༢༠༡༣ ཟླ་ ༡༡ ཚེས་ ༥ རེས་གཟའ་མིག་དམར།
༄༅། །ཕྱི་ལོ་ ༢༠༡༣ ཟླ་ ༡༡ ཚེས་ ༥ ཉིན་གངས་སྐྱིད་དཔེ་སྟོན་སློབ་གྲྭར་མེས་དབོན་གཙུག་ལག་དཔེ་སྟོན་སློབ་གྲྭ་སྟེང་ཤོད་གཉིས་དང་དགེ་རྒན་ཕ་མའི་ཚོགས་ཆུང་ཐུན་མོང་གིས་གོ་སྒྲིག་ཐོག་བཀའ་བློན་ཁྲི་ཟུར་མཁས་དབང་ཟམ་གདོང་རིན་པོ་ཆེ་མཆོག་དགུང་གྲངས་ ༧༤ ལ་ཕེབས་པའི་འཁྲུངས་སྐར་དང་སྟབས་བསྟུན་རིན་པོ་ཆེ་མཆོག་གིས་ཤེས་ཡོན་སྲིད་བྱུས་དང་འབྲེལ་བའི་ཐོག་གསུང་བཤད་གནང་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༠ ཐོག་སྐུ་མགྲོན་གཙོ་བོ་བཀའ་བློན་ཁྲི་ཟུར་མཁས་དབང་ཟམ་གདོང་རིན་པོ་ཆེ་མཆོག་དང། སམ་བྷོ་ཊ་བོད་སློབ་ཚོགས་པའི་སྤྱི་ཁྱབ་འགན་ཛིན་ཀརྨ་ཆུང་བདག་ལགས། མེས་དབོན་གཙུག་ལག་དཔེ་སྟོན་གྲྭའི་སློབ་སྤྱི་བསྟན་འཛིན་རྡོ་རྗེ་ལགས་ཀྱིས་གཙོས་དགེ་ལས་སློབ་ཕྲུག་རྣམ་པ། ཕྲུ་གུའི་ཕ་མ་བཅས་ཚང་འཛོམས་ཐོག དཔེ་སྟོན་སློབ་གྲྭའི་སློབ་སྤྱིས་རིན་པོ་ཆེ་མཆོག་གི་སྐུ་ཚེའི་ལོ་རྒྱུས་དང་འབྲེལ་བའི་ཐོག་གསུང་བཤད་གནང་གྲུབ་མཚམས། རིན་པོ་ཆེ་མཆོག་གིས་སྣང་གསལ་ཞལ་ཕྱེ་གནང་རྗེས་འབྲེལ་ཡོད་དགེ་ལས་རྣམ་པའི་སྐུ་ཚབ་དང་སློབ་ཕྲུག་གི་སྐུ་ཚབ། ཕ་མའི་སྐུ་ཚབ་བཅས་ཀྱིས་རིམ་བཞིན་རྟེན་འབྲེལ་མཇལ་དར་སྒྲོན་འབུལ་ཞུས། དེ་ནས་སློབ་ཕྲུག་རྣམས་ནས་བརྩམས་པའི་བོད་དབྱིན་གཉིས་ཀྱི་སྙན་རྩོམ་གྱེར་འདོན་དང་སྲོལ་རྒྱུན་གཞས་སྣ་འཁྲབ་སྟོན་བྱས། དེ་བཞིན་གཞས་པ་བློ་བརྟན་རྣམ་གླིང་ལགས་ཀྱིས་འབྲས་དཀར་འཁྲབ་སྟོན་གནང་གྲུབ་བསྟུན། རིན་པོ་ཆེ་མཆོག་གིས་ཤེས་ཡོན་སྲིད་བྱུས་དང་འབྲེལ་བའི་གསུང་བཤད་གནང་དོན།
ཤེས་ཡོན་སྲིད་བྱུས་སྐོར་ཚང་མས་མཁྱེན་གྱི་རེད། དེར་བརྟེན་ངས་བསྐྱར་ལྡབ་ཡང་ལྡབ་བྱས་ནས་མང་པོ་ཞིག་བཤད་ན་དགོས་པ་གང་ཡང་ཡོད་པ་མ་རེད་བསམས་ཀྱི་འདུག སྲིད་བྱུས་གང་འདྲ་ཞིག་ཡིན་རུང་བརྒྱ་ཆ་བརྒྱ་ཐམས་པ་ལག་ལེན་ཁེལ་མ་ཁེལ་དེ་ཕྱི་ནང་གི་ཆ་རྐྱེན་མང་པོ་ཞིག་ལ་རག་ལུས་ཡོད། བོད་མི་མང་སྤྱི་འཐུས་ལྷན་ཚོགས་ཀྱི་གཏན་ལ་ཕབ་པའི་ཤེས་ཡོན་སྲིད་བྱུས་དེར་བཀའ་ཤག་གི་ཆེད་བརྗོད་ཅིག་ཡོད་པ་དེའི་ནང་ཤེས་ཡོན་སྲིད་བྱུས་འདི་ལྟ་བུ་ཞིག་གཏན་ལ་ཕབ་དགོས་རྒྱུ་དང་ཡིག་ཐོག་བཀོད་དགོས་རྒྱུ་དེ་འབྱུང་རབས་ལ་འགན་འཁུར་བའི་དོན་ཙམ་མ་གཏོགས་དེའི་ནང་ཡོད་པའི་ནང་དོན་ཡོངས་རྫོགས་ཇི་མ་ཇི་བཞིན་ལག་བསྟར་ཐུབ་མ་ཐུབ་ཟེར་རྒྱུ་དེ་ཕྱི་ནང་གི་མཐུན་རྐྱེན་མང་པོ་ཞིག་ལ་རག་ལུས་ཡོད་པར་བརྟེན། ང་ཚོས་ཐག་བཅད་ནས་བརྗོད་ཐུབ་རྒྱུ་མེད། ཅེས་དེའི་ནང་བཀོད་ཡོད། འབྱུང་རབས་ལ་འགན་འཁུར་ཟེར་བ་དེ་ཡང་ད་ལྟ་ང་ཚོ་ཛ་དྲག་གི་གནས་བབ་འདི་ལྟ་བུའི་སྐབས་སུ་བོད་མི་རིགས་ཀྱི་ཐུན་མིན་ངོས་འཛིན་འདི་རྩ་རླགས་འགྲོ་རྒྱུའི་གནས་བབ་ཞིག་ལ་བསླེབས་ཡོད། གནས་བབ་འདི་འདྲའི་སྐབས་ལ་བོད་ཅེས་པ་རྒྱལ་སྤྱིའི་ནང་རླབས་ཆེན་གྱི་ངོས་འཛིན་དང་ལག་རྗེས་ཡོད་པའི་མི་རིགས་གཅིག་གི་གཞི་རྩའི་ངོས་འཛོན་འདི་བརླག་འགྲོ་རྒྱུའི་ཉེན་ཁ་ཞིག་ཡོང་བའི་སྐབས་ལ་དེ་མ་བརླག་པའི་ཐབས་ཤེས་ཡོད་དགུ་སྩལ་དྲུག་མ་ལེན་མ་འགྱོད་མེད་པ་གཅིག་ཐབས་ཤས་མ་བྱས་པ་ཡིན་ན།
ད་ལྟའི་གནས་བབ་ལ་ཡོད་པའི་མི་རབས་འདི་ཚོས་འབྱུང་འགྱུར་གྱི་བྱུང་རབས་ལ་འགན་མ་ཁུར་བ་ལྟ་བུ་ཞིག་ཆགས་ཀྱི་ཡོད། ཐབས་ཤེས་ཡུལ་དགུ་རྩལ་སྤྲུག་བྱས་པའི་རྗེས་ལ་ཐབས་ཤེས་ཐོན་དང་མ་ཐོན་ཟེར་རྒྱུ་དེ་ཕྱོགས་མང་པོ་གཞན་ཞིག་ལ་རག་ལུས་པ་རེད་མ་གཏོགས། ད་ལྟའི་མི་རབས་ཀྱིས་ང་ཚོའི་ཐབས་ཤེས་ཐོན་ཐུབ་ཀྱི་ཡིན་ཞེས་བདམས་ཐུབ་རྒྱུ་མེད་ལ། འབྱུང་འགྱུར་མི་རབས་ཀྱིས་ཐབས་ཤེས་དེ་ཐོན་དགོས་ཀྱི་རེད་ཅེས་ལབ་ཐུབ་རྒྱུ་མེད། དེར་བརྟེན་ད་ལྟའི་གནས་སྐབས་ལ་རྒྱལ་སྤྱི་དང་རྒྱལ་ནང། བཙན་བྱོལ་བོད་མིའི་གནས་བབ། ཚང་མ་ཕྱོགས་བསྡོམས་བརྒྱབ་ནས་བལྟས་སྐབས་བོད་མི་རིགས་ཀྱི་དོན་དམ་པའི་དགོས་མཁོ་དང་འཚམ་པའི་ཤེས་ཡོན་སྲིད་བྱུས་དེ་གྲོས་ཚོགས་ནས་གཏན་ལ་ཕབ་པའི་སྲིད་བྱུས་ཤིག་ཡིན་པའི་ཁུལ་རེད། འོན་ཀྱང་དུས་ཚོད་འགྱུར་བ་འགྲོ་གི་ཡོད། རྒྱལ་སྤྱི་དང་རྒྱལ་ནང། བཙན་བྱོལ་གསུམ་པོའི་སྤྱི་ཚོགས་ཀྱི་གནས་སྟངས་ལ་འགྱུར་བ་འགྲོ་གི་ཡོད། དེར་བརྟེན་ད་ལྟ་གཏན་ལ་ཕབ་པའི་སྲིད་བྱུས་དེ་ག་དུས་ཡིན་ནའང་འགྱུར་བ་མེད་པར་གཅིག་གྱུར་ཐོག་གནས་ཀྱི་རེད་ཅེས་བརྗོད་དཀའ་བ་རེད། སྲིད་བྱུས་ཀྱི་ཆ་རྐྱེན་ནང་དགོས་མཁོ་བྱུང་བའི་སྐབས་འགྱུར་བ་གཏོང་དགོས་བྱུང་བ་དང་བསྐྱར་ཞིབ་བྱེད་དགོས་བྱུང་ན་དེ་བྱེད་སྟངས་ཀྱི་ལམ་ཀ་བཏོན་ནས་བཞག་ཡོད། ཅེས་སོགས་ཀྱི་གསུང་བཤད་གནང་བ་དང་འབྲེལ།
རིན་པོ་ཆེ་མཆོག་གིས་ཤེས་ཡོན་སྲིད་བྱུས་ཀྱི་དམིགས་ཡུལ་སྐོར་གསུང་དོན། ཤེས་ཡོན་སྲིད་བྱུས་ཀྱི་དམིགས་ཡུལ་སྤྱིར་བཏང་ཞིབ་ཚགས་ཐོག་མང་པོ་བཤད་ཡོད་པ་རེད་དེ་དོན་དག་རྡོག་རྡོག་ཞུས་ན་རྗེས་མ་བོད་ལ་ལོག་རྒྱུའི་གོ་སྐབས་བྱུང་ན། བོད་མི་ཚོ་དང་མཉམ་དུ་ཐད་ཀར་འབྲེལ་བ་བྱེད་ཐུབ་རྒྱུ་ཞིག་དང་བོད་མི་ཚོ་དང་མཉམ་སྡོད་ཐུབ་པ་ཞིག་དགོས། དེ་བཞིན་བོད་ཀྱི་རྩ་དོན་གྱི་ལས་དོན་ཞིག་བྱས་ནའང་བོད་དོན་རྒྱབ་སྐྱོར་ཚོགས་པའི་བཟོ་འདྲ་བྱེད་མི་དགོས་པར་སོ་སོ་བོད་མི་རང་ཡིན་པའི་འདུ་ཤེས་དང་ངོ་བོ་གཉིས་ཀ་མཚོན་ཐུབ་པ་བྱུང་ན་དེར་ལྟ་བཟོ་འདྲ་ཞིག་ཡོད། དེ་མིན་སྐྱེས་ས་འབྱུང་ཁུངས་ཀྱི་ཆ་ནས་བོད་མི་ཡིན་ནའང་ཤེས་ཡོན་སློབ་གསོ་དང་གཤིས་སྤྱོད་ཀྱི་ཆ་ནས་བོད་མི་མིན་པ་ཞིག་ཆགས་ན། བོད་ཀྱི་རྩ་དོན་གྱི་ཐོག་ལས་ཀ་བྱས་ན་ཕྱི་རྒྱལ་གྱི་བོད་དོན་རྒྱབ་སྐྱོར་ཚོགས་པ་ལྟ་བུ་ཆགས་ཀྱི་རེད་མ་གཏོགས། བོད་རིགས་རང་གིས་རང་གི་དོན་དག་བྱས་པ་ལྟ་བུ་ཆགས་རྒྱུ་ཁག་པོ་ཡིན། དེར་བརྟེན་ཤེས་ཡོན་སྲིད་བྱུས་ཀྱི་དམིགས་ཡུལ་དེ་བོད་ཕྲུག་དེ་དག་མ་འོངས་པར་བོད་པ་ཆགས་རྒྱུའི་དམིགས་ཡུལ་བཟུང་སྟེ་དེའི་དོན་དུ་ཐབས་ལམ་གང་དང་གང་ཡོད་པ་དེ་དག་གསལ་སྟོན་བྱས་ཡོད་བསམས་ཀྱི་ཡོད། ཅེས་སོགས་ཀྱི་གསུང་བཤད་གནང་ཡོད་པ་བཅས།།
