༢༠༡༤ ཟླ་ ༡ ཚེས་ ༢༨ རེས་གཟའ་མིག་དམར།

༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཨ་རིའི་ནུབ་ཕྱོགས་མངའ་སྡེ་ཁལ་ལི་ཕོར་ནི་ཡར་རྟེན་གཞི་བྱས་པའི་(American Himalayan Foundation)ཨ་རི་ཧི་མ་ལ་ཡའི་ཐེབས་རྩས་ཇི་ལྟར་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་ཐོབ་སྟེ་ཨ་རིའི་གྲོང་ཁྱེར་བཞིའི་ནང་མཛད་འཕྲིན་བསྐྱང་གཏན་འཁེལ་འདུག

དེ་ཡང་མགོན་པོ་གང་ཉིད་མཆོག་གིས་ཕྱི་ལོ་ ༢༠༡༤ ཟླ་ ༢ ཚེས་ ༢༢ ཉིན་སན་ཕ་རན་སི་སེ་ཁོར་(San Francisco)ཆིབས་སྒྱུར་བསྐྱང་སྟེ་བྱམས་བརྩེའི་རང་བཞིན་སྐོར་མང་ཚོགས་ལ་བཀའ་སློབ་དང་། ཕྱི་ཚེས་ ༢༣ གྲོང་ཁྱེར་བྷར་ཀི་ལིར་(Berkerley)མང་ཚོགས་ལ་བདེ་སྐྱིད་སྐྲུན་ཐབས་སྐོར་བཀའ་སློབ་སྩལ་རྒྱུ་ཡིན་འདུག

ཕྱི་ཚེས་ ༢༤ ཉིན་སན་ཊ་ཁ་ལ་རའི་(Santa Clara University)གཙུག་ལག་སློབ་གཉེར་ཁང་དུ་བྱམས་སྙིང་རྗེ་དང་ཚོང་ལས་སྐོར་བཀའ་སློབ། ཕྱི་ཚེས་ ༢༥ ཉིན་ཁལ་ལི་ཕོར་ནི་ཡའི་ (California) གྲོང་ཁྱེར་ལོ་སི་ཨེན་ཇི་ལེ་སིར་(Los Angeles) གནས་བཞུགས་མང་ཚོགས་ལ་དུས་རབས་ཉེར་གཅིག་ནང་འཚེ་མེད་ཞི་བ་དང་བྱམས་སྙིང་རྗེའི་ཤུགས་རྐྱེན་སྐོར་བཀའ་སློབ་སྩལ་རྒྱུ་ཡིན་འདུག

དེ་ནས་༸གོང་ས་༸སྐྱབས་མགོན་ཆེན་པོ་མཆོག་ཨ་རིའི་མངའ་སྡེ་མི་ནི་སོ་ཊའི་(Minnesota)གྲོང་ཁྱེར་མེ་ནི་པོ་ལི་སིར་(Minneapolis)ཆིབས་སྒྱུར་གྱིས་ཕྱི་ཟླ་ ༣ ཚེས་ ༡ ཉིན་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་རྣམ་པའི་ལྷན་ཚོགས་ཐེངས་ ༢༦ པའི་ཐོག་བཀའ་སློབ་དང་། ཕྱི་ཚེས་ ༢ ཉིན་མི་ནི་སོ་ཊའི་བོད་རིགས་སྤྱི་མཐུན་ཚོགས་པས་གོ་སྒྲིག་ཞུས་ཐོག་ཁུལ་དེའི་བོད་རིགས་ཚོའི་ལོ་གསར་ཐོག་ཆིབས་སྒྱུར་བསྐྱང་སྟེ་མང་ཚོགས་ལ་བཀའ་སློབ་སྩལ་རྒྱུ་ཡིན་འདུག དེ་རྗེས་མགོན་པོ་གང་ཉིད་མཆོག་ཨ་རིའི་རྒྱལ་ས་ཝ་ཤིང་ཊོན་དུ་ཆིབས་སྒྱུར་བསྐྱང་རྒྱུའི་གནས་ཚུལ་ཐོན་འདུག་པ་བཅས། །