༢༠༡༣ ཟླ་ ༡༡ ཚེས་ ༡༩ རེས་གཟའ་མིག་དམར།
༄༅། །ཕྱི་ལོ་ ༢༠༡༣ ཟླ་ ༡༡ ཚེས་ ༡༥ ཉིན་དབྱིན་ཡུལ་སྐུ་ཚབ་དོན་གཅོད་ཐུབ་བསྟན་བསམ་གྲུབ་ལགས་ཀྱིས་དབྱིན་ཡུལ་གྱི་ཝེ་ལིན་ཧེཊ་ཕིལ་ཌི་ Welwyn Hatfield ས་གནས་ཀྱི་གྲོས་ཚོགས་ཀྱི་འཐུས་མི་དང་དབྱིན་ཡུལ་གྱི་རྙིང་ཞེན་ཆབ་སྲིད་ཚོགས་པའི་ཚོགས་གཙོ་སྐུ་ཞབས་གྷ་རན་ཊི་ཤབ་སི་ Rt Hon Grant Shapps མཆོག་དང་ལྷན་ཧེཊ་ཕིལ་ཌིར་ཡོད་པའི་ཁོང་གི་ཡིག་ཚང་དུ་མཇལ་འཕྲད་གནང་འདུག ཁོང་རྣམ་གཉིས་ཀྱི་མཇལ་འཕྲད་འདི་བཞིན་ལྕམ་སྐུ་ཀེཊ་ཝེནཊ་ཝར་ཐ་ལགས་ཀྱིས་གོ་སྒྲིག་གནང་བ་ཞིག་ཡིན་འདུག སྐབས་དེར་སྐུ་ཚབ་དོན་གཅོད་ནས་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་ནི་བོད་མི་རྣམས་སོ་སོའི་ཆོས་དང་རིག་གཞུང་། སྲོལ་རྒྱུན་གྱི་ལམ་ལུགས་སོགས་རྒྱུན་གནས་ཡོང་ཐབས་སུ་བོད་མི་རྣམས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཡིན་པ་དང། དེ་བཞིན་མགོན་པོ་གང་ཉིད་མཆོག་གི་རང་བཙན་རྩོད་ཀྱི་མེད་སྐོར་ཡང་ཡང་འགྲེལ་བརྗོད་མཛད་བཞིན་ཡོད་པ་དང་། ༸གོང་ས་མཆོག་གི་བཞེད་དགོངས་དེ་དག་རྒྱ་ནག་གཞུང་གི་རྩ་ཁྲིམས་དང་མཐུན་པ་ཞིག་ཡིན་པ་དང་། རྒྱ་ནག་གཞུང་གིས་དྲག་པོའི་ཐབས་ལམ་བེད་སྤྱོད་བྱས་པ་དེས་བོད་ནང་གི་དཀའ་ངལ་ཇེ་ཆེར་བཟོ་བཞིན་ཡོད། བོད་མི་རྣམས་ཀྱིས་རྒྱ་ནག་གཞུང་ལ་རྩ་ཁྲིམས་ནང་གང་འཁོད་པའི་ཆ་རྐྱེན་དེ་དག་ཚུལ་མཐུན་ལག་བསྟར་བྱེད་དགོས་པའི་དགོས་འདུན་བཏོན་པ་ལས་ཁ་བྲལ་ནམ་ཡང་རྩོད་ཀྱི་མེད་སྐོར་སོགས་གསལ་གཤད་ཞུས་པ་དང་སྦྲགས།
ད་ལྟའི་ཆར་བོད་མི་གཞོན་སྐྱེས་རྣམས་ཀྱིས་རྒྱ་ནག་གཞུང་གི་བོད་ཐོག་འཛིན་པའི་རྒྱ་ནག་གཞུང་གི་སྲིད་བྱུས་དེར་ཞི་བའི་སྒོ་ནས་ངོ་རྒོལ་བྱེད་བཞིན་ཡོད་པ་མ་ཟད། བློ་ཕམ་པ་ཞིག་ལ་ཕྱི་ལོ་ ༢༠༠༩ ནས་བཟུང་ད་བར་བོད་མི་ ༡༢༢ ཀྱིས་རང་ལུས་མེར་སྲེག་བཏང་སྟེ་ཞི་བའི་ངོ་རྒོལ་བྱས་ཡོད། ཅེས་ངོ་སྤྲོད་ཞུས། དེ་བཞིན་སྐུ་ཚབ་དོན་གཅོད་ཀྱིས་དབྱིན་ཡུལ་སྲིད་བློན་ཌེ་ཝི་ཌི་ཀེ་མི་རོན་ David Cameron མཆོག་གིས་གཙོས་ཕྱི་སྲིད་དྲུང་ཆེ་ཝིལ་ཡེམ་ཧེག་ William Hague མཆོག་དང། དེ་བཞིན་དབྱིན་ཡུལ་གྱི་གཞུང་འཛིན་པ་རྣམས་ལ་གོ་སྐབས་ནམ་བྱུང་སྐབས་རྒྱ་ནག་གཞུང་ལ་འགྲོ་བ་མིའི་ཐོབ་ཐང་གནས་སྟངས་ཀྱི་ཚད་གཞི་མཐོ་རུ་གཏོང་རྒྱུར་གནོན་ཤུགས་སྤྲོད་རྒྱུའི་རེ་འདུན་བཏོན་ཡོད། རྒྱ་ནག་དེ་བཞིན་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་མི་ཁོངས་སུ་སླར་ཡང་འདེམས་ཐོན་བྱུང་རྗེས་འགྲོ་བ་མིའི་ཐོབ་ཐང་དང་འབྲེལ་བའི་འགན་འཁུར་དེ་དག་སྔར་བས་ཤུགས་ཆེ་བ་འཁྱེར་དགོས་སྐོར་གསལ་བཤད་གནང་ཡོད། སྐབས་དེར་སྐུ་ཞབས་གྷ་རན་ཊི་ཤབ་སི་མཆོག་གིས་དབྱིན་ཡུལ་གྱི་བློན་ཆེན་རྣམས་ནས་རྒྱ་ནག་གཞུང་གི་དཔོན་རིགས་དང་མཉམ་ཐུགས་འཕྲད་ནམ་བྱུང་སྐབས་བོད་ནང་གི་འགྲོ་བ་མིའི་ཐོབ་ཐང་གི་གནད་དོན་དེར་གུས་བརྩི་བྱེད་དགོས་སྐོར་གསུངས་རྒྱུའི་ཁས་ལེན་ཡང་གནང་ཡོད། ཉེ་ཆར་དབྱིན་ཡུལ་གྱི་ཕྱི་སྲིད་དྲུང་ཆེ་མཆོག་གིས་གྲོས་ཚོགས་ནང་བོད་ནང་གི་འགྲོ་བ་མིའི་ཐོབ་ཐང་དང་འབྲེལ་བའི་གནད་དོན་ཐོག་ཤུགས་ཆེན་པོས་ཐོག་ནས་གསུངས་ཡོད་སྐོར་གསལ་བཤད་གནང་ཡོད། དེ་རྗེས་སྐུ་ཚབ་དོན་གཅོད་ཀྱིས་སྐུ་ཞབས་གྷ་རན་ཊི་ཤབ་སི་མཆོག་ལ་རྟེན་བྱུང་གི་མཇལ་དར་དང་ཕྱག་རྟགས་སུ་༸གོང་ས་མཆོག་གིས་ལྗགས་རྩོམ་མཛད་པའི། ཆོས་ལུགས་ཀྱི་རྒྱ་ལས་བརྒལ་བ། (Beyond Religion) ཞེས་པའི་དཔེ་དེབ་ཕུལ་ཡོད་པ་བཅས།།
