༢༠༡༣ ཟླ་ ༡༠ ཚེས་ ༤ རེས་གཟའ་པ་སངས།
༄༅། །འདི་གར་ཤེས་རིག་སྲོལ་རྒྱུན་ཚན་པས་བཏང་གནས་ནང་འཁོད་དོན། དབུས་བོད་སློབ་འཛིན་ཚོགས་ཁྱབ་ཁོངས་སློབ་ཁག་རིང་མིན་བོད་མིའི་སྒྲིག་འཛུགས་ཤེས་རིག་ལས་ཁུངས་ལ་རྩིས་སྤྲོད་ཟིན་མཚམས་བོད་སློབ་འཛིན་ཚོགས་ཀྱི་སློབ་གྲྭ་ཁག་གི་ལས་ཁུངས་ལས་བྱེད་དམིགས་སྒོར། ཤེས་རིག་ལས་ཁུངས་ནས་མི་འགྲོ་འདེམས་སྒྲུག་ཆེད་གསལ་བསྒྲགས་བསྐྱངས་པ་གཞིར་བཟུང་སྙན་འབུལ་བ་རྣམས་ལ་ཚུད་རྒྱུགས་གོ་སྒྲིག་ཞུས་པའི་ཁོངས་ནས་དངོས་སུ་ཚུད་རྒྱུགས་འཕྲོད་མཁན་ལས་དྲུང་ ༡༢ དང་དངུལ་གཉེར་རྩིས་པ་ ༡༢ བྱུང་ཡོད་པ་རྣམས་ཕྱི་ལོ་ ༢༠༡༣ ཟླ་ ༩ ཚེས་ ༣ ནས་ཟླ་ ༡༠ ཚེས་ ༣ བར་ཟླ་བ་གཅིག་རིང་སཱ་ར་མཐོ་སློབ་ཏུ་ལས་དྲུང་གི་ལས་དོན་གནང་ཕྱོགས་དང་རྩིས་ཁྲ་བཟོ་འགོད་དང་ཉར་ཚགས་གནང་ཕྱོགས་དང་འབྲེལ་བའི་སྦྱོང་བརྡར་ཞིག་གོ་སྒྲིག་ཞུས་པ་ལྟར་ཕྱི་ཚེས་ ༣ ཉིན་མཇུག་བསྒྲིལ་ཡོད།
མཇུག་བསྡོམས་མཛད་སྒོའི་སྐུ་མགྲོན་གཙོ་བོར་སཾ་བྷོ་ཊ་བོད་སློབ་ཚོགས་པའི་སྤྱི་ཁྱབ་འགན་འཛིན་ཀརྨ་ཆུང་བདག་ལགས་ཚོགས་བཞུགས་ཐོག སཱ་ར་མཐོ་སློབ་ཀྱི་སློབ་སྤྱི་དགེ་བཤེས་འཇམ་དཔལ་གྲགས་པ་ལགས་དང་། ཤེས་རིག་ཤེས་ཡོན་འགན་འཛིན་གཉིས་ཚོགས་ཞུགས་གནང་ཡོད། མཛད་སྒོའི་ལས་རིམ་གྱི་ཐོག་མར་ཤེས་རིག་སྲོལ་རྒྱུན་ཚན་པའི་འགན་འཛིན་ཚེ་རིང་བསམ་གྲུབ་ལགས་ཀྱིས་ཟླ་བ་གཅིག་རིང་གི་སྦྱོང་བརྡར་ལས་བསྡོམས་སྙན་སྒྲོན་ཞུས་པ་དང་སྦྲགས་ཚོགས་བཅར་བ་ཚང་མར་རིང་མིན་སློབ་ཁག་ཏུ་ལས་བགོས་གནང་རྒྱུ་ཡིན་པ་འགྲེལ་བརྗོད་ཞུས།
ཟླ་བ་གཅིག་གི་སྦྱོང་བརྡར་ཚོགས་ཐུན་ཁོངས་ཤེས་རིག་ལས་ཁུངས་ཀྱི་དྲུང་ཆེ་རྣམ་པ་གཉིས་ནས་ཚོགས་ཐུན་གཉིས་རེ་ཚོགས་བཅར་བ་རྣམས་ལ་ལམ་སྟོན་གསུང་བཤད་དང་། སྤྱི་ཁྱབ་རྩིས་ཞིབ་ལས་ཁུངས་ཀྱི་དྲུང་འཕར་རིག་འཛིན་ཆོས་འཕེལ་ལགས་ཀྱིས་རྩིས་ཀྱི་འགྲོ་སྟངས་སྤྱི་དང་། སཱ་ར་མཐོ་སློབ་ཀྱི་སློབ་སྤྱི་ནས་བཟང་སྤྱོད་སྐོར། ས་རྰ་མཐོ་སློབ་ཀྱི་བོད་དགེ་ངག་རྡོར་ལགས་དང་ན་ག་སངས་རྒྱས་བསྟན་དར་ལགས་གཉིས་ཀྱིས་བོད་ཀྱི་སྐད་ཡིག ཤེས་ཡོན་འགན་འཛིན་ཟུར་པ་སྐལ་བཟང་དབང་འདུས་ལགས་ཀྱིས་ཨིན་ཡིག་ཐོག་གཞུང་དོན་ཡིག་འབྲེལ་ཞུ་ཕྱོགས་སྐོར་དང་། དཔལ་འབྱོར་ལས་ཁུངས་ཀྱི་ཟུར་དྲུང་ལེགས་གྲུབ་ལགས་ཀྱིས་ཊེ་ལིའི་འགྲོ་སྟངས། སཾ་བྷོ་ཊའི་རྩིས་པ་ཚེ་རིང་བཀྲ་ཤིས་ལགས་ཀྱིས་རྩིས་ཀྱི་འགྲོ་སྟངས། བོད་སློབ་འཛིན་ཚོགས་ཀྱི་རྩིས་པ་ཟུར་པ་ཨེས་ཇེ་རྰབ་ཀྱིས་རྩིས་དང་ལས་ཁུངས་ཀྱི་ལས་དོན་བྱེད་ཕྱོགས་སྤྱིའི་སྐོར་དང་། སཾ་བྷོ་ཊ་སྤྱི་ཁྱབ་འགན་འཛིན་གྱིས་ཤེས་ཡོན་སྐོར། དེ་བཞིན་ཤེས་རིག་སྡེ་ཚན་འགན་འཛིན་རྣམས་ཀྱིས་སྡེ་ཚན་སོ་སོའི་ལས་དོན་ངོ་སྤྲོད་གནང་བ་བཅས་ཁྱོན་བསྡོམས་ཟླ་བ་གཅིག་རིང་ཚོགས་ཐུན་ ༡༨༧ ལྷག་བརྗོད་གཞི་འདྲ་མིན་ཐོག་སློབ་ཁྲིད་ཞུས་ཐུབ་པ་བྱུང་ཡོད།
མཇུག་བསྡོམས་མཛད་སྒོའི་སྐབས་སཱ་མཐོ་སློབ་ཀྱི་སློབ་སྤྱིས་ཐེངས་འདིར་བོད་སློབ་འཛིན་ཚོགས་ཀྱི་སློབ་ཁག་རྣམས་རྩིས་ལེན་ཐུབ་པ་དེ་དུས་ཡུན་རིང་པོ་ཞིག་ནས་ངང་སྒུག་གནང་བའི་རེ་བ་དེ་དངོས་སུ་གྲུབ་སྟེ། ཁྱེད་རང་ཚོ་སློབ་གྲྭ་དེ་དག་ནང་མ་འོངས་པར་ལས་ཀ་བྱེད་དུ་འགྲོ་མཁན་ཡིན་སྟབས་དུས་རྟག་ཏུ་རང་ཉིད་༸རྒྱལ་བ་རིན་པོ་ཆེས་ཅི་གསུངས་བཀའ་སྒྲུབ་ཞུ་མཁན་ཞིག་ཡིན་བསམས་ཏེ་རང་གི་ལས་འགན་ལ་སྤྲོ་སྣང་དགོས་རྒྱུ་གལ་ཆེན་པོ་ཡིན་པ་དང་། དངོས་སུ་ལས་དོན་ལ་ཞུགས་སྐབས་དཀའ་ངལ་རིགས་ཡོང་སྲིད་ཀྱང་དེ་དག་རིམ་པས་གདོང་ལེན་གྱིས་མདུན་བསྐྱོད་ཐུབ་པ་ཞིག་དགོས་རྒྱུ་མ་ཟད། ལུས་ངག་གི་སྤྱོད་ལམ་ཚུལ་མཐུན་གནང་རྒྱུ་དེ་ཡང་གལ་ཆེན་པོ་ཡིན་པའི་སྐོར་གསུངས།
དེ་རྗེས་སྐུ་མགྲོན་གཙོ་བོ་ཀརྨ་ཆུང་བདག་ལགས་ཀྱིས་ལོ་མང་པོ་ཕྱིན་པའི་སྒྲིག་འཛུགས་ཤིག་བརྗེ་པོ་ཐེབས་ཡོང་དུས་དེར་མཐུད་མཚམས་བྱེད་མཁན་ཡག་པོ་ཞིག་མ་བྱུང་ཚེ་ལས་དོན་ལ་འཐུས་ཤོར་འགྲོ་ཉེན་ཡོད་སྟབས། མ་འོངས་པར་སློབ་གྲྭའི་ནང་ལོ་གཅིག་མ་གཏོགས་ལས་ཀ་བྱེད་འདོད་མེད་ཀྱང་བཞུགས་ཡུན་རིང་ལྷག་བསམ་རྣམ་དག་གི་ཐོག་ནས་དུས་ཚོད་ཆ་ཚང་ཞིག་སློབ་གྲྭ་དང་སྤྱི་པའི་ལས་དོན་ལ་གཏོང་དགོས་པའི་སྐོར་དང་། ལས་དོན་གང་འདྲ་ཞིག་ཡིན་རུང་ནོར་འཁྲུལ་སོགས་ཡོང་སྲིད་ཀྱང་བསམ་བཞིན་དུ་ནོར་འཁྲུལ་གཏོང་བའམ་སྤྱོད་ལོག་སོགས་བྱས་ན་ཡག་པོ་མིན་ཚུལ་དང་། གཞན་ཡང་ལས་ཁུངས་ཀྱི་ཡིག་ཆ་ཉར་ཚགས་བྱེད་ཕྱོགས་ཐད་གཟབ་གཟབ་གནང་དགོས་པ་བཅས་ཀྱི་ལམ་སྟོན་ཞིབ་ཕྲ་གནང་། མཐའ་དོན་ཤེས་ཡོན་འགན་འཛིན་དངོས་གྲུབ་བསྟན་པ་ལགས་ཀྱིས་སྐུ་མགྲོན་གཙོ་བོ་མཆོག་དང་ལྷག་པར་དུ་ཟླ་བ་གཅིག་གི་སྦྱོང་བརྡར་རིང་མཐུན་འགྱུར་གནང་མཁན་འབྲེལ་ཡོད་ཚང་མར་ཐུགས་རྗེ་ཆེ་ཞུས་ཏེ་མཇུག་བསྡོམས་མཛད་སྒོ་གྲོལ་བ་བཅས།།
