༢༠༡༤ ཟླ་ ༡ ཚེས་ ༢ རེས་གཟའ་ཕུར་བུ།
༄༅། །ཕྱི་ལོ་ ༢༠༡༤ ཟླ་ ༡ ཚེས་ ༢ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ལམ་རིམ་ཁྲིད་ཆེན་ཁག་གི་ལོ་འདིའི་ཆོས་འབྲེལ་མཐའ་མར་སྔ་དྲོ་ཆུ་ཚོད་ ༩ པའི་ཐོག་སེར་བྱེས་མཁས་སྙན་གྲྭ་ཚང་གི་ཆོས་རྭའི་བཞུགས་ཁྲི་རིན་པོ་ཆེར་༸ཞབས་སོར་འཁོད་བསྟུན་དགའ་ལྡན་ཁྲི་རིན་པོ་ཆེ་མཆོག་དང་ཤར་བྱང་ཆོས་རྗེ་རྣམ་གཉིས་མཆོག་གིས་དབུས་དགེ་བཙུན་གྲངས་ཉིས་སྟོང་ལ་ཉེ་བ་དང་། བོད་མི་མང་སྤྱི་འཐུས་ཚོགས་གཙོ་མཆོག་དང་བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་མཆོག་གིས་དབུས་བཀའ་ཟུར་ཁག་གཅིག་དང་གཞུང་ཞབས་ལས་ཟུར་ཁག་གཅིག བོད་མི་མང་སྤྱི་འཐུས་ལས་ཟུར་ཁག་གཅིག་སོགས་ཁྱོན་སེར་སྐྱ་མི་མང་གྲངས་ ༢༧༥༠༠ བརྒལ་བའི་དབུས་སུ་ཐོག་མར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ནང་ཆོས་ངོ་སྤྲོད་མཛད་པའི་ནང་བཀའ་སློབ་ཕེབས་དོན། ལོ་བཞི་བཅུའི་གོང་གི་ལོ་རྒྱུས་བཤད་ན། ངོས་རང་ཆུང་ཆུང་སྐབས་ནས་ཚན་རིག་ལ་དགའ་པོ་ཡོད། ཐེངས་གཅིག་ཨ་རིའི་བུད་མེད་བོད་ཀྱི་ནང་པའི་ཆོས་བྱེད་མཁན་གཅིག་དང་ལྷན་དུ་ཉིན་གཅིག་སྐད་ཆ་བྱུང་བའི་སྐབས་དེར་ཁོང་གིས། ཚན་རིག་པའི་ལྷན་དུ་གོ་བསྡུར་བྱེད་རྒྱུ་དེར་གཟབ་གཟབ་བྱས་ན་མ་གཏོགས་ཚན་རིག་ཟེར་བ་དེ་ཆོས་གསོད་མཁན་རེད། ཅེས་འགྲེལ་བརྗོད་བྱས་བྱུང་། ངོས་ནས་བསམ་བློ་ཞིག་བཏང་བ་ཡིན། སངས་རྒྱས་བཅོམ་ལྡན་འདས་ཀྱིས། །དགེ་སློང་དག་གམ་མཁས་རྣམས་ཀྱིས། །སྲེག་བཅད་བརྡར་བའི་གསེར་བཞིན་དུ། །ལེགས་པར་བརྟག་ལ་ང་ཡི་བཀའ། །བླང་བར་བྱ་ཡིས་གུས་ཕྱིར་མིན། །ཞེས་བཅོམ་ལྡན་འདས་ཀྱིས་གསུངས་པ་ལྟར་ཚོད་ལྟ་བྱས་བརྡར་ཤ་བཅད། ར་སྤྲོད་འཕེར་བ་ཞིག་འདུག་ན་ཁས་ལེན་བྱེད་གསུངས་པ་བཞིན་བཀའ་འདིའི་རྗེས་སུ་འབྲང་ནས་ཀླུ་སྒྲུབ་ཡབ་སྲས་སོགས་བཅོམ་ལྡན་འདས་ཀྱི་བཀའ་གང་ཞིག་སྒྲ་ཇི་བཞིན་པ་ཁས་ལེན་རུང་གི་མ་རེད། ཅེས་གསུངས་ཡོད་པར་ཞིབ་འཇུག་བྱས་ཏེ་འགྲོ་བཞིན་ཡོད།
དེར་བརྟེན་བློ་གཟུ་བོར་གནས་པའི་ཚན་རིག་པ་མང་པོ་ཞིག་ངོས་ནས་ངོ་ཤེས་ཀྱི་ཡོད། ཁོ་ཚོར་གུས་པ་སྐྱེ་ཡི་ཡོད། བློ་གཟུ་བོར་གནས་པའི་ཐོག་ནས་དོན་གང་ཡིན་ཡང་ལམ་སེང་ཁས་ལེན་མི་བྱེད་པར་དཔྱད་པ་བྱས། རྒྱུ་མཚན་ར་སྤྲད་ནས་གཅིག་ནས་གཉིས་སུ་རྒྱུ་མཚན་ཤོད་རྒྱུ་ཡོད། དཔལ་ནལེཎྜའི་མཁས་པས་ཀྱང་སངས་རྒྱས་ཀྱི་བཀའ་ལ་བརྟག་དཔྱད་གནང་འདུག་པར་སོང་། ང་ཚོ་ཚན་རིག་པ་དང་ལྷན་དུ་ཐུག་པར་ཉེན་ཁ་གང་ཡང་མི་འདུག་སྙམ་ཏེ་འབྲེལ་བ་བྱས་པ་རེད། ལོ་སུམ་ཅུ་ལྷག་ཙམ་ཕྱིན་པ་རེད། ལྷ་སར་དེ་སྔ་རྒྱ་མི་གུང་ཁྲན་གྱིས་ཡིག་ཆ་དེ་འདྲའི་སྟེང་། བོད་ལ་རྨོངས་དད་ཧ་ཅང་ཤུགས་ཆེན་པོ་ཡོད། དེ་འགོག་རྒྱུར་ཐབས་ཤེས་གཞན་དམིགས་བསལ་གང་ཡང་བྱེད་དགོས་མེད། ཚན་རིག་གིས་ཤེས་ཚད་ཡར་རྒྱས་ཕྱིན་ན་རྨོངས་དད་རང་བཞིན་གྱིས་མེད་པ་ཆགས་ཀྱི་རེད། ཅེས་པའི་ཡིག་ཆ་ཞིག་ཕྱི་ལོ་ ༡༩༦༠ ནང་མཐོང་བྱུང་། ད་ཆ་ལོ་སུམ་ཅུ་བཞི་བཅུ་ཕྱིན་པའི་རྗེས་ལ་ག་རེ་ཆགས་འདུག་གམ་བརྗོད་ན་ཚན་རིག་པའི་ནང་ནས་སངས་རྒྱས་པའི་ཆོས་ལ་ཚུར་དོ་སྣང་གསར་པ་བྱེད་རྒྱུ་ཞིག་དང་། ཚན་རིག་གི་བསམ་བློ་ཡོད་མཁན་མང་པོ་ཞིག་གིས་སངས་རྒྱས་པའི་ཆོས་ལ་ཡིད་འཕྲོག་རྒྱུ་ཞིག་ཆགས་ཡོད། དེ་དག་ནི་སངས་རྒྱས་པའི་ཆོས་འདི་རྒྱུ་མཚན་ལ་བསམ་བློ་བཏང་ནས་དཔྱད་པ་བྱས་ཏེ་རིམ་པས་བདེན་དོན་ཐག་གཅོད་རྒྱུ་ཞིག་ཡིན་སྟབས། འཛམ་གླིང་འདིའི་སྟེང་གི་ལྟ་གྲུབ་ཡོད་པའི་ཆོས་ལུགས་ཚང་མས་མི་ལ་ཕན་གྱི་ཡོད། དེར་བརྟེན་རྗེས་སུ་ཡི་རང་བྱས་ཏེ་ཆོས་ལུགས་གཞན་ནང་པར་བསྒྱུར་རྒྱུའི་འབད་བརྩོན་ནམ་ཡང་བྱེད་མྱོང་མེད། ལོ་གཅིག་ཕ་རན་སིར་ཇར་མན་ནས་ཡིན་པ་ཞིག་གིས་སྦྱིན་བདག་བྱས་ཏེ་ཕ་རན་སིར་ནང་ཆོས་ཀྱི་བསྟི་གནས་ཆེན་པོ་ཞིག་རྒྱག་རྒྱུའི་འཆར་གཞི་ཡོད་ཟེར་མཁན་ཞིག་ངོས་དང་ཐུག་བྱུང་། ངོས་རང་ཟོལ་མེད་ཡིན། ངོས་ནས་དེར་ཁྱེད་རང་བསམ་བློ་ཡག་པོ་གཏོང་དགོས་བརྗོད་པ་ཡིན། ངོས་རང་ནང་པ་རེད། འོན་ཀྱང་ཕ་རན་སི་ནང་པའི་ལུང་པ་མ་རེད།
དེ་ལྟར་ནང་པའི་ལུང་པ་མིན་པའི་ལུང་པར་དེ་ལྟར་ནང་པའི་བསྟི་གནས་ཆེན་པོ་བརྒྱབ་ན་རན་པོ་ཨེ་ཡོད། དེ་མིན་བོད་པའི་སྤྱི་ཚོགས་ནང་ཡི་ཤུའི་ལྷ་ཁང་ངམ་ཡི་ཤུའི་ཆོས་སྤེལ་སའི་བསྟི་གནས་ཆེན་པོ་ཞིག་བརྒྱབ་ན། ང་ཚོ་ག་རེ་དྲན་པ་འདུག་གམ། ལ་དྭགས་སམ་མོན་གྱི་ས་གནས་དེ་དག་ནང་དུ་སོ་སོའི་ཕ་མེས་ཀྱི་ནང་པའི་ལུང་པ་ཞིག་གི་ནང་དུ་ཆོས་ལུགས་གཞན་དག་དེ་འདྲ་ཞིག་བསླེབས་པ་ཡིན་ན་ཕྲན་བུ་མ་བདེ་བ་ཡོང་གི་རེད། དེ་ལྟར་རང་གི་ལུས་ལ་དཔེ་བླངས་ཏེ་ཟེར་བ་ལྟར་དེ་ལྟ་བུའི་ནང་པའི་བསྟི་གནས་རྒྱ་ཆེན་པོ་བཙུགས་པ་ཡིན་ན་ཡག་པོ་མི་འདུག ངོས་ནས་དེ་འདྲ་མ་བྱེད་ཅེས་བརྗོད་ཀྱི་ཡོད། དེ་ལྟར་འཛུགས་རྒྱུའི་འཆར་གཞི་ཡོད་ན་ཐེ་ལན་ཌི་ལྟ་བུ་ནང་པའི་ལུང་པ་དང་ཡང་ན་སྦེང་ལོར་ལྟ་བུར་བཙུགས་ན་ཡག་པོ་འདུག་བརྗོད་རྒྱུ་བྱུང་། དེ་ལྟར་ནང་པའི་ལུགས་སྲོལ་ནང་ཆོས་ཕར་སྤེལ་སོང་ཟེར་བ་དེ་འདྲ་མེད། གང་ལྟར་ནང་པའི་ཆོས་ལ་དེ་རིང་ཁ་སང་དོ་སྣང་བྱེད་ཤུགས་ཆེ་རུ་འགྲོ་བཞིན་པ་དེ་དག་གིས་བཤེས་གཉེན་དང་དལ་འབྱོར་རྩ་ཆེན་པོ་རེད་བསམ་ནས་བྱེད་ཀྱི་མེད། འོ་ན་སེམས་འཁྲུག་ཡོད་མཁན་དང་དཀའ་ངལ་འཕྲད་མཁན་དེ་འདྲ། གཞན་ཡང་སྐྱབས་མེད་མགོན་མེད་ལྟ་བུ་ཆགས་ཏེ་ཡོང་བ་ཞིག་ཡིན་པ་སྔོན་མ་དེ་འདྲ་རེད།
འོན་ཀྱང་དེ་རིང་ཁ་སང་རིམ་བཞིན་ཕྲན་བུ་མཐོ་རུ་སོང་སྟེ་ཤེས་ཡོན་ཅན་ཕེབས་སར་སློབ་དཔོན་དེ་འདྲས་དོ་སྣང་བྱེད་མཁན་ཡོང་གི་འདུག དེ་དག་ནི་སངས་རྒྱས་པའི་ཆོས་ཀྱི་ཞག་རྩི་ལྟ་བུ་རེད། རིག་པས་རྒྱུ་མཚན་ལ་བརྟེན་ནས་དོན་སྣང་བྱེད་རྒྱུ་ཞིག་དང་རྣམ་དཔྱོད་ཅན་ཡིད་འཕྲོག་རྒྱུ་ཞིག་ཡོང་གི་ཡོད། ཅེས་སོགས་ཀྱི་ནང་ཆོས་ངོ་སྤྲོད་ཟབ་སྩལ་ཏེ་སྔ་དྲོའི་ཆོས་ཐུན་གཅིག་དང་ཉིན་རྒྱབ་ཆོས་ཐུན་སྔར་རྒྱུན་བཞིན་སྩལ་རྗེས་བཀའ་སློབ་ཕེབས་དོན། ད་རེས་ཀྱི་ཆོས་འབྲེལ་ལྷག་འཕྲོས་རྣམས་ལོ་རྗེས་མ་དུས་ཚོད་ག་དུས་བྱེད་དང་ས་གནས་གང་དུ་བྱེད་ད་ལྟ་བརྗོད་རྒྱུ་གང་ཡང་མེད། དེ་ནི་མ་འོངས་པར་གོ་རིམ་མེད། ཅེས་གསུངས་པ་ལྟར་ལྟ་གིན་ལྟ་གིན་བྱེད་རྒྱུ་རེད། ཐེངས་འདིའི་ལམ་རིམ་ཁྲིད་ཆེན་བརྒྱད་ཡོད་པ་ཚང་མ་གྲུབ་ཟིན་ཏེ་སྐལ་པ་བཟང་པོ་ཞེ་དྲག་བྱུང་། ངོས་ལ་ཉམས་ལེན་གང་ཡང་མེད་ཀྱང་ཁྲིད་རྒྱུན་ཐོབ་ཡོད་པ་དེ་དག་དོན་གཉེར་ཅན་ཁྱེད་རྣམ་པར་ཞུ་རྒྱུ་བྱུང་། གལ་ཆེ་ཤོས་ཁྱེད་རང་ཚོ་ཚང་མས་ཉམས་ལེན་ཡག་པོ་བྱེད་དགོས་པ་རེད། ཅེས་བཀའ་སློབ་ཕེབས་ཏེ་ཐེངས་འདིའི་ལམ་རིམ་ཆེན་མོའི་ཆོས་འབྲེལ་ཡོངས་སུ་ལེགས་པར་གྲུབ་པ་བཅས།།
