༢༠༡༣ ཟླ་ ༡༡ ཚེས་ ༢༧ རེས་གཟའ་ལྷག་པ།
༄༅། །འདི་གར་ཐེ་ཝན་བོད་ཀྱི་སྐུ་ཚབ་དོན་ཁང་ནས་གནས་ཚུལ་མཁོ་སྤྲོད་གནང་དོན། ཐེ་ཝན་བོད་སོག་ལས་ཁུངས་ནས་རྒྱ་གཞུང་གིས་དབྱེ་བགོས་བྱས་པའི་རྒྱ་ནག་ཀན་སུའུ་ཞིང་ཆེན་མི་རིགས་གླུ་གར་ཚོགས་པ་ཞེས་པ་མགྲོན་འབོད་ཀྱིས་ཐེ་ཝན་གྱི་ས་གནས་ཁག་ལྔའི་ནང་། རྒྱ་ནག་སྐམ་ཆེན་གྲངས་ཉུང་མི་རིགས་སྒྱུ་རྩལ་གླུ་གཞས་སྐོར་སྐྱོད་འཁྲབ་སྟོན། ཞེས་པ་ཞིག་གོ་སྒྲིག་དང་། འཁྲབ་སྟོན་གྱི་ནང་དོན་གཙོ་བོ་བོད་དང་སོག་པོ་ཡིན་པ་མ་ཟད། འཁྲབ་སྟོན་བྱེད་མཁན་ཁོངས་བོད་མི་སོགས་གྲངས་ཉུང་མི་རིགས་གཞན་ཁག་གཅིག་ཐེ་ཝན་ནང་འབྱོར་ཏེ།
ཕྱི་ལོ་ ༢༠༡༣ ཟླ་ ༡༡ ཚེས་ ༢༦ ཉིན་དགོང་དྲོ་རྒྱལ་ས་ཐེ་པེ་གྲོང་ཁྱེར་ནང་འཁྲབ་སྟོན་ཐོག་མ་བྱེད་སྐབས། ཐེ་ཝན་བོད་རིགས་ཚོགས་པའི་ཚོགས་གཙོ་དགྲ་བཅོམ་པ་ལགས་དང་། ས་གནས་བོད་ཀྱི་གཞོན་ནུའི་ཚོགས་གཙོ་བསྟན་འཛིན་ཆོས་འཕེལ་ལགས། བོད་རིགས་ཚོགས་པའི་སློབ་སྟོན་པ་བཀྲ་ཤིས་ལགས་སོགས་བོད་མི་ཁག་གཅིག་གིས་ལུས་ཐོག་བོད་ཀྱི་རྒྱལ་དར་གྱོན་པ་དང་། ལག་ཏུ་ནང་དོན་བོད་ཀྱི་གླུ་གར་འཁྲབ་སྟོན་བལྟ་བ་དང་དུས་མཚུངས། བོད་མི་ ༡༢༢ ཀྱིས་བོད་ཀྱི་རིག་གཞུང་སྲུང་སྐྱོབ་ཆེད་རང་ལུས་མེར་སྲེག་གནང་བར་དོ་སྣང་གནང་རོགས་ཞེས་རྒྱ་ཡིག་དང་དབྱིན་ཡིག་གི་ཕྲེད་དར་འཕྱར་བ་དང་། ཡིག་ཆ་འགྲེམས་སྤེལ་བཅས་གནང་བར་ཐེ་ཝན་མི་མང་སྟོང་ཕྲག་མང་པོས་དོ་སྣང་ཆེན་པོ་གནང་ཡོད།
གཞན་ཡང་ཐེ་ཝན་གྲོས་ཚོགས་ནང་བོད་སོག་ལས་ཁུངས་ཀྱི་སྔོན་རྩིས་དང་འབྲེལ་བའི་ལས་རིམ་སྐབས། བོད་དོན་རྒྱབ་སྐྱོར་གནང་མཁན་གྲོས་ཚོགས་འཐུས་མི་མང་པོས་བོད་སོག་ལས་ཁུངས་ཀྱིས་བོད་ནང་རང་ལུས་མེར་སྲེག་བཏང་བར་རྒྱ་ནག་གཞུང་ལ་སྐྱོན་བརྗོད་སོགས་བྱེད་པ་མཐོང་རྒྱུ་མེད་པར་སྐྱོན་བརྗོད་ཤུགས་ཆེ་བྱེད་མྱོང་ཡོད།
