༢༠༡༣ ཟླ་ ༩ ཚེས་ ༡༩ རེས་གཟའ་ཕུར་བུ།
༄༅། །ཕྱི་ལོ་ ༢༠༡༣ ཟླ་ ༩ ཚེས་ ༡༨ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཇར་མ་ནིའི་གྲོང་ཁྱེར་ཧ་ནོ་ཝར་ཡོད་པའི་ལོ་རྒྱུས་རང་བཞིན་ལྡན་པའི་Hardenbergsches Haus ཞེས་ཚོགས་ཁང་དུ་༸ཞབས་སོར་འཁོད་རྗེས་གསར་འགོད་པ་ལྷན་མཇལ་འཕྲད་ཀྱིས་བཀའ་སློབ་སྩལ་དོན། ངོས་རང་ཆུང་དུས་ཇར་མ་ནིར་དམག་ཆེན་གཉིས་པའི་ནང་ཕམ་ཉེས་བྱུང་བར་བློ་ཕམ་བྱེད་མྱོང་ཡོད། དམག་གི་ཕམ་ཉེས་ཧ་ཅང་ཤུགས་ཆེ་བྱུང་ཡོད་ཀྱང། ཇར་མན་ཡུལ་འདི་སླར་ཡང་ཐལ་རྡུལ་འོག་ནས་ཡར་རྒྱས་འདི་ལྟར་བྱུང་བར་ངོས་ཀྱིས་སླར་ཡང་བསྔགས་བརྗོད་ཞུ་རྒྱུ་ཡིན། ཞེས་བཀའ་སློབ་སྩལ། སྐབས་དེར་གསར་འགོད་པ་གཅིག་གིས་༸གོང་ས་མཆོག་ཇར་མན་དུ་ཆིབས་སྒྱུར་བསྐྱངས་དགོས་དོན་གང་ཡིན་གྱི་དྲི་བ་ཞུས་པར་བཀའ་ལན་སྩལ་དོན།
ངོས་ལ་མགྲོན་འབོད་གནང་བ་དེར་དང་ལེན་མ་བྱས་ན་ལྐུག་པ་རེད་བསམས་བྱུང་། ཞེས་བཀའ་ལན་སྩལ་ཡོད། སྐབས་དེར་མགོན་པོ་གང་ཉིད་མཆོག་གིས་སློབ་ཕྲུག་ཚོར་བཀའ་སློབ་ཕེབས་དོན། ངོས་རང་དུས་རབས་ ༢༠ པའི་མི་རབས་ཤིག་ཡིན། ཁྱེད་རང་ཚོ་དུས་རབས་ ༢༡ པའི་མི་རབས་རེད། རྩོད་རྙོག་དང་དཀའ་ངལ་སོགས་ནམ་འཕྲད་སྐབས་མཚོན་ཆ་བེད་སྤྱོད་བྱེད་རྒྱུའི་ཚབ་ཏུ་ཞི་བའི་ཐོག་གྲོས་མོལ་གྱི་ལམ་ནས་དཀའ་རྙོག་སེལ་ཐབས་གནང་དགོས། ཞེས་བཀའ་ལན་སྩལ་བ་དང་དེ་བཞིན་གསར་འགོད་པ་གཅིག་གིས་༸གོང་ས་མཆོག་གི་མཛད་འཁུར་སྐོར་གྱི་དྲི་བར་བཀའ་ལན་སྩལ་དོན། ངོས་ཀྱིས་ཆབ་
སྲིད་ཀྱི་དབང་ཆ་ཆ་ཚང་མི་མང་གིས་འོས་འདེམས་བྱས་པའི་འགོ་ཁྲིད་ཚོར་རྩིས་སྤྲད་ཟིན་པ་ནས་བཟུང་ངོས་རང་རྒས་ཡོལ་ཆ་ཚང་ཞུས་ཟིན་པ་ཡིན། ཞེས་བཀའ་ལན་སྩལ་ཡོད།
དེ་རྗེས་ཨར་ཏེ་ཊི་ཝི་ ARTE TV ཞེས་བརྙན་འཕྲིན་ལས་ཁང་གི་གསར་འགོད་པ་ལྕམ་སྐུ་ན་ཛན་གྷོ་ཨེཀ་ཌེ་མིར་Nazan Goeckdemir ལགས་ཀྱིས་ཆེད་དོན་དྲི་བར་བཀའ་ལན་སྩལ་དོན། ངོས་རང་དང་གཞོན་སྐྱེས་ཚོ་ཐུག་ནས་སྐད་ཆ་ཤོད་རྒྱུ་བྱུང་བ་དེ་ཧ་ཅང་གལ་ཆེར་འཛིན་བཞིན་ཡོད། གང་ཡིན་ཞེ་ན། གཞོན་སྐྱེས་ཚོར་སྤྱི་ཚོགས་བཟང་དུ་གཏོང་རྒྱུའི་ནུས་པ་ལྡན་ཡོད། རྒན་པ་ཚོའི་བསམ་བློ་དེ་ཧ་ལམ་འགྱུར་བ་གཏོང་རྒྱུ་ཁག་པོ་རེད། ཅེས་བཀའ་ལན་སྩལ། དེ་རྗེས་གསར་འགོད་པས་༸གོང་ས་མཆོག་གིས་ཡུ་རོབ་ཀྱི་མ་འོངས་མདུན་ལམ་དང་འབྲེལ་བའི་འཆར་སྣང་ཇི་འདྲ་ཡིན་སྐོར་དྲི་བ་ཞུས་པར་༸གོང་ས་མཆོག་གིས་བཀའ་ལན་སྩལ་དོན། ཡུ་རོབ་སྤྱི་མཐུན་ཚོགས་པའི་ལས་འཆར་དེར་ངོས་རང་ཡིད་སྨོན་སྐྱེ་བཞིན་ཡོད། ལས་འཆར་དེའི་འོག་རྒྱལ་ཁབ་སྒེར་པ་ཚོས་སོ་སོའི་རང་དོན་གཙིགས་ཆེར་འཛིན་བཞིན་པ་དེ་བསྒྲུབ་ཆེད་རྒྱལ་ཁབ་མང་པོ་མཉམ་རུབ་ཐོག་ནས་ལས་ཀ་བྱེད་བཞིན་ཡོད། ཐབས་ལམ་དེ་ཡག་ཤོས་ཤིག་ཆགས་ཡོད། ལྷག་པར་དེང་དུས་ཤེས་ཡོན་ལམ་ལུགས་ནང་ཆོས་ལུགས་རིས་མེད་ཀྱི་བཟང་སྤྱོད་དང་འབྲེལ་བའི་སློབ་ཚན་འཇོག་མཁན་ཐོག་མ་དེ་ཡུ་རོབ་ཆགས་རྒྱུ་ཡིན་པའི་རེ་བ་ཡོད། ཅེས་བཀའ་ལན་སྩལ་ཡོད།
