༢༠༡༣ ཟླ་ ༡༢ ཚེས་ ༣༠ རེས་གཟའ་ཟླ་བ།
༄༅། །ཕྱི་ལོ་ ༢༠༡༣ ཟླ་ ༡༢ ཚེས་ ༢༧ ཉིན་གྱི་སྔ་དྲོ་ཆུ་ཚོད་ ༩ པའི་ཐོག་ཤེས་རིག་ལས་ཁུངས་ནས་གོ་སྒྲིག་འོག་རྡ་ཤོད་བོད་ཁྱིམ་ཚོགས་ཁང་ནང་རྒྱ་བལ་གཉིས་ཀྱི་སློབ་གྲྭ་ཁག་ ༣༡ ནས་སྣེ་ཁྲིད་དགེ་རྒན་ ༣༢ དང་འཛིན་རིམ་བཅུ་པའི་སློབ་ཕྲུག་གྲངས་ ༣༡༠ ལ་འགོ་ཁྲིད་ནུས་པ་སྐྱེད་སྲིང་གི་ཟབ་སྦྱོང་ཐོག་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་བོད་ཀྱི་མང་གཙོའི་འཕེལ་རིམ་དང་མང་གཙོའི་ལམ་ལུགས་ཀྱི་འབྱུང་ཁུངས་སོགས་ངོ་སྤྲོད་དང་འབྲེལ་གསུང་དོན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་ནས་མ་སུ་རིར་ཕེབས་མ་ཐག་བཀའ་བློན་རྣམ་པར་མ་འོངས་པར་ང་ཚོའི་ཆབ་སྲིད་ལམ་ལུགས་དེ་མང་གཙོའི་ལམ་ལུགས་ཐོག་འགྲོ་དགོས་སྐོར་གྱི་བཀའ་སློབ་ཕེབས་འདུག ༸གོང་ས་༸སྐྱབས་མགོན་ཆེན་པོ་མཆོག་གི་དགོངས་བཞེས་དེ་གང་འདྲ་བྱས་ནས་ཕེབས་ཡོད་དམ་ཞེ་ན། ང་ཚོས་ལོ་རྒྱུས་ལ་ཕྲན་བུ་ཕྱིར་ཤིག་རྒྱག་དགོས་ཀྱི་ཡོད། ༸གོང་ས་མཆོག་དགུང་གྲངས་བཅུ་དྲུག་ལ་ཕེབས་སྐབས་བོད་ཀྱི་ཆོས་སྲིད་གཉིས་ཀྱི་ཐུགས་འགན་བཞེས་དགོས་བྱུང་ཡོད། དེའི་སྐབས་གྲོས་མཐུན་དོན་ཚན་བཅུ་བདུན་ཟེར་བར་ས་ཡིག་བརྒྱབ་ཟིན་པ་རེད།
ཕྱི་ལོ་ ༡༩༥༤ ལོར་རྒྱལ་བ་པཎ་ཆེན་རྣམ་གཉིས་རྒྱ་ནག་ཏུ་ཕེབས་ཏེ། རྒྱ་ནག་གཞུང་གི་འགྲོ་སྟངས་གང་འདྲ་ཡིན་མིན་༸གོང་ས་༸སྐྱབས་མགོན་ཆེན་པོ་མཆོག་གི་ཆ་ཚང་གཟིགས་ཡོད། ལྷག་པར་ཕྱི་ལོ་ ༡༩༥༦ རྒྱ་གར་དུ་སྟོན་པ་སྐུ་འཁྲུངས་ནས་ལོ་ཉིས་སྟོང་ལྔ་བརྒྱ་འཁོར་བའི་དུས་དྲན་དུ་ཆིབས་སྒྱུར་བསྐྱངས་ཡོད། དེའི་སྐབས་༸གོང་ས་མཆོག་རྒྱ་གར་གྲོས་ཚོགས་ནང་གཟིགས་སྐོར་དུ་ཕེབས་སྐབས། སྤྱིར་བཏང་རྒྱ་གར་གྱི་གྲོས་ཚོགས་ནང་ཟང་ཟིང་ཡོད་ཀྱང་མི་སོ་སོའི་རྣམ་དཔྱོད་དང་རང་དབང་ཐོག་སྐད་ཆ་ཤོད་རྒྱུ་ཡོད་པ་དེ་གཟིགས་ཡོད། དེར་བརྟེན་དམར་པོ་གཞུང་གི་འགྲོ་སྟངས་དང་མང་གཙོའི་གཞུང་གི་འགྲོ་སྟངས་ཆ་ཚང་གཟིགས་ཡོད་སྟབས། དེང་སྐབས་ཀྱང་༸གོང་ས་མཆོག་གིས་རྒྱ་གར་ནང་ཟང་ཟིང་ཡོད་ཀྱང་རང་དབང་ཐོག་ནས་སྐད་ཆ་ཤོད་རྒྱུ་ཡོད་པར་བརྟེན། དེའི་སྐབས་ནས་མང་གཙོའི་ལམ་དུ་འགྲོ་རྒྱུའི་ངེས་ཤེས་རྙེད་སྐོར་བཀའ་སློབ་སྩལ་གྱི་འདུག ང་ཚོའི་མང་གཙོའི་ལམ་ལུགས་འདི་ཨ་རིའི་སྲིད་འཛིན་ལམ་ལུགས་དང་རྒྱ་གར་ལྟར་གྲོས་ཚོགས་ལམ་ལུགས་རེད་དམ་ཞེ་ན་བརྗོད་ཐུབ་རྒྱུ་མེད་པ་ལྟ་བུ་རེད། གང་ལ་ཞེ་ན། ང་ཚོ་བཙན་བྱོལ་གྱི་གནས་བབ་ལ་བསྟུན་ནས་ང་ཚོའི་མང་གཙོའི་ལམ་ལུགས་འཕེལ་རྒྱས་ཕྱིན་ཡོད། ཅེས་སོགས་ཀྱི་གསུང་བཤད་དང་སློབ་ཕྲུག་ཚོའི་དྲི་བར་ལན་འདེབས་གནང་ཡོད། །
