད་མཐིལ་ཕྱིན་པ་ཞིག་རྒྱག་ཐུབ་པ་དགོས། ཁྱེད་རང་ཚོ་མི་མང་ཚོ་ཡིན་རུང་རང་ཉིད་ལས་ཀ་བྱེད་ཡུལ་གྱི་མིར་བོད་དོན་འགྲེལ་བཤད་ཚད་ལྡན་ཞིག་བརྒྱབ་ཐུབ་རྒྱུར་ང་ཚོའི་ལས་འགན་ཆགས་ཡོད། ཅེས་གསུང་བཤད་གནང་།
དེ་བཞིན་ཆོས་རིག་བཀའ་བློན་མཆོག་གིས་ཀྱང་གསུང་བཤད་སྙིང་བསྡུས་ཤིག་གནང་སྟེ་བརྟན་བཞུགས་གོ་སྒྲིག་ཚོགས་ཆུང་གི་ཚོགས་མི་རྣམ་པར་མཇལ་དར་གཡོགས་རྗེས་སྨར་ཁམས་ཡུལ་གྱི་གཞས་སྣ་ཁག་འཁྲབ་སྟོན་གནང་འདུག་པ་བཅས། །
