༢༠༡༣ ཟླ་ ༡༡ ཚེས་ ༧ རེས་གཟའ་ཕུར་བུ།
༄༅། །འདི་གར་བོད་མི་མང་སྤྱི་འཐུས་རོང་པོ་བློ་བཟང་སྙན་གྲགས་ལགས་ཀྱིས་བཏང་གནས་ནང་འཁོད་དོན། ཕྱི་ལོ་ ༢༠༡༣ ཟླ་ ༡༡ ཚེས་ ༦ ཉིན་སུད་སི་གནས་སྡོད་ལྷུན་གྲུབ་ཚང་ཀརྨ་བཀྲ་ཤིས་ཚེ་རིང་དང་། སྟག་ཚང་དཀོན་ཅོག་ཁྱིམ་ཚང་གཉིས་ཀྱིས་རྒྱལ་ཚོགས་ལ་བོད་དོན་ཞུ་གཏུག་གི་ལས་འགུལ་ཐེངས་ ༢༢ པ་དེ་སྤེལ་ཡོད་འདུག་ཅིང་། ཐེངས་འདིའི་ལས་འགུལ་ནང་ཡུ་རོབ་སྤྱི་ཟུར་གསུམ་དང་བཀའ་རྒྱུད་སྤྱི་འཐུས་ཟུར་པ་གཅིག་བཅས་མཉམ་ཞུགས་གནང་སྟེ་ཁྱིམ་ཚང་གཉིས་ཀྱི་རྒྱལ་ཚོགས་ལ་བོད་དོན་ཞུ་གཏུག་ལས་འགུལ་སྤེལ་ནས་ལོ་གཅིག་འཁོར་བཞིན་པར་རྒྱབ་སྐྱོར་དང་བསྔགས་བརྗོད་གནང་ཡོད་འདུག
ལས་འགུལ་འདིར་རྒྱབ་སྐྱོར་དང་བསྔགས་བརྗོད་ཞུ་ཆེད་ཡུ་རོབ་སྤྱི་ཟུར་གསང་གླིང་ཚེ་རིང་རྡོ་རྗེ་ལགས་དང་། ཡུ་རོབ་སྤྱི་ཟུར་སྨོན་མཁར་བསོད་ནམས་ཕུན་ཚོགས་ལགས། ཡུ་རོབ་སྤྱི་ཟུར་གང་གཞོན་ཚང་ངག་དབང་རྒྱལ་མཚན་ལགས། བཀའ་རྒྱུད་སྤྱི་ཟུར་ཆོས་རྒྱལ་བསྟན་འཛིན་ལགས་བཅས་མཉམ་ཞུགས་གནང་ཞིང་། མ་འོངས་པར་ཁྱིམ་ཚང་གཉིས་ཀྱི་ལས་འགུལ་འདི་བཞིན་བོད་པའི་སྤྱི་ཚོགས་ནང་གལ་ཆེན་པོ་ཡིན་པ་དང་། ང་ཚོའི་སྤྱི་ཚོགས་ནང་ལས་འགུལ་སྤེལ་སྐབས་གཞུང་དང་ཚོགས་པ་སྐྱིད་སྡུག་ཁག་གི་གོ་སྒྲིག་ལ་སྒུག་ནས་སྡོད་རྒྱུ་མ་ཡིན་པར། བོད་པ་མི་རེ་ངོ་རེ་ནས་བོད་པའི་ལས་འགན་སྒྲུབ་ཐུབ་པ་གནང་དགོས་པའི་ཐད་དགོངས་ཚུལ་ལྷུག་པོ་བརྗོད་གནང་བ་མ་ཟད།
ཁོང་ནང་མི་གཉིས་ཀྱིས་སུད་སི་ཇི་ནི་ཝ་གྲོང་ཁྱེར་ནང་རྟེན་གཞི་བྱས་པའི་མཉམ་འབྲེལ་རྒྱལ་ཚོགས་ཀྱི་ལས་ཁུངས་མདུན་དུ་བོད་དོན་ཞུ་གཏུག་གི་ལས་འགུལ་སྤེལ་ནས་ལོ་གཅིག་འགྲོ་བཞིན་པར་རྒྱབ་སྐྱོར་དང་བསྔགས་བརྗོད་མཚོན་ཆེད་མཇལ་དར་ལེགས་སྒྲོན་གནང་བ་མ་ཟད། ལས་འགུལ་ཐོག་ཉིན་གཅིག་རིང་མཉམ་ཞུགས་ཀྱིས་བོད་དོན་ཡིག་ཆ་གྲངས་ ༦༠༠ ཙམ་འགྲེམས་སྤེལ་གནང་། ལས་འགུལ་འདིའི་དགོས་འདུན་དོན་ཚན་དྲུག་གིས་མཚོན་པའི་དམིགས་ཡུལ་ཁག་མཉལ་འབྲེལ་རྒྱལ་ཚོགས་ཀྱི་ལས་ཁུངས་དང་། མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ཆེས་མཐོའི་ལས་ཁུངས་བཅས་སུ་སྙན་ཞུ་ཕུལ།
དེ་ཡང་ལས་འགུལ་འདི་ནི་ཟླ་གཅིག་གི་ནང་གཟའ་ལྷག་པ་དང་པོ་དང་། གཟའ་ལྷག་པ་གསུམ་པ་གཉིས་སུ་བསྟུད་མར་ཟླ་རེར་ཐེངས་གཉིས་རེ་སྤེལ་བཞིན་པའི་ལས་འགུལ་ཞིག་ཡིན་པ་དང་། ལས་འགུལ་སྤེལ་སྟངས་དེ་ཡང་མི་མང་པོ་ལྷན་དུ་འཛོམས་ཏེ་སྐད་འབོད་སོགས་གནང་རྒྱུ་མ་ཡིན་པར། རྒྱལ་ཚོགས་མདུན་དུ་བོད་ཀྱི་རྒྱལ་དར་སྒྲེང་འཛུགས་དང་། བོད་ནང་གི་དཀའ་སྡུག་གི་གནས་བབ་འཁོད་པའི་ཡིག་ཆ་ཁག་འགྲེམས་སྤེལ། ལྷག་པར་སྐུ་ལུས་མེར་སྲེག་གནང་མཁན་རྒྱལ་གཅེས་དཔའ་བོ་དཔའ་མོ་ཚོའི་སྐུ་པར་འགྲེམས་འཇོག དེ་བཞིན་ཁོང་རྣམས་ཀྱི་སྐུ་ལུས་མེར་སྲེག་གནང་དགོས་པའི་རྒྱབ་ལྗོངས་འགྲེལ་བརྗོད་དང་ཁོང་རྣམས་ཀྱི་འབོད་སྒྲའམ་དགོས་འདུན་འཁོད་པའི་ཡིག་ཆ་ཁག་དང་འཕྲེད་དར།
དེ་བཞིན་སྐུ་ལུས་མེར་སྲེག་གནང་བའི་ཐད་༸གོང་ས་མཆོག་དང་དབུས་བོད་མིའི་སྒྲིག་འཛུགས་ཀྱི་ལངས་ཕྱོགས་དང་དགོངས་ཚུལ་ག་རེ་ཡིན་པའི་སྐོར་གྱི་ཡིག་ཆ་དང་འཕྲེད་དར། ༸གོང་ས་མཆོག་གིས་དམིགས་བསལ་རྒྱ་རིགས་ཚོར་བཀའ་སློབ་སྩལ་བའི་ཡིག་ཆ་སོགས་རྒྱ་ཡིག་དང་། དབྱིན་ཡིག འཇར་མན་ཡི་གེ་བཅས་ཀྱི་ནང་བསྒྱུར་ཏེ། ཕྱི་རྒྱལ་མི་རིགས་དང་། རྒྱལ་ཚོགས་ཀྱི་ལས་བྱེད། ལྷག་དོན་རྒྱ་རིགས་ཡུལ་སྐོར་བ་མང་པོར་འགྲེམས་སྤེལ་བྱེད་བཞིན་འདུག་ཅིང་། ཐེངས་རེ་རེ་བཞིན་མཉམ་འབྲེལ་རྒྱལ་ཚོགས་ཀྱི་ལས་ཁུངས་དང་། མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ཆེས་མཐོའི་ལས་ཁུངས་གཉིས་ལ་དགོས་འདུན་སྙན་ཞུ་གཏོང་བཞིན་ཡོད་འདུག
