༢༠༡༣ ཟླ་ ༩ ཚེས་ ༢༦ རེས་གཟའ་ཕུར་བུ།
༄༅། །འདི་གར་ཁུངས་ལྡན་གནས་ཚུལ་འབྱོར་གསལ་ལྟར་ན། རྒྱ་ནག་གཞུང་གིས་རྨ་ཆུ་རྫོང་དབལ་པན་སྡེ་བའི་བོད་མི་ཞིག་ཆབ་སྲིད་ཀྱི་དོགས་གཞིའི་འོག་སྔ་ཕྱི་ཐེངས་གཉིས་འཛིན་བཟུང་བྱས་ཏེ། ད་ལྟའི་ཆར་ཁྲིན་ཏུའུ་གྲོང་ཁྱེར་གྱི་ལྟ་སྲུང་ཁང་དུ་བཀག་ཉར་བྱས་ཡོད་འདུག
རྒྱ་ནག་གཞུང་གིས་སྔར་ལོའི་ཕྱི་ཟླ་ ༥ ཚེས་ ༡༥ ཡས་མས་སུ་ཀན་ལྷོ་ཁུལ་རྨ་ཆུ་རྫོང་དབལ་པན་སྡེ་བའི་སྐོང་གནས་རུ་ཆེན། ཡག་ཤུལ་རོ་ཞེས་པ་ནས་ཡིན་པའི་ཕ་ཚེ་བརྟན་དང་མ་པདྨ་གཉིས་ཀྱི་བུ་རང་ལོ་རང་ལོ་ ༢༦ ལ་སོན་པ་བློ་བཟང་རྣམ་རྒྱལ་ལགས། ཁྲིན་ཏུའུ་གྲོང་ཁྱེར་བོད་མིའི་ཁྲོམ་གྱི་བྷུ་དྷ་རིག་གནས་ལས་བྱ་ཁང་དུ་ཞོར་ལས་བྱེད་སྐབས། གློ་བུར་རྒྱ་གཞུང་གིས་འཛིན་བཟུང་བྱས་ཏེ་གར་ཡོད་ཅི་བྱུང་གི་གནས་ཚུལ་ཅི་ཡང་མ་ཤེས་པར་ལྷག་ཡོད་པ་དང་། ཕྱི་ཟླ་ ༩ ཙམ་གྱི་རྗེས་སུ་ནང་མི་ཉེ་འབྲེལ་ཚོས་རྒྱ་གཞུང་གིས་ཁོང་ལ། ༸གོང་ས་མཆོག་གི་བཀའ་སློབ་དང་། ཆབ་སྲིད་དང་འགལ་བའི་ཡིག་ཆ་པར་སྐྲུན་བྱས་པའི་ཉེས་འཛུགས་འོག ཁྲིན་ཏུའུ་གྲོང་ཁྱེར་ལྟ་སྲུང་ཁང་དུ་བཙོན་འཇུག་བཀག་ཉར་བྱས་ཡོད་ཚུལ་ཤེས་རྟོགས་བྱུང་ཡོད་འདུག
ཕྱི་ལོ་ ༢༠༠༨ ལོར་བོད་མདོ་སྨད་རྨ་ཆུ་རྫོང་དུ་བོད་མི་ཚོས་ཞི་བའི་ངོ་རྒོལ་བྱེད་སྐབས། རྒྱ་ནག་གཞུང་གིས་ས་གནས་ཀྱི་བོད་མི་ ༡༨ འཛིན་བཟུང་བཙན་འཁྲིད་བྱས་ཡོད་པ་དང་། སྐབས་དེར་གེ་སར་ནང་མ་ཁང་དུ་བོད་མི་ ༦ འཛིན་བཟུང་བྱས་ཡོད་པའི་ཁྲོད་བློ་བཟང་རྣམ་རྒྱལ་ལགས་ཀྱང་ཚུད་ཡོད་འདུག་ལ། སྔ་ལོར་འཛིན་བཟུང་བྱས་རྗེས་ཉེན་རྟོག་པས་ནང་མིར་ཁོང་གིས་ནག་ཉེས་ཆེན་པོ་བསགས་ཡོད་ཚུལ་གྱི་སྡིགས་ར་བསྐུལ་བ་དང་། བཙོན་ཁང་དུ་ཟ་མ་དང་གྱོན་ཆས་སོགས་གཅིག་ཀྱང་སྤྲོད་བཅུག་མེད་པའི་དབང་གིས། ད་ལྟའི་ཆར་ཉེ་འབྲེལ་ཚོས་རྒྱ་གཞུང་གིས་ཁོང་ལ་མ་ཉེས་ཁ་གཡོག་གིས་ནག་ཉེས་འདྲ་མིན་བཀལ་ཏེ་ཉེས་ཆད་ལྕི་མོ་གཅོད་སྲིད་པའི་སེམས་ཁྲལ་བྱེད་ཀྱི་ཡོད་འདུག
ཁོང་ནི་སློབ་གྲྭ་ཆུང་འབྲིང་འགྲིམས་མྱོང་མཁན་ཞིག་ཡིན་པ་མ་ཟད། ཕྱི་ལོ་ ༢༠༡༡ ལོར་རྒྱ་ཤེས་རིག་གླིང་ནས་སློབ་མཐར་ཕྱིན་ཡོད་འདུག་ལ། སློབ་མཐར་ཕྱིན་སྐབས་ ༼འཚོལ༽ ཞེས་པའི་སྙན་དེབ་ཅིག་བརྩམས་ཏེ་པར་སྐྲུན་འགྲེམས་སྤེལ་བྱས་ཡོད་འདུག
