༢༠༡༣ ཟླ་ ༡༡ ཚེས་ ༢༨ རེས་གཟའ་ཕུར་བུ།
༄༅། །འདི་གར་བོད་མིའི་སྒྲིག་འཛུགས་ཀྱི་ཆེས་མཐོའི་ཁྲིམས་ཞིབ་ཁང་ནས་ཕྱི་ལོ་ ༢༠༡༣ ཟླ་ ༡༡ ཚེས་ ༢༨ ཉིན་བཏང་གནས་ནང་འཁོད་དོན། བྱང་ཕྱོགས་བོད་མིའི་ས་གནས་ཁྲིམས་ཞིབ་ཁང་གི་ས་གནས་ཁྲིམས་ཞིབ་པ་རྣམ་རྒྱལ་ཚེ་སྐྱིད་ལགས་ཀྱིས། ཕྱི་ལོ་ ༢༠༡༣ ཟླ་ ༡༡ ཚེས་ ༢༡ རེས་གཟའ་ཕུར་བུ་ཉིན་རྡ་ས་ས་གནས་འཐུས་ཚོགས་སྐབས་བརྒྱད་པའི་འདེམས་ཐོན་ཚོགས་མི་རྣམ་པ་དང་། ཚོགས་གཙོ། ཚོགས་གཞོན་བཅས་ཀྱི་དམ་བཅའ་འབུལ་བཞེས་ཀྱི་གནང་སྒོ་ཁག་ལེགས་གྲུབ་བྱུང་ཡོད་པ་དང་།
ཉིན་དེའི་ཉིན་རྒྱབ་ཚོུད་ ༣།༠༠ ནས་ ༤།༣༠ བར་ཤེས་རབ་དགའ་ཚལ་སློབ་གྲྭའི་ཚོགས་ཁང་དུ་དགེ་ལས་དང་སློབ་ཕྲུག ༢༧༠ ཙམ་ལ་བཙན་བྱོལ་བོད་མིའི་ཁྲིམས་ལུགས་དབང་འཛིན་ངོ་སྤྲོད་དང་། སྤྱི་མང་གཏུག་བཤེར་གྱི་དོན་ཚན་གལ་ཆེ་ཁག་གི་སྐོར་གཏམ་བཤད་དང་སྦྲགས། དམིགས་བསལ་ཁྲིམས་ཁོངས་ཁྱབ་ཚད་དང་། གྱོད་ཡའི་མོས་མཐུན་ཆོད་ཡིག ལག་བསྟར་དམ་ཡིག བརྡ་ཐོར་བརྩི་བཀུར། གཞི་རྩའི་ཆ་རྐྱེན། བྱེད་ཐབས་ཇི་ཡོད། གྱོད་ཡ་ཉམ་ཐག་ལ་མཐུན་རྐྱེན། ཁྱད་གསོད་བཅས་ཀྱི་སྐོར་གསུང་བཤད་ལེགས་གྲུབ་མཚམས་དགེ་རྒན་དང་སློབ་ཕྲུག་བཅས་ཀྱི་དྲི་བར་ལན་འདེབས་གནང་འདུག ཕྱི་ཚེས་ ༢༢ སྔ་དྲོ་ཚོུད་ ༡༠།༠༠ ནས་ ༡༢ བར་རྡ་ས་ས་གནས་འགོ་འཛིན་ལས་ཁང་གི་ཁོར་ཡུག་ཚོགས་ཁང་དུ་འདེམས་ཐོན་ས་གནས་འཐུས་མི་རྣམས་དང་། རང་བདེན་ཚོགས་ཆུང་གི་འཐུས་མི། ཚོགས་སྡེ་ཁག་གི་སྐུ་ཚབ། སེར་སྐྱ་མི་མང་བཅས་གྲངས་ ༦༨ ཙམ་ལ་བཙན་བྱོལ་བོད་མིའི་ཁྲིམས་ལུགས་དབང་འཛིན་དང་། སྤྱི་མང་གཏུག་བཤེར་བཅས་ཀྱི་དོན་ཚན་གལ་ཆེ་ཁག་སྐོར་འགྲེལ་བཤད་གནང་མཚམས་དྲི་བར་ལན་འདེབས་གནང་ཡོད།།
