༢༠༡༣ ཟླ་ ༡༢ ཚེས་ ༡༡ རེས་གཟའ་ལྷག་པ།
༄༅། །ཕྱི་ལོ་ ༢༠༡༣ ཟླ་ ༡༢ ཚེས་ ༩ ཉིན་གྱི་ཕྱེད་ཡོལ་ཆུ་ཚོད་ ༤།༡༥ ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ས་རཱ་མཐོ་རིམ་སློབ་གཉེར་ཁང་གི་ཚོགས་ཁང་དུ་བོད་མིའི་སྒྲིག་འཛུགས་ཀྱི་ལས་བྱེད་འདེམས་ལྷན་ནས་གོ་སྒྲིག་ཐོག་ལས་བྱེད་དམིགས་སྒོའི་ཆེད་ཟླ་བ་ལྔ་རིང་ཟབ་སྦྱོང་གནང་གི་ཡོད་པའི་ལས་བྱེད་ ༤༠ དང་། ཤེས་རིག་ལས་ཁུངས་ནས་གོ་སྒྲིག་ཞུས་པའི་ལོ་གཅིག་དང་ཟླ་དྲུག་རིང་དགེ་རྒན་འོས་སྦྱོང་གནང་མཁན་སློབ་ཕྲུག་ ༡༩ དེ་བཞིན་ས་རཱ་མཐོ་སློབ་ཀྱི་སློབ་ཕྲུག་ ༣༢༧ བཅས་ཁྱོན་མི་གྲངས་ ༣༨༦ བརྒལ་བར་ལམ་སྟོན་གསུང་བཤད་གནང་སོང།
དེ་ཡང་ཐོག་མར་ས་རཱ་མཐོ་སློབ་ཀྱི་སློབ་སྤྱི་དགེ་བཤེས་འཇམ་དཔལ་གྲགས་པ་ལགས་ཀྱིས་མཐོ་སློབ་དེའི་བྱུང་རིམ་སྐོར། དེ་བཞིན་དབུས་འོས་བསྡུ་ལས་ཁང་དང་ལས་བྱེད་འདེམས་ལྷན་གྱི་འགན་འཛིན་གཅིག་ལྕོག་འཇམ་དཔལ་ཆོས་བཟང་མཆོག་གིས་ལས་བྱེད་ཟབ་སྦྱོང་དང་འབྲེལ་བའི་སྐོར་གསུང་བཤད་གནང་ཡོད། དེ་ནས་ཤེས་རིག་ལས་ཁུངས་ཀྱི་སྲོལ་རྒྱུན་ཤེས་ཡོན་འགན་འཛིན་ཚེ་རིང་བསམ་གྲུབ་ལགས་ཀྱིས་དགེ་རྒན་འོས་སྦྱོང་སྐོར་ལ་གསུང་བཤད་གནང་གྲུབ་མཚམས་སྲིད་སྐྱོང་མཆོག་གིས་དགེ་འོས་དང་ལས་བྱེད་ཟབ་སྦྱོང་བ་ཚོར་སློབ་ཁྲིད་གནང་མཁན་ས་རཱ་མཐོ་སློབ་ཀྱི་དགེ་རྒན་ཁག་གཅིག་ལ་ཐུགས་རྗེ་ཆེ་ཞུའི་མཇལ་དར་དང་ལས་བྱེད་ཟབ་སྦྱོང་བ་ཚོར་ལག་འཁྱེར་གནང་ཡོད།
དེ་རྗེས་སྲིད་སྐྱོང་མཆོག་གིས་ཐོག་མར་དགེ་ལས་ཡོངས་ལ་འཚམས་འདྲི་དང་ལྷན་ལས་བྱེད་འོས་སྦྱོང་གི་མཇུག་བསྡོམས་དང་འབྲེལ་དགེ་རྒན་འོས་སྦྱོང། དེ་བཞིན་ས་རཱ་མཐོ་སློབ་ཀྱི་དགེ་ལས་རྣམས་ལ་རིམ་བཞིན་ལམ་སྟོན་གསུང་བཤད་གཟབ་རྒྱས་གནང་ཡོད། དེ་ནས་ས་རཱ་མཐོ་སློབ་ཀྱི་དགེ་རྒན་ངག་དབང་རྡོ་རྗེ་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་སྟེ་མཛད་སྒོ་གྲོལ། །
