༢༠༡༣ ཟླ་ ༡༢ ཚེས་ ༧ རེས་གཟའ་སྤེན་པ།
༄༅། །ཕྱི་ལོ་ ༢༠༡༣ ཟླ་ ༡༢ ཚེས་ ༦ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཇི་ལྟར་གསོལ་འདེབས་ཞུས་དོན་ལྟར་རྒྱ་གར་རྒྱལ་ས་དིལླིའི་ལྷོ་ཕྱོགས་སུ་རྟེན་གཞི་བྱས་པའི་ཝ་སནྟ་ཝེ་ལིའི་སློབ་གྲྭར་ Vasant Valley ཆིབས་སྒྱུར་བསྐྱངས་ཏེ། དགེ་ལས་སློབ་ཕྲུག་རྣམས་ལ་ལམ་སྟོན་བཀའ་སློབ་སྩལ། དེ་ཡང་མགོན་པོ་གང་ཉིད་མཆོག་སློབ་གྲྭའི་ནང་༸ཞབས་སོར་འཁོད་བསྟུན་སློབ་གྲྭའི་ངེས་སྟོན་པ་སྐུ་ཞབས་ཨ་རུན་ཀ་པུར་ Director Arun Kapur ལགས་དང་ལྕམ་སྐུ་རེ་ཁ་པུ་རི་ Mrs Rekha Purie ལགས་བཅས་ཀྱིས་ཕེབས་བསུ་གཟབ་རྒྱས་ཞུས་ཡོད།
དེ་རྗེས་ངེས་སྟོན་པས་ཐོག་མར་ངོ་སྤྲོད་གནང་གྲུབ་བསྟུན། ༸གོང་ས་མཆོག་གིས་བཀའ་སློབ་སྩལ་དོན། ངོས་རང་ཁྱེད་ཚོ་གཞོན་སྐྱེས་ཚོ་དང་དེ་རིང་འདིར་ཐུག་རྒྱུ་བྱུང་བར་ཧ་ཅང་དགའ་པོ་བྱུང་། སྤྱིར་ངོས་རང་གཞོན་སྐྱེས་ཚོ་དང་ཐུག་རྒྱུ་དགའ་པོ་ཡོད། ཁྱེད་ཚོ་གཞོན་སྐྱེས་ཚོ་དང་ཐུག་སྐབས་ངོས་རང་ཡང་ལོ་གཞོན་ཡིན་པའི་ཚོར་སྣང་ཡོང་བཞིན་འདུག ང་ཚོ་རྒན་པ་ཚོས་ལས་འགན་རྣམས་བསྒྲུབས་ཟིན་ཡང་ཁྱེད་རྣམས་མི་ཚེ་བདེ་སྐྱིད་ལྡན་པ་ཞིག་བསྐྱལ་རྒྱུའི་གྲ་སྒྲིག་ད་ལྟ་ནས་བྱེད་དགོས། རྒྱ་གར་ནི་གནའ་རབས་ཀྱི་ལོ་རྒྱུས་ཡོད་པའི་རྒྱལ་ཁབ་གཅིག་ཆགས་ཡོད་པ་ཙམ་མ་ཟད། དེང་སྐབས་འཛམ་གླིང་ནང་མི་འབོར་ཆེ་ཤོས་ཡིན་པའི་མང་གཙོའི་རྒྱལ་ཁབ་གཅིག་ཀྱང་ཆགས་ཡོད།
རྒྱ་གར་ནི་རང་བཙན་ཐོབ་པའི་ཁྱིམ་མཚེས་རྒྱལ་ཁབ་གཞན་དང་བསྡུར་ན་བརྟན་ལྷིང་ལྡན་པའི་སྤྱི་ཚོགས་ཤིག་ཡིན་པ་མ་ཟད། གསར་འགོད་རང་དབང་དང་ཁྲིམས་ཀྱི་དབང་བསྒྱུར་ཡོད་པའི་མང་གཙོའི་རྒྱལ་ཁབ་གཅིག་ཆགས་ཡོད། ངོས་རང་རྒྱ་གར་དུ་འབྱོར་ནས་ད་བར་མི་ལོ་ ༥༤ ཕྱིན་ཡོད། དུས་སྐབས་དེའི་རིང་ངོས་ཀྱིས་ཡུལ་འདིའི་ནང་ཧ་ལས་པའི་ཡར་རྒྱས་ཕྱིན་པ་མཐོང་བྱུང་། ལྷག་པར་གཞོན་སྐྱེས་ཚོར་རང་གི་རྒྱལ་ཁབ་ཙམ་མ་ཟད། འཛམ་གླིང་ཁྱོན་ཡོངས་ཀྱི་སྤྱི་ཚོགས་གནས་སྟངས་བཟང་དུ་གཏོང་རྒྱུའི་ནུས་པ་ཡོད། ངོས་ཀྱིས་འདས་པའི་མི་ལོ་ ༣༠ ལྷག་ཙམ་རིང་ཚན་རིག་པ་དང་ལྷན་བགྲོ་གླེང་བྱས་པ་ཡིན། ཕྱི་དངོས་པོ་གཟུགས་ཅན་རགས་པའི་རྣམ་གཞག་ཐོག་ནས་བརྗོད་ན་ཚན་རིག་པ་ཚོ་ཧ་ལས་པའི་ཡར་ཐོན་ཆགས་ཡོད། འོན་ཀྱང་ནང་གི་བསམ་བློ་དང་ཤེས་པའི་རྣམ་གཞག་ཐོག་ནས་ད་ལྟ་གཞི་ནས་འགོ་བཙུགས་ཙམ་ལྟ་བུ་ཆགས་ཡོད། ཅེས་སོགས་ཀྱི་བཀའ་སློབ་སྩལ་རྗེས་སློབ་ཕྲུག་རྣམས་ཀྱི་དྲི་བར་བཀའ་ལན་མཛད།
ཉིན་གུང་ལྗགས་སྨིན་གྲུབ་རྗེས་སློབ་ཕྲུག་གཉིས་ཀྱི་ཆེད་དོན་དྲི་བར་༸གོང་ས་མཆོག་གིས་བཀའ་ལན་སྩལ།
དེ་རྗེས་སློབ་གྲྭའི་ཉེ་འཁྲིས་སུ་ཡོད་པའི་མཆིན་པ་དང་མཁྲིས་པའི་སྨན་བཅོས་བསྟི་གནས་ཁང་ཞིག་ཏུ་ཆིབས་སྒྱུར་བསྐྱངས་ཏེ། ཐེངས་ ༡༦ པའི་མཆིན་པའི་གཉན་ཚད་སྲུང་བརྩི་ཞུ་བའི་ཉི་མོའི་ 16th Hepatitis Day མཛད་སྒོའི་ཉིན་མོར་དབུ་བཞུགས་ཀྱིས་བཀའ་སློབ་སྩལ།
དེ་ཡང་མཛད་སྒོའི་ཐོག་བསྟི་གནས་ཁང་གི་འགན་འཛིན་སྐུ་ཞབས་ཌི་ཨེམ་སི་པོ་ལི་ཡ་ D.M. Spolia མཆོག་དང་ཤིབ་ས་རིན་ Dr Shiv Sarin མཆོག་རྣམ་གཉིས་ཀྱིས་༸གོང་ས་མཆོག་ལ་ཕེབས་བསུ་གཟབ་རྒྱས་ཞུས་ཡོད། དེ་རྗེས་༸གོང་ས་མཆོག་གིས་སྣང་གསལ་ཞལ་ཕྱེ་མཛད་གྲུབ་བསྟུན་འགན་འཛིན་མཆོག་གིས་ཚོགས་བཅར་བ་རྣམས་ལ་ངོ་སྤྲོད་ཀྱི་གསུང་བཤད་གནང་། དེ་ནས་མཆིན་པ་ཞལ་འདེབས་རག་ནས་དྲག་སྐྱེད་བྱུང་བའི་ཕྲུ་གུ་གསུམ་གྱིས་བསྟོད་གླུ་དབྱངས་སུ་གྱེར། དེ་ནས་༸གོང་ས་མཆོག་གིས་བཀའ་སློབ་སྩལ་དོན། ཁྱེད་ཚོ་ལྟར་ངོས་ནས་ཀྱང་དེ་རིང་འདིར་མཆིན་པའི་གཉན་ཚད་མེད་པ་བཟོ་རྒྱུའི་ལས་གཞིར་རྒྱབ་སྐྱོར་ཆེད་རས་གསེར་པོ་ཞིག་བཏགས་ཡོད།
ཕྱི་ལོ་ ༡༩༦༦ ལོར་ངོས་རང་མཆིན་ནད་ཕོག་ནས་ལུས་པོ་ཡོངས་རྫོགས་སེར་རྐྱང་ཆགས་སོང་། སྐབས་ཤིག་ལ་ཉམས་རྟོགས་ཡོན་ཏན་རྒྱུད་ལ་སྐྱེས་མེད་ཀྱང་མཁྲིས་ནད་ཕོག་པར་བརྟེན་ངོས་ཀྱི་ལུས་ཡོངས་རྫོགས་སྟོན་པ་བཅོམ་ལྡན་འདས་དང་མཚུངས་པ་ཞིག་ཆགས་ཡོད། ཕྱིས་སུ་དེས་རྐྱེན་བྱས་ནས་མཁྲིས་རྡོ་མང་པོ་བསགས་པར་བརྟེན་གཤག་བཅོས་བྱེད་དགོས་བྱུང་། ཞེས་སོགས་ཀྱི་བཀའ་སློབ་དང་ཚོགས་བཅར་བའི་དྲི་བར་བཀའ་ལན་སྩལ། མཛད་སྒོ་གྲུབ་རྗེས་༸གོང་ས་མཆོག་གིས་ལྗོན་ཤིང་ཞིག་འདེབས་འཛུགས་མཛད་ཡོད་པ་བཅས།།
