༢༠༡༣ ཟླ་ ༡༢ ཚེས་ ༢༠ རེས་གཟའ་པ་སངས།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བྷན་ངྷ་ར་ནོར་རྒྱལ་གླིང་བོད་མིའི་གཞིས་ཆགས་ཀྱི་མང་ཚོགས་ཀྱིས་ཇི་ལྟར་སྔོན་ནས་གསོལ་འདེབས་ཞུས་དོན་ལྟར་བཀའ་བཞེས་ཟབ་མོ་ཐོབ་སྟེ་ཕྱི་ལོ་ ༢༠༡༤ ཟླ་ ༡ ཚེས་ ༡༡ ཉིན་ཁུལ་དེར་རྟེན་གཞི་བྱས་པའི་གཞིས་ཁུལ་ཐེག་ཆེན་ཆོས་གླིང་དུ་མང་ཚོགས་ལ་ཐུགས་རྗེ་ཆེན་པོའི་བཀའ་དབང་བཀའ་དྲིན་སྩལ་རྒྱུ། ཕྱི་ཚེས་ ༡༢ ཉིན་མགོན་པོ་གང་ཉིད་མཆོག་གིས་དད་ལྡན་མི་དམངས་ལ་བཀའ་སློབ་དང་དེ་བཞིན་ས་གནས་དེའི་ཉེ་ཁུལ་དུ་ཡོད་པའི་ཌོག་ཊར་ཨམ་བྷེ་ཊི་ཀར་ནང་པའི་རྗེས་འབྲང་པ་ཚོར་བཀའ་སློབ་སྩལ་རྒྱུ་ཡིན་འདུག
༸གོང་ས་མཆོག་ཁུལ་དེར་ཆིབས་སྒྱུར་བསྐྱང་གཏན་འཁེལ་ཡོད་སྟབས། གཞིས་སྒར་བོད་མི་རྣམས་ཀྱིས་དགའ་དད་སྤྲོ་གསུམ་ངང་ནས་ཁོར་ཡུག་གཙང་བཟོ་གནང་བཞིན་ཡོད་འདུག ལྷག་པར་གཞིས་མི་དགུན་ཚོང་དུ་སྐྱོད་མཁན་རྣམས་ཀྱང་མགོན་པོ་གང་ཉིད་མཆོག་གི་མཇལ་ཁ་དང་བཀའ་སློབ་གསན་ཆེད་ཕྱིར་གཞིས་ཆགས་སུ་ལོག་རྒྱུ་ཡིན་འདུག གཞི་རྩའི་༸གོང་ས་མཆོག་ཁུལ་དེར་ཆིབས་སྒྱུར་ཐེངས་དགུ་པ་ཆགས་ཀྱི་ཡོད་འདུག
