༢༠༡༣ ཟླ་ ༡༢ ཚེས་ ༡༢ རེས་གཟའ་ཕུར་བུ།
༄༅། །འཛམ་གླིང་ཁྱོན་ཡོངས་སུ་གནས་པའི་བོད་མི་དང་བོད་དོན་རྒྱབ་སྐྱོར་བ་རྣམས་ཀྱིས་ལོ་ལྟར་ཟླ་ ༡༢ ཚེས་ ༡༠ ཉིན་༸གོང་ས་༸སྐྱབས་མགོན་ཆེན་པོ་མཆོག་ལ་ནོ་བེལ་ཞི་བདེའི་གཟེངས་རྟགས་འབུལ་ལམ་ཞུས་པ་དང་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་སྲུང་བརྩི་ཞུ་སྲོལ་ཡོད་པ་ལྟར་འདི་ལོའི་དུས་ཆེན་ཉིན་དེར་བོད་མིའི་སྒྲིག་འཛུགས་ཀྱི་ཆོས་རིག་དང་ནང་སྲིད། དཔལ་འབྱོར། འཕྲོད་བསྟེན། ཕྱི་དྲིལ་བཅས་ལྷན་ཁང་སོ་སོའི་བཀའ་བློན་རྣམས་ཀྱིས་བྷེལ་ཇམ་དང་ཨི་ཊ་ལི། ཕ་རན་སི། ནེ་དྷར་ལེན་ཌི། ཇར་མན་བཅས་རྒྱལ་ཁབ་དེ་དག་ནང་གནས་སྡོད་བོད་རིགས་དང་བོད་དོན་རྒྱབ་སྐྱོར་བ་སོགས་དང་ལྷན་དུས་ཆེན་སྲུང་བརྩི་གཟབ་རྒྱས་ཞུས་ཡོད།
དེ་ཡང་ནང་སྲིད་བཀའ་བློན་རྒྱ་རི་སྒྲོལ་མ་མཆོག་ཕྱི་ལོ་ ༢༠༡༣ ཟླ་ ༡༢ ཚེས་ ༩ ཉིན་ཨི་ཊ་ལིའི་རང་སྐྱོང་མངའ་ཁུལ་ཏེ་རེན་ཏོའི་རྒྱལ་ས་ཊོ་རི་ནོར་ Torino ཕེབས་འབྱོར་བྱུང་རྗེས་ས་གནས་སུ་བོད་ནང་དང་བཙན་བྱོལ་ནང་གི་བོད་མིའི་མི་ཚེ། ཞེས་པའི་བརྗོད་གཞིའི་ཐོག་ལྷན་ཚོགས་སུ་གསུང་བཤད་གནང་ཡོད།
ཕྱི་ཚེས་ ༡༠ ཉིན་ནང་སྲིད་བཀའ་བློན་མཆོག་གིས་པེཌ་མོནྜ་ས་གནས་རང་སྐྱོང་ལྷན་ཁང་ Regional Council of Piedmont Region གི་གཙོ་འཛིན་སྐུ་ཞབས་ཝ་ལེ་རིའོ་ཀ་ཏ་ནིའོ་ Mr Valerio Cattaneo མཆོག་དང་། ས་གནས་འགྲོ་བ་མིའི་ཐོབ་ཐང་ལྷན་ཚོགས་དང་བོད་དོན་རྒྱབ་སྐྱོར་གནང་མཁན་ས་གནས་གྲོས་ཚོགས་ཀྱི་འཐུས་མི་སྐུ་ཞབས་གྷེན་པེ་རོ་ལིའོ་ Mr Gianpiero Leo མཆོག་བཅས་དང་མཇལ་འཕྲད་གནང་ཡོད།
ཕྱི་དྲིལ་བཀའ་བློན་མཆོག་ནེ་དྷར་ལེན་ཌིར་ཕེབས་སྐབས།
སྐབས་དེར་ཝ་ལེ་རིའོ་ཀ་ཏ་ནིའོ་མཆོག་གིས་༸གོང་ས་༸སྐྱབས་མགོན་ཆེན་པོ་མཆོག་དང་བོད་མི་ཚོར་གདུང་སེམས་མཉམ་སྐྱེའི་རྣམ་པ་ཤུགས་ཆེ་བསྟན་ཡོད། གཞན་ཡང་མཇལ་འཕྲད་སྐབས་དེར་རེ་ཌི་ཀལ་ཆབ་སྲིད་ཚོགས་པའི་ Radical Party འཐུས་མི་སྐུ་ཞབས་བྷུར་རུ་ནོ་མེ་ལ་ནོ་ Mr Bruno Mellano ལགས་དང་། ལྕམ་སྐུ་རོ་ས་ན་ཌེ་ཇི་ཝ་ནི་ Mrs Rosanna Degiovanni ལགས་བཅས་ལྷན་བཅར་ཞུས་ཡོད། ཕྱོགས་མཚུངས་ནང་སྲིད་བཀའ་བློན་མཆོག་གིས་ཊོ་རི་ནོ་གྲོང་ཁྱེར་ལྷན་ཚོགས་ཀྱི་ཚོགས་གཞོན་སྐུ་ཞབས་སིལ་ཝིའོ་མག་ལི་ཡ་ནོ་ Mr Silvio Magliano མཆོག་མཇལ་འཕྲད་གནང་ཡོད།
ཕ་རན་སིའི་གྲོས་ཚོགས་འོག་མའི་བོད་དོན་རྒྱབ་སྐྱོར་ཚོགས་པའི་ཚོགས་གཞོན་སྐུ་ཞབས་པེ་ཊིག་བྷོ་ལོ་ཆི་ Mr Patrick Bloche མཆོག
དེ་བཞིན་ཉིན་དེའི་ཕྱེད་ཡོལ་ནང་སྲིད་བཀའ་བློན་མཆོག་གིས་ཁུ་ནིའོར་Cuneo ཕེབས་ཏེ་ས་གནས་ཀྱི་གཙོ་འཛིན་ལྕམ་སྐུ་གྷི་ཡ་ན་བྷན་ཤི་ཡ་Mrs Gianna Gancia མཆོག་དང་གྲོང་སྡེའི་སྤྱི་ཁྱབ་པ་ཕེ་ཌེ་རི་ཀོ་བྷོརྒ་ན་Mr Federico Borgna མཆོག་བཅས་དང་མཇལ་འཕྲད་གནང་སྐབས་ཁོང་གཉིས་ཀྱས་༸གོང་ས་མཆོག་དང་བོད་མི་ཚོར་གདུང་སེམས་མཉམ་སྐྱེའི་རྒྱབ་སྐྱོར་ཤུགས་ཆེ་གནང་ཡོད།
དེ་བཞིན་དཔལ་འབྱོར་བཀའ་བློན་ཚེ་རིང་དོན་གྲུབ་མཆོག་དབུ་བཞུགས་ཐོག་ཕ་རན་སིའི་རྒྱལ་ས་པེ་རི་སིའི་ Paris ནང་ནོ་བེལ་ཞི་བདེའི་གཟེངས་རྟགས་དང་རྒྱལ་སྤྱིའི་འགྲོ་བ་མིའི་ཐོབ་ཐང་ཉིན་མོ་སྲུང་བརྩི་ཞུས་ཡོད། མཛད་སྒོ་དེ་བཞིན་ཕ་རན་སིའི་བོད་རིགས་ཚོགས་པ་དང་སྐུ་ཚབ་དོན་ཁང་གཉིས་ཀྱིས་གོ་སྒྲིག་གནང་བ་ཞིག་ཡིན་འདུག མཛད་སྒོའི་སྐབས་ཕ་རན་སིའི་གྲོས་ཚོགས་འོག་མའི་བོད་དོན་རྒྱབ་སྐྱོར་ཚོགས་པའི་ཚོགས་གཞོན་སྐུ་ཞབས་པེ་ཊིག་བྷོ་ལོ་ཆི་ Mr Patrick Bloche མཆོག་དང་གྲོས་ཚོགས་གོང་མའི་བོད་དོན་རྒྱབ་སྐྱོར་ཚོགས་པའི་ཚོགས་མི་སྐུ་ཞབས་ཨེན་ཌི་རེ་གྷ་ཏོ་ལིན་ Andre Gattolin མཆོག་མཉམ་ཞུགས་གནང་ཡོད།
སྐབས་དེར་དཔལ་འབྱོར་བཀའ་བློན་མཆོག་གིས་ཕ་རན་སིར་བོད་དོན་རྒྱབ་སྐྱོར་ཚོགས་པ་འདྲ་མིན་ཡོད་པ་རྣམས་ཀྱིས་ནུས་པ་མཉམ་སྤུངས་ཐོག་རྒྱལ་ནང་དང་རྒྱལ་སྤྱིའི་ཁྱོན་ཡོངས་ནས་བོད་དོན་ཆེད་རྒྱབ་སྐྱོར་སྔར་ལྷག་རག་ཐབས་གནང་རྒྱུ་ཧ་ཅང་གལ་ཆེ་ཡིན་སྐོར་གསུངས་པ་མ་ཟད། འཚེ་མེད་ཞི་བ་དང་བྱམས་བརྩེར་གཞི་བཅོལ་བའི་བོད་མིའི་ཆོས་དང་རིག་གཞུང་སྲུང་སྐྱོབས་བྱ་རྒྱུ་ཧ་ཅང་གལ་ཆེ་ཡིན་སྐོར་དང་བོད་མིའི་སྒྲིག་འཛུགས་ཀྱིས་མང་གཙོའི་ལམ་ནས་གཏན་ལ་ཕབ་པའི་གཉིས་སྨན་དབུ་མའི་ལམ་གྱི་སྲིད་བྱུས་ལ་ཡིད་ཆེས་བརྟན་པོས་རྒྱབ་སྐྱོར་ཞུ་བཞིན་པ་དང་། ལངས་ཕྱོགས་དེ་ནི་ཁ་ཡོད་ལག་ཡོད་དངོས་ཡོད་གནས་ཚུལ་དང་མཐུན་པ་ཞིག་ཡིན་པར་བརྟེན་བོད་ཀྱི་གནད་དོན་སེལ་རྒྱུའི་ཐབས་ལམ་ཉག་གཅིག་ཡིན་སྐོར་གསུངས། དེ་བཞིན་སྐབས་དེར་སྐུ་ཞབས་པེ་ཊིག་བྷོ་ལོ་ཆི་མཆོག་གིས་དུས་དྲན་དང་འབྲེལ་བའི་གསུང་བཤད་གནང་བ་མ་ཟད། བྷར་སེལ་སྐུ་ཚབ་དོན་ཁང་གི་སྐུ་ཚབ་དོན་གཅོད་དངོས་གྲུབ་རྡོ་རྗེ་ལགས་ཀྱིས་བཀའ་ཤག་གི་གཏམ་བཤད་སྒྲོགས་སྦྱང་གནང་ཡོད། ཐེངས་འདིར་དཔལ་འབྱོར་བཀའ་བློན་མཆོག་གིས་ཕ་རན་སིའི་ས་གནས་བོད་རིགས་ཚོགས་པའི་ཚོགས་མི་རྣམས་དང་མཇལ་འཕྲད་གནང་ཡོད།
