༢༠༡༣ ཟླ་ ༡༢ ཚེས་ ༡༦ རེས་གཟའ་ཟླ་བ།
༄༅། །ཕྱི་ལོ་ ༢༠༡༣ ཟླ་ ༡༢ ཚེས་ ༡༣ ཉིན་གྱི་ཕྱེད་ཡོལ་ཆུ་ཚོད་ ༣།༣༠ ལྡི་ལི་སྐུ་ཚབ་དོན་ཁང་དུ་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་རྒྱ་གར་བྱང་ཤར་ཨ་རུ་ཎ་ཅལ་མངའ་སྡེ་ནས་ཁེ་ན་ཌར་གཞིས་སྤོས་སྐྱོད་མཁན་བོད་མི་ཆིག་སྟོང་ཡོད་ཁོངས་ནས་བསྐྱོད་ཐེངས་གཉིས་པ་བསྟན་འཛིན་སྒང་བོད་མིའི་གཞིས་ཆགས་ནས་བོད་མི་གྲངས་ ༢༡ ལ་ལམ་སྟོན་གསུང་བཤད་གནང་དོན། ཐོག་མར་ཁྱེད་རང་ཚོ་ཚང་མར་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན། ཁྱེད་རྣམ་པ་ཁེ་ན་ཌར་བསླེབས་རྗེས་བོད་པའི་ཡ་རབས་སྤྱོད་བཟང་སྤྱི་དང་། ཡང་སྒོས་སྤྱི་ནོར་༉༸གོང་ས་༸སྐྱབས་མགོན་ཆེན་པོ་མཆོག་གི་ལམ་སྟོན་བཀའ་སློབ་རྣམས་སྙིང་བཅང་ཞུ་རྒྱུ་ཧ་ཅང་གལ་ཆེན་པོ་རེད། ལྷག་པར་ཁེ་ན་ཌའི་ཡུལ་ཁྲིམས་དང་མཐུན་པ་གནང་དགོས་པ་མ་ཟད། མ་འོངས་པར་བོད་མི་ཁེ་ན་ཌར་གཞིས་སྤོས་སུ་སྐྱོད་མཁན་ཚོར་ལམ་ཁ་ཡག་པོ་ཡོང་ཆེད་ཚང་མས་གང་ཅིའི་ཐོག་གཟབ་ནན་གནང་དགོས། ལས་གཞི་འདི་གཙོ་བོ་༸གོང་ས་༸སྐྱབས་མགོན་ཆེན་པོ་མཆོག་གིས་ཁེ་ན་ཌ་གཞུང་ལ་རེ་སྐུལ་མཛད་པའི་བཀའ་དྲིན་དང་། བོད་མིའི་སྒྲིག་འཛུགས་ནས་ཀྱང་ལས་གཞི་འདིིའི་ཐོག་གང་ཐུབ་ཅི་ཐུབ་ཀྱིས་མཐུན་འགྱུར་བསྐྲུན་ཡོད་པ་རྣམས་ཁྱེད་རྣམ་པས་མ་བརྗེད་པ་གནང་རྒྱུ་གལ་འགངས་ཆེན་པོ་ཆགས་ཡོད། ལྷག་པར་ཁྱེད་རང་ཚོ་གཞིས་སྤོས་སུ་བསྐྱོད་མཁན་ཐེངས་གཉིས་པ་འདི་ཆགས་ཡོད། རིམ་བཞིན་ཨ་རུ་ན་ཅལ་མངའ་སྡེ་ནས་བོད་མི་ཆིག་སྟོང་ཐམ་པ་ཕེབས་མཁན་ཡིན་སྟབས། ཁྱེད་རྣམ་པས་ལས་དོན་གང་ཞིག་གཉེར་ཡང་གཟབ་གཟབ་གནང་རྒྱུ་གལ་ཆེན་པོ་རེད། མི་མང་པོ་ཞིག་གིས་ཁྱེད་རྣམ་པས་གང་འདྲ་བྱས་ཡོང་ངམ་སྙམ་པའི་སེམས་འཚབ་བྱེད་མཁན་ཡོད་སྲིད། དེ་བཞིན་ཁེ་ན་ཌའི་གཞུང་ཕྱོགས་ནས་ཀྱང་ཁྱེད་རྣམ་པའི་གནས་སྟངས་ལ་གཟིགས་ཀྱི་རེད། ང་ཚོའི་ངོས་ནས་ཁྱེད་རྣམ་པས་ཡག་པོ་བྱེད་ཀྱི་རེད་བསམས་པའི་ཡིད་ཆེས་བྱེད་བཞིན་ཡོད། མ་འོངས་པར་བོད་མི་གཞིས་སྤོས་བྱེད་མཁན་རྣམས་ལམ་ལྷོང་ལྡན་པ་ཡོང་བའི་རེ་བ་བྱེད་བཞིན་ཡོད། ཅེས་སོགས་ཀྱི་ལམ་སྟོན་གསུང་བཤད་གནང་འདུག
